النرجسي قضى على هويتك واصبح هو اللي جواكي مش انتي اللي جواكي دلوقتي مسخ من النرجسي ،ازاي الكلام دة ؟وازاي تسترجعي نفسك تاني وتخرجي النرجسي من كيانك ؟
خطوتين مهمين لازم تعمليهم قبل ماتبدأي التشافي عشان تسترجعي نفسك
١- اول خطوة انك تتقبلي ان انتي بقيتي النرجسي مابقيتيش انتي
لازم تفهمي وضعك مع النرجسي كويس عشان تقدري تتخلصي من النرجسي تماما من غير مايتبقى معاكي حاجة من صفاته ولا تصرفاته
أولا النرجسي اول مابيدخل حياتك بيعمل لك حاجة زي غسيل المخ ، اللي بيحصل انه بيعمل لافبموبينج اللي بيه بيصورك لنفسك حد مثالي وحد مفيش زيه في العالم وعشان كدة هو ماصدق لقاكي وانه حبك عشان انتي حد عظيم واو ا وا وطبعا أي حد حيسمع حد بيمجده كدة حيصدقه وحيفرح بالحب الغير مشروط اللي بيقدمه النرجسي (كذبا وخداعا ) اللي بيحصل ان النرجسي بيديكي اللي هو عايزك تديهوله بعدين مش بيقول لك الانسان الغبي هو اللي بيهادي الناس بالحاجة اللي بيحبها . المهم النرجسي باللافبومبينج بيفتح لنفسه الطريق جواكي عشان يبدأ يفرغك من جوا يبدأ يغير مفاهيمك ونظرتك للحياة يفضيها تماما ويستبدلها بمفاهيمه هو ونظرته هو للحياة سواء كانت أفكاره صحيحة او غلط المهم انه بيزرعها جواكي اثناء اللافبومبينج من غير ماتحسي زي مثلا أفكار دينية زي حقوق الزوج وواجبات الزوجة ومفيش حقوق الزوجة او اجتماعية زي ماينفعش نعيش لوحدنا لازم بيت العيلة او الزوجة تبع اهل جوزها وخلاص تنسى بقى بيت بابا والكلام دة انتي بقيتي مسئولة عن بيت او حتى رومانسية زي العلاقة الحميمة هي التعبير الوحيد عن الحب ،وهكذا كل الأفكار اللي جواه بيبدأ يزرعها جواكي وبالتالي بتبدأ شخصيتك تختفي مع الوقت وتظهر شخصية تانية مش انتي وخصوصا بعد الدخول في مرحلة التحقير واللي بيتزرع فيها كل الصفات السلبية عنك اللي هي انتي عارفة انك مش ذكية كفاية انتي عارفة ان كل قرارتك غلط ،انتي احسن لك ولنا انك ماتفكريش أصلا ،انتي مابتعرفيش تتكلمي ولا بتعرفي تتصرفي ، انتي ضعيفة وملكيش حدود وصاحبتك بتستغلك ولازم تحطي لها حدود ، كل دة بعد ماوصلك انك تثقي فيه بتصدقيه وتقتنعي انك كدة وتتبني أفكاره وتصبحي نسخة منه وطالما تبنيتي أفكاره يبقى حتنفذي كل اللي هو عايزه منك لدرجة انك تعملي حاجات عمرك ماكنتي تتخيلي انك ممكن تعمليها ولا تقبلي أصلا تعمليها ، كل دة معناه ان النرجسي احتل عقلك وحولك فعلا لحد تاني غيرك مش انتي ودي اول حاجة لازم تفهميها وتتقبلي حدوثها عشان تقدري تتغلبي عليها وتغيريها اثناء العلاج لكن اذا حاولتي تتعالجي وانتي لسة جواكي النرجسي عمرك ماحتقدري تتقدمي فلازم تخرجي النرجسي من عقلك
٢- تاني خطوة انك تتخلصي من النرجسي اللي اصبح جواكي
دلوقتي نتيجة اللي قلناه دة اصبح النرجسي هو صوتك وانتي صوتك الأصيل الحقيقي وافكارك ونفسك اتلغى اصبحتي زي ماقلنا بتتبني أفكاره واصبح الصوت الداخلي بتاعك هو صوته اصبحتي بتنتقدي نفسك بنفس طريقته واصبحتي بتبرري تصرفاته بنفس كلامه اصبح هو اللي بيتكلم جواكي لانه أصلا سكتك من اول يوم ومنعك تتكلمي ولا تقولي رأيك وعلمك ان سلامتك في انك تقولي كلامه هو ،كل دة وانتي مش دريانة كل دة قبل ماتعرفي انه نرجسي ، فانتي اللي لازم تعمليه دلوقتي انك تسكتي صوته اللي جواكي دة وتبدليه بصوتك الأصيل اللي كان قبل ماتعرفيه ،طيب ازاي حنعمل دة ،لما تلاقي نفسك بتقولي لنفسك انتي غبية انتي فاشلة انتي مابتعرفيش تعملي حاجة ماتقدريش تنجحي في حاجة انتي ضعيفة انتي ام سيئة انتي مش حتقدري تعيشي من غيره انتي مش حتقدري على مسئولية اولادك انتي مش حتقدري تحطي حدودك معاه لانك خايفة منه لما تقولي الكلام دة لنفسك اعرفي ان دة مش انتي دة النرجسي اللي بيتكلم دي أفكاره اللي زرعها فيكي، لما تسمعيها كدبيها وانكريها وعشان تنهيها لازم نستبدلها بكلامك انتي لازم صوتك الأصلي يطلع عشان يوقف صوته ، طيب فين صوتك الأصيل حنرجعه ازاي؟
افتكري نفسك قبل ماتعرفي النرجسي افتكري الحاجات اللي كنتي بتحبيها افتكري افكارك وكلامك ولو كانت أفكار تافهة وكلام طفولي مش مهم مدى أهمية الأفكار اللي كانت عندك المهم انك ترجعيها عشان تسمعي صوت نفسك عشان تحيي نفسك الحقيقية اللي موتها النرجسي وحط نفسه وافكاره مكانها ،ارجعي لذكرياتك القديمة وهواياتك والاغاني اللي كنتي بتسمعيها وزوري الأماكن اللي كنتي بتعيشي فيها وبتحسي بنفسك وكيانك فيها وابدأي اسمعي صوتك وطبعا في الوقت دة حيظهر صوت النرجسي من جواكي ينتقدك ويقول لك ايه التفاهة دي انتي كبرتي انتيب تتصرفي تصرفات شباب وانتي فوق الأربعين او فوق الخمسين ولو كنتي فوق الثلاثين برضه حيقول لك كدة ، حيقول لك كدة من جواكي حالات كتير بتقول انا كبرت انا عندي ٣٥ او٣٧ او ٤٠ سنة دة مش كلامها لان الانثى السوية عمرها مابتحس بالعجز بتفضل شايفة نفسها جميلة وقوية طول ماهي عايشة فدة فكر النرجسي المزروع جواكي واللي لازم ماتسمعيهوش هو حيحاول يثنيكي عن انك تخرجي صوتك فحتلاقي أفكاره اللي جواكي توجهك للتفكير في أيامه الحلوة وتبدأي تلتمسي له اعذار وتفكري ترجعي له كل دة لازم تقاوميه وتفهمي ان دة صوت النرجسي مش صوتك ابدا
بالتدريج حيختفي صوت النرجسي لو انتي اصريتي انك تخفيه ويظهر صوتك
5 май 2022
