Қара металл сынықтарын шетелдерге шығаруға үкімет деңгейінде тыйым салынса дейміз. Премьер-Министрдің бірінші орынбасары Асқар Маминге Қостанай облысының әкімі Архимед Мұхамбетов осындай ұсыныс айтты.
Бұл - 2,5 жыл бұрын ғана іске қосылған, темір арматуралар шығаратын зауыт. Қазақстан-Ресей бірлескен кәсіпорыны былтыр 280 мың тонна өнім өндірді. Құрылысқа қажетті түрлі қалыңдықтағы темір арматуралар Өзбекстан, Қырғызстан, Тәжікстан сияқты Орта Азия елдеріне экспортталады. Биыл алғаш рет 25 мың тоннасы Ресейге де жіберілді. Қостанайлық зауыттың өнімі жоғары сапалы. Арнайы лабораторияда ол ұдайы тексеріліп отырады.
Зибагүл Әбдікова, сапаны бақылау қызметінің басшысы
-Осы сынақ машинасында металдың төзімділігі, беріктігі, сапасы тексеріледі. Ал барлық мәліметтер осы компьютерде графика арқылы көрсетіледі.
Арматура жасауға қажетті сом темірлерді зауыт Ресейдің Новокузнецк қаласынан алдыртады. Жолдың алыстығы, валюта бағамының жиі құбылуы кері әсерін тигізбей қоймайды.
Николай Краснощёков, арматура зауытының инженері
-Егер шикізат Қазақстаннан шығып жатса, әрние біздің өнімнің өзіндік құны да арзан болар еді. Бұл бағытта үкіметтің қолдауы да қажет сияқты.
Мамандардың айтпағы металл сынықтарын сыртқа сатпай, өзімізде қайта өңдесе, әлдеқайда тиімді болар еді. Премьер-минстрдің 1-ші орынбасары Асқар Маминге осындай ұсыныс айтылды.
Архимед Мұхамбетов, Қостанай облысының әкімі
-Металл сынықтарын елден экспорттауға толық тыйым салуды сұраймыз. Бұл мәселе Павлодар, Қостанай, Ақтөбе сияқты бірнеше өңірлерге қатысты.
Мағауия Қалиев, тілші
-Қазір әлемдік нарықта металл бағасы шарықтап тұр. Мысалы, мынадай металл сынықтарының тоннасы Қазақстанда 10 мың теңге тұратын болса, Ресейде одан 4 есе қымбат. Қытайда тіптен жоғары. Сондықтан металл қабылдаушылар ондай металл қалдықтарын шетел асыруға тырысады.
Еліміз бойынша жылына 4,5-5 млн тоннаға дейін металл қалдықтары жиналады екен. «Егер Үкімет тарапынан шетелге сатуға тыйым салынса, отандық металлургияның мүмкіндігі кеңейе түсер еді», - дейді сала мамандары.
Авторлары: Мағауия Қалиев, Сергей Трахтенберг
7 сен 2024
