Орталанып, сергеп көр!
Оой, өңнүк, эзирииңден сергеп көр!
Огородуң чашпан дуглаан, кончуун көр!
Херимиңниң эжиин безин таанда-ла
Хендир-биле чежеге дээр шарыыр сен.
Огородуң иштинде
шыйлашкыннаан хаваннар
сывыртажып тур.
Херимиңниң дыдыындан
суурнуң черлик ыттары
шуужуп эртип тур.
Ээй, өңнүк, эзирииңден сергеп көр!
Эът-чем өртээ өзүп-ле тур,кончуун көр!
Өлүрүп чиир дуюглуг мал хамаанчок,
Өскүс анай безин чок сен, кончууңну.
Огородуң иштинде
шыйлашкыннаан хаваннар
сывыртажып тур.
Херимиңниң дыдыындан
суурнуң черлик ыттары
шуужуп эртип тур.
Оой, өңнүк, орталанып, сергеп көр!
Орук-суурда чычааннарның кончуун көр!
Дыңнап көр даан, чадаг-тергең безин чок,
Тыва кижи хаван чадаг, кончууңну.
Огородуң иштинде
шыйлашкыннаан хаваннар
сывыртажып тур.
Херимиңниң дыдыындан
суурнуң черлик ыттары
шуужуп эртип тур.
Бурган сени ядыы кылдыр чаяаваан,
Бурууңну сен өскелерге шамнава.
Чалгаа, чазый, авыяас-ла болбаза,
Самолёттан чүге садып мунмас бис?
Огородуң иштинде
шыйлашкыннаан хаваннар
сывыртажып тур.
Херимиңниң дыдыындан
суурнуң черлик ыттары
шуужуп эртип тур.
28 июн 2020