ازاي تكوني الطرف المسيطر في العلاقة مع النرجسي ..التشافي (١٤) .. كوثر سند 

ازاي تتغيري وتتحولي لشخص مستقل واثق من نفسه وتصلحي ما افسده النرجسي
(١) خرجي نفسك برة المنافسة مع النرجسي
من ضمن مميزاتك عند النرجسي انه طول الوقت عايش معاكي في منافسة بيكسبها طول الوقت وبيشبع رغبته المريضة في التميز والتفوق على حسابك ليه ؟ لان هو اصلا شايفك احسن منه مهما كان غني ومركز اجتماعي ومهما كان نجاحاته لانه عارف انه نفسه الحقيقية ضايعة وناقصها حاجات كتير وطبعا شايفها عندك ومش قادر ياخدها منك فطول الوقت حاسس بالنقص داخليا فبيدخل دايما في المنافسة عشان يكسب ويحسس نفسه انه متفوق عليكي في حاجات تانية فيرضي نفسه ، ودة سبب من الاسباب اللي بتخليه طول الوقت عايز يحطم فيكي وفي شخصيتك ، وفي نفس الوقت لو وقفتي تنافسيه او بطلتي تحاولي تثبتي له انك كويسة مش حيسكت حيفضل يستفزك عشان يدخلك في المنافسة تاني ولو حبيتي تسبيتيه برضه مش حيسيبك بسهولة لانه مش عايزك تخرجي برة اللعبة والا حينافس مين ويكون ضامن انه حيكسبه طبعا بالالاعيب بتاعته .ولو حصل وقدرتي تسيبيه حيفضل يوصل لك بكل الطرق انه سعيد في حياته من غيرك وانه اخد اللي احسن منك واللي حتعوضه عن العذاب اللي انتي عذبتيهوله كل دة كذب وبيوصله لكي عشان يحس انه اخيرا كسب ، انتي بقى اخرجي برة اللعبة ولا تهتمي ولا تتابعي اخباره ولو قدرتي توصلي له انك متعرفيش عنه اي حاجة تبقى عملتي اكتر حاجة ممكن تحبطه وتكئبه لانك حتخليه يحس بالفشل والعجز عن الكسب
(٢) انتي بس اللي من حقك تحكمي على نفسك
طول حياتك مع النرجسي بتكوني متعودة انه يحكم عليكي ويسمح لك اوميسمحلكيش تقولي ايه او تحسي بإيه وتحتاجي ايه ، اظن دلوقتي بقى بعد ما فهمتيه مفروض انك متسمعيش رأيه في اي شيء من الكلام دة ولا تركزي اصلا معاه مهما قال ومهما حكم على رأيك وعلى مشاعرك واحتياجاتك ، هو اصلا رأيه اما مشوه بسبب ان نظرته للعالم ولكي نظرة مختلة ومنحرفة زي ماقلنا قبل كدة ، او انه رأية دة بيفصله علي حسب مصلحته واحتياجاته ، كمان متهتميش هو بيقول عليكي ايه لانه لو حيتكلم عنك مع اهلك واصحابك والناس القريبين منك وبيحبوكي وعارفينك وفاهمينك كويس فهم حيدافعوا عنك اما اذا اتكلم عنك مع حد ميعرفكيش فانتي لازم تكوني اذكى منه ازاي؟ انتي متتكلميش عنه وتدافعي عن نفسك بانك تشتكي لهم منه لا انتي تعرفيهم بنفسك وتتكلمي عن نفسك من باب الوصف والشرح والايضاح لانهم ميعرفوكيش ومحتاجين يعرفوكي اكتر فلما حيعرفوكي وخصوصا بتصرفاتك وطبيعتك اكتر من كلامك حيفهموا لوحدهم انه مريض ومش طبيعي واللي ميفهمش ميلزمكيش اقفلي وراه الباب
(٣) بطلي تستخبي وتخبي مشكلتك واحكي للحواليكي باللي بيحصل معاكي
اذا كنتي caretaker فانتي بتخجلي من الخطأ وحتحسي بالمسئولية تجاه انهاء العلاقة او تجاه اي مشكلة كبيرة تحصل بينكم وبيكون وضعك حاجة من اتنين : اما تستخبي ومتحكيش لحد ابدا اللي بيحصل معاكي او انك بتحكي لأي حد يقابلك ويادوب لسة متعرفة عليه سواء في النادي او المواصلات والحالتين دول غير مفيدين بالمرة ، المفروض انك تحكي للقريبين الموثوق فيهم اللي مفروض انهم يساندوكي وبالنسبة للمعارف والصداقات البعيدة لازم تعلني لهم ان العلاقة انتهت دة لو فيه طلاق واذا العلاقة مستمرة فمفيش اي داعي ان اي حد من المعارف دول انه يعرف اي حاجة عن الطلاق الصامت اللي حاصل اللي هو انفصال بدون طلاق وتعايش مع النرجسي ، ومش مفروض انك تعلني عدائك له زي مابنشوف علي السوشيال ميديا وخصوصا اللي اتطلقت ، هي تقول وهو يقول وفي الاخر انتي اللي بتتأذي وتتعبي وهو ينبسط بقهرك . بالنسبة للاطفال حذاري انك تطلعي فيهم غلبك وقهرك وتقهريهم هم كمان بالعصبية بتاعتك وبدل ماتكوني مصدر الامان لهم تكوني مصدر الرعب ، ومفيش داعي انهم يشوفوا مشاعرك تجاه ابوهم لان هم شايفين مشاعره تجاهك وفاهمينها اكتر منك ودة كفاية عليهم وافهمي انهم بيعانوا زيك بالظبط ويمكن اكتر منك فحاولي تخففي عنهم بدل ماتزودي عليهم ،، اما اذا كانوا داخلين على المراهقة او مراهقين وهو بدأ يستحوذ عليهم ويستخدمهم ضدك ففي الحالة دي لازم تقربي منهم وتصاحبيهم وتهدي اعصابك جدا وتعملي معاهم حوارات ومناقشات كتير في الحياة بصفة عامة وفي حياتكم بصفة خاصة ولازم توريهم نماذج الاباء الطبيعين بشكل غير مباشر وبحكمة متجرحش عشان يعرفوا انهم بيتعرضوا للاستغلال ولازم تكوني قوية وتكوني حضن دافي لهم تعوضيهم عن وجوده وكل دة في الاخر حيخليهم يشوفوا الصورة صح وبكدة تصعبي عليه انه يستغلهم ضدك او يحاربك بيهم .
تابعونا على الفيس
اكونت الفيس بوك
www.facebook.c...
جروب ادرس عدوك النرجسي
/ kawthersanad11
الكتب :
١- Becoming the Narcissist's Nightmare
٢- In sheep's clothing
3- healing from narcissist