Псалтирь. Псалом 78. Протоиерей Олег Стеняев. Библия 

Пс.78:0 Псало́мъ Аса́фу. Пс.78:1 Бо́же, прiидо́ша язы́цы въ достоя́нiе твое́, оскверни́ша хра́мъ святы́й тво́й, Пс.78:2 положи́ша Иерусали́мъ я́ко ово́щное храни́лище: положи́ша тру́пiя ра́бъ твои́хъ бра́шно пти́цамъ небе́снымъ, пло́ти преподо́бныхъ твои́хъ звѣре́мъ земны́мъ: Пс.78:3 пролiя́ша кро́вь и́хъ я́ко во́ду о́крестъ Иерусали́ма, и не бѣ́ погреба́яй. Пс.78:4 Бы́хомъ поноше́нiе сосѣ́домъ на́шымъ, подражне́нiе и поруга́нiе су́щымъ о́крестъ на́съ. Пс.78:5 Доко́лѣ, Го́споди, прогнѣ́ваешися до конца́? разжже́тся я́ко о́гнь рве́нiе твое́? Пс.78:6 Пролі́й гнѣ́въ тво́й на язы́ки незна́ющыя тебе́, и на ца́рствiя, я́же и́мене твоего́ не призва́ша: Пс.78:7 я́ко поядо́ша Иа́кова, и мѣ́сто его́ опустоши́ша. Пс.78:8 Не помяни́ на́шихъ беззако́нiй пе́рвыхъ: ско́ро да предваря́тъ ны́ щедро́ты твоя́, Го́споди, я́ко обнища́хомъ зѣло́. Пс.78:9 Помози́ на́мъ, Бо́же, спаси́телю на́шъ, сла́вы ра́ди и́мене твоего́: Го́споди, изба́ви ны́ и очи́сти грѣхи́ на́шя и́мене ра́ди твоего́. Пс.78:10 Да не когда́ реку́тъ язы́цы: гдѣ́ е́сть Бо́гъ и́хъ? и да увѣ́стся во язы́цѣхъ предъ очи́ма на́шима отмще́нiе кро́ве ра́бъ твои́хъ пролиты́я. Пс.78:11 Да вни́детъ предъ тя́ воздыха́нiе окова́нныхъ: по вели́чiю мы́шцы твоея́ снабди́ сы́ны умерщвле́нныхъ. Пс.78:12 Возда́ждь сосѣ́домъ на́шымъ седмери́цею въ нѣ́дро и́хъ поноше́нiе и́хъ, и́мже поноси́ша тя́, Го́споди. Пс.78:13 Мы́ же лю́дiе твои́ и о́вцы па́жити твоея́ исповѣ́мыся тебѣ́, Бо́же, во вѣ́къ, въ ро́дъ и ро́дъ возвѣсти́мъ хвалу́ твою́.