Өлүп бара жаткан жан дүйнөнү тирилткен бири гана жакшы сөз. Тирүүлөрдүн өлүгү болгончо, Өлгөндөрдүн тирүүсү бол… Жаңы ырымды сиздин назарыңызга тартуулайм. Толук текст ⬇️
ТИРИЛҮҮ
Жүрсө болду куу кекиртек майланып…
Көздөр тойбойт берсең дагы айды алып.
Адамдыкты көмүп салып жүрөбүз,
Тирүүлөрдүн өлүгүнө айланып!
Чыга албай чыр дүйнөнүн ичинен,
Напсиң сүйлөп кайтпай келет күчүнөн.
Жалганга да, чындыкка да баары бир,
Көбөйүүдө өлгөн жандар ичинен.
Кыйкым издеп, катасын таап башканын,
Жашап жүргөн аркасында “масканын”.
Өзүн бузуп, өзгөнү да куруткан,
Өлүк коомдон өзүңдү-өзүң сактагын!
Таппачудай курсак үчүн жарты нан…
Топ тыйындын тоголондук артынан.
Жалган наамга саткан арын-абийирин,
Жийиркеничтүү атактуулар тантыган.
Эске салып опулдаган “болушту”,
Костюм кийип, катуу салып добушту,
Акылмандар кеп салышкан ордого,
Акыл айткан акылсыздар толушту.
Көргөн сайын каңырыгым түтөмөй,
Кеп түшүнбөйт айтсаң кыйыр, тикелей,
Кошоматчы - жети жүздүү, ушакчы,
Кирип алган жан дүйнөңө митедей.
Өзүнүкүн бербейт какшап, өлсө да,
Таштай каткан бүт чындыкты көрсө да.
Акыретти жомок деген жандар бар,
Сабак албай бирин-бири көмсө да.
Жан дүйнөнү баратабыз жаралап,
Жашообузду бүтүн койдук паралап.
Алты саны аман туруп - кайырчы,
Толуп жүрөт көчөлөрдү аралап.
Жылтыр-жултур калбайт жерди байралып,
Жалп өчөбүз мокоп кээде кайралып.
Асыл жандар арабыздан кетүүдө,
Өлгөндөрдүн тирүүсүнө айланып…
Тирүүлүктө келбейт сенден түңүлгүм…
Ырым жетсе, сен тирүүсүң, сүйүнгүн.
Аз өмүрдө абийириңди өлтүрбөй,
Адам болгун!
Бүгүн!
Азыр!
ТИРИЛГИН!!!
Акбар Кубанычбеков
20 авг 2024
