ادراك المشكلة هو نص الحل "التخلص من الشخصية الاعتمادية ٣ " 

الاعتمادية (٣)
عايزين نتفق ان ادراك المشكلة هو نص الحل ،عشان كدة الكتاب بادئ بانه يشرح لك نفسك ومشاكلها عشان لما تفهميها تعرفي انتي محتاجة تغيري ايه فيها فمتجيش تقولي لي انتي بتقولي لي المشكلة ومش بتقولي الحل ،لا الحل في انك تفهمي المشكلة وتفهمي نفسك ومع نهاية السلسلة حتكوني وصلتي معايا للحل وحليتي المشكلة كمان ان شاء الله
تاني مشكلة عند الشخصية الاعتمادية هي انها متفاعلة بزيادة مع الاخرين ودايما هي رد فعل لهم ولمشاكلهم ولمشاعرهم في حين ان انتي نفسك لو عندك مشكلة كبيرة بتفضلي تروحي للانكار يا اما تنكري المشكلة يا اما تنكري نفسك ، يعني ايه تنكري نفسك؟ يعني تنكري مشاعرك وحدسك وافكارك وبالتالي تنكري وجود المشكلة أصلا وتتهمي نفسك انك حساسة وخلافه ، دا غير انك في تفاعلاتك مع الناس اللي حواليكي ومع مشاكلهم بتكوني غالبا اندفاعية بشكل يؤذيكي انتي شخصيا طبعا بتندفعي تساعدي بدون تفكير ومن غير ماتفكري حتقدري تساعدي أصلا ولا ، زي مثلا حالة حماتها تعبت وبالرغم من انها لها بنات ممكن يخدموها الا ان الحالة سابت بيتها وأولادها عندهم امتحانات وراحد قعدت بحامتها تخدمها وهي عندها خشونة في ركبتها وعندها ديسك ومع ذلك شالت حماتها شيل وطبعا محدش ساعدها وفي النهاية اتكسحت ومبقتش قادرة تخدم أولادها بسبب الديسك والركبة والاتنين ملهمش حل ، حلو اوي ان ثوابها عند ربنا ولوجه الله وكل دة مش معترضين عليه لكن لاتلقوا بايديكم الى التهلكة ، ماينفعش تؤذي نفسك وحتتسئلي عن جسدك قبل ماحتتسئلي عن حماتك طالما عندها بنات يخدموها وانتي خدمتها حتؤذيكي ، المهم انا بضرب لك مثل عن الاندفاعية في التفاعل مع مشاكل الاخرين ، والاسوأ من كدة ان المقابل بيكون عدم احترام لكي سواء من جوزك او من اهله لو كانوا نرجسيين فانتي تفقدي نفسك اكتر وتكرهيها اكتر وتبعدي عنها اكتر وتهيني فيها اكتر
طيب كمان تفاعلك مع مشاعر الاخرين بيخليهم يتحكموا في مشاعرك انتي ،ازاي ؟ انتي لمما تكوني بتتأثري وتتفاعلي مع مشاعر الاخرين اللي هو انتي لما تلاقي حد زعلان تزعلي وماترتاحيش غير لما تخليه مبسوط وماتقدريش تتواجدي في مكان فيه حد متضايق لانك أصلا بتخافي من المشاعر السلبية كل دة بيخليكي سهل جدا التحكم في مشاعرك يعني النرجسي في حالتك كدة يقدر يلعب بيكي تمام يقدر يتحكم امتى تكوني مبسوطة وامتى تكوني حزينة وزعلانه يعني بالبلدي كدة يبسطك وقت مايحب ويضايقك وقت مايحب ودي أسوأ أنواع السيطرة والتحكم اللي ممكن تسبب للبني ادم الجنون ودة اللي بيتعمل فيكي طول الوقت من النرجسي ، لازم تنتبهي لمشاعرك ولتفكيرك وتشوفي مين اللي بيتحكم فيهم انتي ولا النرجسي ولو اكتشفتي انه النرجسي يبقى لازم تبدأي تفصلي مشاعرك عنه زعلان يتفلق مشكلته غضبان وبيعمل مشاكل افصلي نفسك عن مشاكله وعن همومه لان كلها كدب وكلها نتيجة عمله فخرجي نفسك برة حياته ومشاعره ومشاكله ودة لازمه علاج الإدمان طبعا
كمان حاجة انتي كإعتمادية بتتفاعلي فيها غلط انك بتتفاعلي مع المشاكل الصغيرة زي الكبيرة يعني من كتر ماانتي عيشتي الكوارث أصبحت استجابتك لاي مشكلة على انها كارثة لانك متعودة على التفاعل مع الكوارث واحيانا بتتخيلي ان أي مشكلة تقابلك هي نهاية العالم ، شوفي كدة لما النرجسي بيزعل منك او يشتغلك اول حاجة بتخافي منها ايه ؟ انه يطلقك وهو ممكن أصلا ميكونش بيفكر في الطلاق نهائي لكن انتي اللي تفكيرك بيروح للفكرة دي يسرعة مهما كان الموقف تافه ودة لانك اتعودتي على مواجهة الكوارث فمبقتيش تعرفي تظبطي ردود افعالك على اد الموقف.
من ضمن تفاعلاتك مع اللي حواليكي ان لو حد انتيب تحبيه عمل حاجة غلط انتيب تحسي بالحرج كأن انتي اللي عملتي الغلط ولو حد أتكلم عنه ادامك بتدافعي عنه كأنك بتدافعي عن نفسك وتلاقي نفسك بتقولي له انا بزعل لما حد يتكلم عنك كلام مش حلو ،بالرغم من انه غلطان ويستحق يتقال عليه كلام وحش الا انك بتنزعجي جدا وبتكوني عايزة اللي بتحبيه دة يكون شبه مثالي ودة بيكون غالبا مع اولادك او اخواتك الأصغر منك وطبعا النرجسي قبل ماتكتشفيه .والحكاية دي بتعمل عبء رهيب عليك يلانك ماشية تقومي طول الوقت ومع اولادك بتعمل عبء عليهم هم وبتبعدهم عنك ، المفروض تسيبي كل واحد يتحمل مسئولية اخطاؤه ويشوف عواقب افعاله عشان يتعلم ويصبح سوي .
تفاعلك مع الرفض بيوصلك انك تبعدي عن الناس لانك اقل تصرف ولو كان عادي من أي حد زي مثلا تأجيل موعد او فسحة او طلبتي تزوري حد وقال لك مش حكون في البيت يعني كل دي حاجات عادية لكن انتيب تعتبريها رفض وعدم قبول لكي ودة بيخليكي تبدأي تتجنبي الناس وتنعزلي عنهم
تمرين النهاردة :
١- اتعلمي تقفشي نفسك وانتيب تنفعلي وتتفاعلي مع مشاعر مش بتاعتك
٢- اتعلمي تقفشي نفسك وانتي رايحة تشيلي مسئولية مش بتاعتك
٣- اتعلمي تقفشي نفسك وانتيب تتفاعلي مع غلط حد انتيب تحبيه على انه غلطتك انتي
٤- لما تقفشي نفسك بتتفاعلي مع مشكلة حد ادي نفسك فرصة تفكري قبل ماتندفعي وادي نفسك فرصة تشوفي انتي نفسك محتاجة رعاية وعناية أولى من الاخر اللي عنده الف من يراعيه ويعتني بيه فانتي أولى انك تراعي نفسك وتعتني بيها