ҰЛТТЫҚ ДОМБЫРА КҮНІ ҚҰТТЫ БОЛСЫН!
30 маусым күні мәдениет және тілдерді дамыту бөлімінің ұйымдастыруымен "Ұлттық Домбыра күні" мерекесі мен Құрманғазы Сағырбайұлының шығармашылығына арналған "Күй құдіреті -Құрманғазы" тақырыбында лекция-концерт өтті. Аудандық орталық кітапханасында болған шарада "Күй атасы-Құрманғазы" атты тақырыптық сөре қойылып, атақты күйші туралы деректі фильм көрсетілді.
Лекция-концертті жүргізген Елшат Қайратұлы әйгілі күйшінің өмір жолы мен шығармашылығы және шарада орындалған әр күйдің шығу тарихы туралы баяндап отырды. Іс-шараға Үржар аудандық мәдениент үйінің "Көңіл толқыны" халық аспаптар оркестрінің домбырашылары белсене қатысты. Құрманғазының "Балбырауын" және "Сарыарқа" күйлерін домбырашылар ансамблі орындап, "Алатау" күйін Дәулет Баутинов, "Төремұрат", "Саранжап" күйлерін Гүлназ Рамазанова, "Адай" және "Қызыл қайың серпер" күйлерін Елшат Қайратұлы шебер орындап берді.
Лекция-концертке жиналған өнерсүйер қауым күй атасы Құрманғазы Сағырбайұлының асыл мұрасымен танысып, мол мағлұмат алып қайтты.
3 июл 2023
