Адам ата мен Хауа ана пейіште тыйым салынған жемісті жеп Алла алдында күнәлі болады. Тәңірі тағала қаһарланып, оларды пейіштен қуады. Періштелерге:
- Жәннаттың киімдерін шешіп алып, екеуін жерге тастаңдар! - деп бұйырады. Бұл сөзді естіп, екеуі қашады. Періштелер әдеп сақтап, оларды ұстап алуға батпайды. Сол кезде жиде ағашы бұтағымен Адам атаны бас салады. Қарсыласқанына қарамай, бұтақтарымен бар киімін сыпырады. Жиде ағашының өрескел әрекетін көріп періштелер тосылып қалады. Ағаш:
- Алланың әмірі бәрінен де жоғары, - дейді.
Сол кезде жалаңаш қалған екеуіне жаны ашыған інжір ағашы бұтағынан сегіз жапырақ жұлып беріпті. Себебі оның белінде Мұхамбет пайғамбардың нұры бар еді. Адам ата үш жапырақтан киім тігіп, әуретті жерін жасырыпты. Хауа ана бес жапырақпен ұятты жерін түгел жабады. Содан бастап, әйелдерге ұятты жерін жауып жүру уәжіп болыпты. Осыған орай, күні бүгінге дейін, марқұм болған ер адамды үш қабат етіп кебіндесе, әйел адамның ұятты жерін жабу үшін, бес қабат кебін жөнелту парыз болыпты .
Ал жұмақта өсіп тұрған Арша ағашы оларға пана беріп, саясына отыруға рұқсат етеді.
Сол сәтте Алладан әуез келеді:
- Ей, жиде, Менің әмірімді орындағаның жақсы. Бірақ, менің орынбасарыма қаталдық көрсеттің. Мұншалықты дөрекі болмасаң етті. Осы дөрекілігің үшін сені де жазалаймын. Бұдан былай пейіште емес, жерде мекен етесің. Адам баласы сені арнайы екпейді. Судан жырақта өсіп-өнесің. Денеңді тікен қаптап, ағашың қатты болады, - дейді. Содан бері жиде судан жырақ жерде өсетін болыпты. Адамдар оны арнайы екпейді екен. Жиде гүлі бұрын пейіште өскендіктен гүлі ерекше жұпарлы болады екен.
Ал, інжір ағашына:
- Әй, інжір! Менің орынбасарымды құрметтеп, жапырақ бердің. Оларға мейірім көрсетіп, мәрттік таныттың. Сол үшін Мен де саған құт-береке һәм кие дарытамын. Адам ұрпағының ризығы боласың. Кімде-кім ауырса, сенің жемісіңді жеп, шипа тапсын. Нәрлі сөліңді ішіп рақаттансын. Сенен басқа жеміс-жидектердің біреуінің іші, ал біреуінің сырты ғана жеуге жарамды болады. Сенің ішің де, сыртқы қабығың да адамға азық болсын, - дейді. Содан бері інжір ағашы адам сүйсініп жейтін құнарлы жеміске айналады.
Арша ағашына:
- Сен менің халифама көмектестің. Жаныңнан пана бердің. Сол үшін саған жұпар иіс бітіремін. Жапырағыңа кие дарытамын, - депті. Аршаны тұтатқанда керемет иіс шығатыны Құдай берген осы қасиетінен екен. Жапырағына кие дарығандықтан, онымен үйдің іші мен бос бесікті аластап, жын-перінің әсерін жояды екен.
Салт-дәстүр сөйлейді кітабынан
5 сен 2024
