Заводта болсаң, күнбе-күн Көрінер еді табысың. Дәрігер болсаң, түрлі емің - Сырқаулы жанның бағы шын. Ал сенің еңбек жемісің Өзгеше тіпті басқадан: Ол - өзін арнап ел үшін Осынау жүрген жақсы адам. Жақсы адам - елдің тірегі, Байлығы туған халықтың, Шапағын шашар үнемі Көгінде тұрған жарық күн. Сан жастың қамын шертесің, Тағдырын ойлап толғанып. Әр үйдің бір-бір еркесін Үйреттің өзің қолға алып. Ұстазсыз жанда сөнбек күн, Шәкіртсіз өмір - сусыз жер. Көрінбес ғажап еңбектің Бейнетін кешіп жүрсіздер. Жүректе тұрар жалқы үнің, Жанымнан жалын жігер күт. Ұстазым, сенің әр күнің, Әр сәтің тұрған бір ерлік! Авторы: Фариза Оңғарсынова