Три и пол месеци стои ѓубрето под мостот на реката Кумановка во селото Проевце, кое поради паднатите дрвја и гранки го попречува нормалниот тек на водата. Пред мостот се прави езеро, кое при поголем доток може да се излие надвор од коритото. Надлежност да го исчисти ѓубрето е Општина Куманово.
Известувањето од Центарот за управување со кризи (ЦУК) до Општина Куманово дека има натрпан смет под мостот на Кумановка е испратено на 24 ноември 2023 година.
„Од лицето за контакт сме известени дека за мостот запознаени се одговорните во Општинскиот кризен штаб во Општина Куманово и од нивна страна се праваат напори за решавање за настанатата ситуација од денот на настанот. До сега ништо не е превземено за прочистување на гранките- отпадот од донесената вода во речното корито“, стои во денешниот билтен на ЦУК.
Локалните жители, кои секојдневно го користата мостот, велат дека реката Кумановка во тој дел на градот никогаш не е чиста, но по последните врнежи од дожд зголемен е водостојот, па донела дополнителни количини на смет. Тие се плашат дека доколку не се исчисти навреме постои опасност од поплави, бидејќи ѓубрето го намалува протокот на водата и се создава брана.
Во текот на изминатото деноноќие во Куманово наврнаа околу 20 литри дожд на метар квадратен. Врнежи од дожд се можни и денеска, а од утре се очекува променливо облачно, но сува време.
11 мар 2024
