Академик Төрегелді Шарманов: Бүгінгінің талабына сай RU-vid желісінде «Тағамсаулық» каналын ашып, тағамтану, денсаулыққа қатысты ақыл-кеңестерімді қалың әлеуметке жеткізбекпін.
Бүгін мен Рамазан айында дұрыс тамақтанудың рөліне тоқталмақпын.
Мінекей, мұсылмандар үшін қасиетті Рамазан айы да жақындап қалды. Осы айда көптеген адамдар интеллектуалдық, рухани тұрғыдан, сондай-ақ физикалық жағынан да жан-жақты дамымақ.
Ауыз бекіткен жанның тамақтану режимі өзгеруіне қарай судың тепе-теңдігі мен тамақтану жиілігін сақтау маңызды.
Күн батқаннан кейін, сәресін есептемегенде, кем дегенде екі рет тамақ ішу ұсынылады. Сәресін ішу өте маңызды. Оны өткізіп жіберіп, күн шыққанға дейін тек су ішіп жүру денсаулыққа зиян.
Егер сәресін ішпей, 20 сағаттай аш жүрсеңіз, қандағы қант деңгейі ауызашарға дейін төмендеп, қатты шаршатады.
Егер керісінше, сәресінде артық тамақ ішсеңіз, ол ағзада май болып қалыптасып, артық салмақ жинайсыз. Сондықтан, сәресіне арналған асты үйлестіріліп ішу өте маңызды.
Келер күнге өзіңізді жақсы сезіну үшін сәресінде не жеуге болады?
Сәресінде қандағы қанттың тұрақтылығын қамтамасыз ету үшін ақуыздарды, күрделі көмірсулар мен майларды қабылдау қажет. Мысалы, сүт немесе айран, қантсыз йогурт, ірімшік, жұмыртқа, дәнді нан, шикі көкөністер немесе зәйтүн майы бар салат.
Күндізгі уақытта аштықты қатты сезінетіндер үшін сәресінде өсімдік ақуызы мен күрделі көмірсулардың көзі болып табылатын бұршақты тұтыну ұсынылады. Үрмебұршақ, ноқат, жасымық, булгурдан жасалған тағамдар қолайлы. Ақуыз - бұл ағзаның «құрылыс материалы» іспеттес, ал күрделі көмірсулар қуат береді. Сәресінде ас қорытуға ауыр болатын майлы, тұзды, ұн тағамдарынан аулақ болу ұсынылады.
23 авг 2024