أمريكا تتعرض لخيانة أهم حلفاءها 

الفترة اللى فاتت.. حصلت خناقة جامده جدا بين مسؤولين فى وزارة الخارجية الأمريكية.. ومسؤولين تانيين فى وزارة الخارجية الاسرائيلية.. خير يا جماعه؟.. اتضح ان اسرائيل بتتعاون مع الصين فى مجال التكنولوجيا العسكرية.. وحاجه تانيه مهمه اسمها الابتكارات الناشئة..
سيدى المواطن لو مش مدرك اللى سمعته فخلينى أقولك بالبلدى كده ان أمريكا واسرائيل بيصنعوا سلاح مع بعض.. وخصوصا الذكاء الاصطناعى اللى بيستخدموه فى أنظمة تشغيل السلاح زى الطيارات المقاتلة والسفن الحربية وغيرها.. إضافة إلى اشتراكهم برده فى تصنيع الطيارات الدرونز اللى هى بدون طيار..
فاللى بيحصل دلوقتى ان الصين اللى عماله تستفز فى أمريكا هناك فى المحيط الهادى.. هى هى الصين اللى سابت أمريكا مشغوله بالمناورات العسكرية هناك.. ولفت راحت لاسرائيل علشان يتعاونوا مع بعض فى مجال التكنولوجيا العسكرية.. التكنولوجيا العسكرية اللى شغاله عليها اسرائيل مع أمريكا.. يعنى الصين لو امتلكت التكنولوجيا العسكرية دى تبقى امتلكت نفس التكنولوجيا العسكرية اللى أمريكا بتطورها.. يعنى لو قامت حرب الصبح بين أمريكا والصين.. الصين هتبقى عارفه سلاح أمريكا شكله ايه وازاى تنفذ ضربات استباقية لتدميره..
وياريتها جت على اد كده.. حضرتك تقولى ثوانى بس قبل ما تكمل.. هى مش الصين خلصت مناوراتها عند تايوان والأمور بدأت تهدا.. ولا حصلت حاجه جديدة اليومين اللى فاتو ؟.. وايه علاقة تصريح الرئيس السيسي بخصوص الصين وتايوان اللى قال فيه ان مصر بتدعم مبدأ الصين الموحدة؟.. هقولك سيدى المواطن.. هقولك..
فى حلقة مصر وحرب تايوان - للى اتفرج عليها من حضراتكم - قولتلكم إن الصين لو اتغابت وقررت انها تدخل فى حرب جديدة مع أمريكا فى المحيط الهادى.. بجانب الحرب اللى بتخوضها روسيا فى أوكرانيا.. فحال أى مواطن بلده مش بتنتج احتياجاتها بنفسها هيكون حاله زى الراجل الطيب ده..
فحال أى مواطن بلده مش بتنتج احتياجاتها بنفسها هيعيش أيام صعبه..
والنهاردة اسمحلى أقولك ان غالبا الصين هتعملها وهتتغابى.. ليه؟.. هقولك.. فى دولة اسمها جزر سليمان موجودة فى جنوب المحيط الهادى.. أيوه يعنى فين بالظبط جنوب المحيط الهادى؟.. جنب استراليا سيدى المواطن.. جنب استراليا.. ده علمها.. وده شعارها.. وده مكانها على كوكب الأرض.. الدولة دى.. أو مجموعة الجزر دى.. عدد سكانها ميكملش مليون نسمه.. لكن فيها مشاكل كتير..
أهمها محاولة الشعب المستمرة للثورة على النظام.. ظروف العيشه صعبه والناس مش مرتاحين.. فكل شوية يحاولوا يقوموا ضد النظام بثورة.. حضرتك تقولى طيب وبعدين؟.. هقولك.. النظام فى دولة جزر سليمان دى لما تعب من المظاهرات راح لأقرب جيرانه.. استراليا.. الحقينى يا استراليا.. فاستراليا تدخلت فعلا وعملوا مع بعض اتفاقية أمنية وبعتت قوات علشان تحافظ على استقرار البلد.. أو بمعنى أصح علشان تحمى النظام الحاكم من مظاهرات الناس.. لكن بعد شوية وقت الحكومة الاسترالية بدأت تتدخل فى نظام حكم جزر سليمان.. انت كده وضعك مش ديمقراطى.. انت كده بتظلم الناس.. انت كده عندك شبهات فساد.. فالنظام الحاكم فى جزر سليمان قالك مش ناقصه وجع دماغ.. وقام طالع على مين سيدى المواطن؟.. على الصين.. يا صين.. مش انتى بتتخانقى مع أمريكا؟.. واستراليا وأمريكا عاملين اتفاقية أمنية ضدك اسمها أوكوس.. وأمريكا هتدى استراليا غواصات نووية علشان تطوقك فى المحيط الهادى؟.. فالصين قالتلها مظبوط.. خير عايزه ايه؟.. جزر سليمان قالتلها أنا هعمل معاكى الصح..
أنا هعمل معاكى اتفاقية أمنية تسمحلك تبنى على أرضى قواعد عسكرية.. ومش بس كده.. ده احنا هنسمحلك تبعتى السفن الحربية بتاعتك لشواطئنا علشان تعيد تسليحها.. مش بس كده.. ده احنا هنسمحلك تستخدمى أراضينا كمنصات صواريخ.. وبكده بعد ما كانت استراليا هى اللى هتطوقك فى المحيط الهادى.. انتى اللى هتطوقيها جوه أرضها.. عاوزه حاجه تانيه يا صين؟.. قالتلها ده كده فل أوى.. تشكرى.. فجزر سليمان قالتلها كل اللى محتاجاه منك انك تبعتى قوات تحفظ لنا استقرار البلد وتحمى النظام من المظاهرات.. فالصين قالتلها بس كده.. ده انتى تؤمرى.. أنا محبش فى حياتى غير حفظ الأمن والاستقرار..
هل تكتفى الصين بكده؟.. الإجابة طبعا لأ.. الصين راحت على مكان فى جنوب المحيط الهادئ برده اسمه جمهورية كيريباتى.. ودى برده مجموعة جزر.. هيعملوا معاها ايه جمهورية كيريباتى دى؟.. هيعملوا عندهم قواعد جوية.. سلاح الطيران الصينى هيتمركز هناك.. وبالتالى استراليا اللى كانت فى حالها لحد ما قررت انها تدخل فى تحالف أمنى مع أمريكا.. النهاردة الصين حطتها فى دماغها وبتحاصرها بالقوات الجوية والبحرية..
حضرتك تقولى طيب يا أبوحميد هو وجود القوات الجوية والبحرية الصينية حوالين استراليا خطر يعنى؟.. أقولك تخيل انت معايا نفس المناورات الحربية اللى نفذتها الصين فى مضيق تايوان.. بتتنفذ هناك على سواحل استراليا.. استراليا اللى اشترت غواصات نووية مخصوص علشان تحارب بيها الصين.. فى نفس الوقت اللى فيه حاملات طائرات أمريكية موجودة فى وسطهم.. كل القوات دى موجودة دلوقتى فى المحيط الهادى مستنيين أى حد غبى يضرب طلقة واحده.. طلقة واحده سيدى المواطن كفيله بإن المحيط الهادى يتعصب.. تخيلت؟.. اتخيل تانى.. خفت؟.. كفايه كده..
من المصادر
bit.ly/3SQb0j9
bit.ly/3A0dbb5
bit.ly/3SREQUf
on.wsj.com/3AnchXL
bit.ly/3bPOPZX
#المواطن_ سعيد #الصين_تايوان