Псалтирь. Псалом 106. Протоиерей Олег Стеняев. Библия 

Пс.106:0 Аллилу́iа. Пс.106:1 Исповѣ́дайтеся Го́сподеви, я́ко бла́гъ, я́ко въ вѣ́къ ми́лость его́. Пс.106:2 Да реку́тъ изба́вленнiи Го́сподемъ, и́хже изба́ви изъ руки́ врага́, Пс.106:3 и от стра́нъ собра́ и́хъ, от восто́къ и за́падъ, и сѣ́вера и мо́ря: Пс.106:4 заблуди́ша въ пусты́ни безво́днѣй, пути́ гра́да оби́телнаго не обрѣто́ша: Пс.106:5 а́лчуще и жа́ждуще, душа́ и́хъ въ ни́хъ изчезе́. Пс.106:6 И воззва́ша ко Го́споду, внегда́ скорбѣ́ти и́мъ, и от ну́ждъ и́хъ изба́ви я́: Пс.106:7 и наста́ви я́ на пу́ть пра́въ, вни́ти во гра́дъ оби́телный. Пс.106:8 Да исповѣ́дятся {да исповѣ́дятъ} Го́сподеви ми́лости его́ и чудеса́ его́ сыново́мъ человѣ́ческимъ: Пс.106:9 я́ко насы́тилъ е́сть ду́шу тщу́, и ду́шу а́лчущу испо́лни бла́гъ: Пс.106:10 сѣдя́щыя во тмѣ́ и сѣ́ни сме́ртнѣй, окова́нныя нището́ю и желѣ́зомъ, Пс.106:11 я́ко преогорчи́ша словеса́ Бо́жiя, и совѣ́тъ вы́шняго раздражи́ша. Пс.106:12 И смири́ся въ трудѣ́хъ се́рдце и́хъ, и изнемого́ша, и не бѣ́ помага́яй. Пс.106:13 И воззва́ша ко Го́споду, внегда́ скорбѣ́ти и́мъ, и от ну́ждъ и́хъ спасе́ я́: Пс.106:14 и изведе́ я́ изъ тмы́ и сѣ́ни сме́ртныя, и у́зы и́хъ растерза́. Пс.106:15 Да исповѣ́дятся {да исповѣ́дятъ} Го́сподеви ми́лости его́ и чудеса́ его́ сыново́мъ человѣ́ческимъ: Пс.106:16 я́ко сокруши́ врата́ мѣ́дная, и вереи́ желѣ́зныя сломи́. Пс.106:17 Воспрiя́тъ я́ от пути́ беззако́нiя и́хъ: беззако́нiй бо ра́ди свои́хъ смири́шася. Пс.106:18 Вся́каго бра́шна возгнуша́ся душа́ и́хъ, и прибли́жишася до вра́тъ сме́ртныхъ. Пс.106:19 И воззва́ша ко Го́споду, внегда́ скорбѣ́ти и́мъ, и от ну́ждъ и́хъ спасе́ я́: Пс.106:20 посла́ сло́во свое́, и изцѣли́ я́, и изба́ви я́ от растлѣ́нiй и́хъ. Пс.106:21 Да исповѣ́дятся {да исповѣ́дятъ} Го́сподеви ми́лости его́ и чудеса́ его́ сыново́мъ человѣ́ческимъ: Пс.106:22 и да пожру́тъ ему́ же́ртву хвалы́ и да возвѣстя́тъ дѣла́ его́ въ ра́дости. Пс.106:23 Сходя́щiи въ мо́ре въ корабле́хъ, творя́щiи дѣ́ланiя въ вода́хъ мно́гихъ, Пс.106:24 ті́и ви́дѣша дѣла́ Госпо́дня и чудеса́ его́ во глубинѣ́. Пс.106:25 Рече́, и ста́ ду́хъ бу́ренъ, и вознесо́шася во́лны его́: Пс.106:26 восхо́дятъ до небе́съ и низхо́дятъ до бе́зднъ: душа́ и́хъ въ злы́хъ та́яше: Пс.106:27 смято́шася, подвиго́шася я́ко пiя́ный, и вся́ му́дрость и́хъ поглощена́ бы́сть. Пс.106:28 И воззва́ша ко Го́споду, внегда́ скорбѣ́ти и́мъ, и от ну́ждъ и́хъ изведе́ я́: Пс.106:29 и повелѣ́ бу́ри, и ста́ въ тишину́, и умолко́ша во́лны его́. Пс.106:30 И возвесели́шася, я́ко умолко́ша, и наста́ви я́ въ приста́нище хотѣ́нiя своего́. Пс.106:31 Да исповѣ́дятся {да исповѣ́дятъ} Го́сподеви ми́лости его́ и чудеса́ его́ сыново́мъ человѣ́ческимъ: Пс.106:32 да вознесу́тъ его́ въ це́ркви людстѣ́й, и на сѣда́лищи ста́рецъ восхва́лятъ его́. Пс.106:33 Положи́лъ е́сть рѣ́ки въ пусты́ню и исхо́диша водна́я въ жа́жду, Пс.106:34 зе́млю плодоно́сную въ сла́ность, от зло́бы живу́щихъ на не́й. Пс.106:35 Положи́лъ е́сть пусты́ню во езе́ра водна́я и зе́млю безво́дную во исхо́дища водна́я. Пс.106:36 И насели́ та́мо а́лчущыя, и соста́виша гра́ды оби́телны: Пс.106:37 и насѣ́яша се́ла, и насади́ша виногра́ды, и сотвори́ша пло́дъ жи́тенъ. Пс.106:38 И благослови́ я́, и умно́жишася зѣло́: и скоты́ и́хъ не ума́ли. Пс.106:39 И ума́лишася и озло́бишася от ско́рби зо́лъ и болѣ́зни: Пс.106:40 излiя́ся уничиже́нiе на кня́зи и́хъ, и облазни́ {заблужда́ти сотвори́} я́ по непрохо́днѣй, а не по пути́. Пс.106:41 И помо́же убо́гу от нищеты́ и положи́ я́ко о́вцы оте́чествiя. Пс.106:42 У́зрятъ пра́вiи и возвеселя́тся, и вся́кое беззако́нiе загради́тъ уста́ своя́. Пс.106:43 Кто́ прему́дръ и сохрани́тъ сiя́? и уразумѣ́ютъ ми́лости Госпо́дни.