Псалтирь. Псалом 67. Протоиерей Олег Стеняев. Библия 

Пс.67:1 Въ коне́цъ, псало́мъ пѣ́сни Дави́ду. Пс.67:2 Да воскре́снетъ Бо́гъ, и расточа́тся врази́ его́, и да бѣжа́тъ от лица́ его́ ненави́дящiи его́. Пс.67:3 Я́ко изчеза́етъ ды́мъ, да изче́знутъ: я́ко та́етъ во́скъ от лица́ огня́, та́ко да поги́бнутъ грѣ́шницы от лица́ Бо́жiя: Пс.67:4 а пра́ведницы да возвеселя́тся, да возра́дуются предъ Бо́гомъ, да насладя́тся въ весе́лiи. Пс.67:5 Воспо́йте Бо́гу, по́йте и́мени его́: путесотвори́те возше́дшему на за́пады, Госпо́дь и́мя ему́: и ра́дуйтеся предъ ни́мъ. Пс.67:6 Да смяту́тся от лица́ его́, Отца́ си́рыхъ и судiи́ вдови́цъ: Бо́гъ въ мѣ́стѣ святѣ́мъ свое́мъ. Пс.67:7 Бо́гъ вселя́етъ единомы́сленныя въ до́мъ, изводя́ окова́нныя му́жествомъ, та́кожде преогорчева́ющыя живу́щыя во гробѣ́хъ. Пс.67:8 Бо́же, внегда́ исходи́ти тебѣ́ предъ людьми́ твои́ми, внегда́ мимоходи́ти тебѣ́ въ пусты́ни, Пс.67:9 земля́ потрясе́ся, и́бо небеса́ ка́нуша от лица́ Бо́га Сина́ина, от лица́ Бо́га Изра́илева. Пс.67:10 До́ждь во́ленъ отлучи́ши, Бо́же, достоя́нiю твоему́, и изнемо́же, ты́ же соверши́лъ еси́ е́. Пс.67:11 Живо́тная твоя́ живу́тъ на не́й: угото́валъ еси́ бла́гостiю твое́ю ни́щему, Бо́же. Пс.67:12 Госпо́дь да́стъ глаго́лъ благовѣству́ющымъ си́лою мно́гою: Пс.67:13 Ца́рь си́лъ возлю́бленнаго, красото́ю {ра́ди красоты́} до́му раздѣли́ти коры́сти. Пс.67:14 А́ще поспите́ посредѣ́ предѣ́лъ, крилѣ́ голуби́нѣ посре́бренѣ, и междора́мiя ея́ въ блеща́нiи зла́та: Пс.67:15 внегда́ ра́знствитъ небе́сный цари́ на не́й, оснѣжа́тся въ селмо́нѣ. Пс.67:16 Гора́ Бо́жiя, гора́ ту́чная, гора́ усыре́нная, гора́ ту́чная. Пс.67:17 Вску́ю непщу́ете, го́ры усыре́нныя? гора́, ю́же благоволи́ Бо́гъ жи́ти въ не́й: и́бо Госпо́дь всели́тся до конца́. Пс.67:18 Колесни́ца Бо́жiя тма́ми те́мъ, ты́сяща гобзу́ющихъ: Госпо́дь въ ни́хъ въ Сина́и во святѣ́мъ. Пс.67:19 Возше́лъ еси́ на высоту́, плѣни́лъ еси́ плѣ́нъ: прiя́лъ еси́ дая́нiя въ человѣ́цѣхъ, и́бо не покаря́ющыяся, е́же всели́тися. Пс.67:20 Госпо́дь Бо́гъ благослове́нъ, благослове́нъ Госпо́дь де́нь дне́: поспѣши́тъ на́мъ Бо́гъ спасе́нiй на́шихъ. Пс.67:21 Бо́гъ на́шъ Бо́гъ е́же спаса́ти: и Госпо́дня, Госпо́дня исхо́дища сме́ртная. Пс.67:22 Оба́че Бо́гъ сокруши́тъ главы́ враго́въ свои́хъ, ве́рхъ вла́съ преходя́щихъ въ прегрѣше́нiихъ свои́хъ. Пс.67:23 Рече́ Госпо́дь: от Васа́на обращу́, обращу́ во глубина́хъ морски́хъ: Пс.67:24 я́ко да омо́чится нога́ твоя́ въ кро́ви, язы́къ пе́съ твои́хъ от вра́гъ от него́. Пс.67:25 Ви́дѣна бы́ша ше́ствiя твоя́, Бо́же, ше́ствiя Бо́га моего́ Царя́, и́же во святѣ́мъ. Пс.67:26 Предвари́ша кня́зи бли́зъ пою́щихъ, посредѣ́ дѣ́въ тимпа́нницъ. Пс.67:27 Въ це́рквахъ благослови́те Бо́га, Го́спода от исто́чникъ Изра́илевыхъ. Пс.67:28 Та́мо Венiами́нъ юнѣ́йшiй во у́жасѣ, кня́зи Иу́довы влады́ки и́хъ, кня́зи Завуло́ни, кня́зи Нефѳали́мли. Пс.67:29 Заповѣ́ждь, Бо́же, си́лою твое́ю: укрѣпи́, Бо́же, сiе́, е́же содѣ́лалъ еси́ въ на́съ. Пс.67:30 От хра́ма твоего́ во Иерусали́мъ тебѣ́ принесу́тъ ца́рiе да́ры. Пс.67:31 Запрети́ звѣре́мъ тро́стнымъ: со́нмъ юне́цъ въ ю́ницахъ людски́хъ, е́же затвори́ти искуше́нныя сребро́мъ: расточи́ язы́ки хотя́щыя бра́немъ. Пс.67:32 Прiи́дутъ моли́твенницы от Еги́пта: еѳiо́пiа предвари́тъ ру́ку свою́ къ Бо́гу. Пс.67:33 Ца́рства земна́я, по́йте Бо́гу, воспо́йте Го́сподеви, Пс.67:34 возше́дшему на небо небесе́ на восто́ки: се́, да́стъ гла́су своему́ гла́съ си́лы. Пс.67:35 Дади́те сла́ву богови: на Изра́или велелѣ́пота его́, и си́ла его́ на о́блацѣхъ. Пс.67:36 Ди́венъ Бо́гъ во святы́хъ свои́хъ: Бо́гъ Изра́илевъ, то́й да́стъ си́лу и держа́ву лю́демъ свои́мъ. Благослове́нъ Бо́гъ.

Псалмопевец изображает потоки крови (врагов Божиих) и попираемых мертвецов, трупы которых остались брошенными в снедь псам (см. Ис. 63.3) Повествование показывает совершенное поражение врагов Церкви Христовой. /Феодорит/

В том_то и вся красота и сладость....!

Это вам так кажется. Отец Олег ничего лишнего не говорит.

Говорит так, чтобы можно было максимально легко понять.