ازاي تمنعي النرجسي انه يقلب اولادك عليكي و
ازاي تسترديهم لوحصل وقلبهم عليكي؟
قبل أي كلام عايزة تستردي اولادك لازم تكوني تعافيتي من ادمانه وخرجتيه من قبلك وعقلك عشان تقدري تشوفي اولادك
ضحية النرجسي بتكون مش شايفة غيره فعلا حرفيا مش شايفة غيره وحتى أولادها مش بتكون شايفاهم هو مخليها مضروبة على دماغها وهو دة اللي هو عايزه تماما انها متشوفش غيره ، واذا هو مهتم بشكل أولاده وامتداده والفشخرة بيضغط عليها جدا عشان تذاكر لهم وتربيهم ويطلعوا مثاليين وطبعا هي بتشتغل معاهم تحت ضغط فبتكون حاسمة معاهم بزيادة وفي نفس الوقت عصبية معاهم من اللي هي شايفاه منه فبالتالي النتيجة بتكون منتهى القسوة وهي مش منتبهة ولا وواخدة بالها
شوفو حالة بتقول ايه
ولاده بقي قلبهم عليا بأكاذيب وتلاعب بعقولهم لغاية ما وصلهم يرقبوني ويشكوا فيا زيه وكنت انهار وادافع عن نفسي أمامهم
؛؛؛قلبهم عليا في سنه وشويه بقوا نسخ منه رغم أنه لا عمره ربي ولا اهتم
كان مجرد بابا الحلو اللي جايب تشيوكليت اخر النهار ؛؛؛وبعدين زي ما وصفتلك انها هيه اللي بتعلم وتربي وتحاسب
لأن لو ده محصلش كان هطلع عيال ماسخه لأن الشريك في الباي باي
؛؛؛اهوه بقي انحطينا في وضع صعب ناشف وهوه المهرج الحته الطريه
وده لمصلحتهم
بيجي هوه بكل بساطه بيهد كله لمجرد أن شايف مصلحته في حته تانيه ويستخدمهم
رأيك يهمني
المشكلة ان زوجة النرجسي من كتر خوفها عليهم وخوفها من انتقاد النرجسي بتزود الشدة والحسم وبتهمل الحب ومش بتديهم وقتهم ولا بتقدر تسمعهم من كتر الضغوط اللي بتكون فيها ومش بتكون واخدة بالها ان الاولاد ناقصهم حب وود منها وحضن حنين وبالرغم من ان النرجسي بيلعب ويجيب حاجات حلوة الا انه مش بيحضن ولا عنده مشاعر يديها للاولاد ودة بيخليهم غير متزنين وبكدة بيكون سهل استقطابهم ، مستحيل الابناء يقلبوا على امهم لو كانت علاقتهم اصلا كلها حب مع الحسم الا اذا الله لا يقدر لو فيه سيكوباتية موروثة بس وفقط ،لكن غير كدة يبقى لازم نقعد نفتكر احنا عملنا معاهم ايه في طفولتهم اديناهم كام حضن لما كبروا ، حسسناهم بحبنا ولا لا ، انا اولادي النهاردة بفضل الله اصغرهم قرب. عالثلاثين ولسة بدلعهم وبقول لهم دايما اني بحبهم وبحضنهم كل مااشوفهم ، ولو كانوا قاعدين معايا كام يوم كل ما اعدي جنب حد منهم يقوم يحضنني ، ليه عشان انا عودتهم على كدة عشان انا كنت مهتمة جدا بالاحضان لاني قرأت كتير عن تأثيرها في الاطفال والكبار، بالنسبة اللي أولادها اتقلبوا عليها وبيراقبوها زيه وشاكين فيها لازم تكوني قوية معاهم ومتدافعيش عن نفسك وسيبيهم يراقبوكي مش حيلاقوا حاجة وحيرجعوا بس ابدأي تقربي منهم بالتدريج جدا جدا
ازاي بالتدريج؟ كل سن وله طريقة ،الأطفال عايزينك تلعبي معاهم وتكوني صبورة ، اتعلمي من النرجسي ،النرجسي مش بيدي أي حاجة غير الفلوس لكن مشاعر مفيش ومع ذلك بيحبوه ليه اتفرجي عليه واتعلمي هو لو قعد معاهم نص ساعة في الأسبوع بيلعب ويضحك ويهرج ويشيل ويدلع ويعيشهم نص ساعة في الجنة بالنسبة لهم وعليها أسبوع كامل ، شوفي بقى انتي لو بتديهم نص ساعة كل يوم تلعبي معاهم وتحكي معاهم او تتفرجي معاهم علي فيلم ، انا لحد النهاردة لما احفادي ييجوا لي نعمل الفشار ونقعد نتفرج على فيلم ، لازم اقعد معاهم لازم اديهم من وقتي ،مهما كنت مشغولة ، لو عملتي كدة مع اطفالك والله لو الشيطان بنفسه جالهم ماحيقدر يقلبهم عليكي ، مع الحسم في التربية دة مش بيتعارض ابدا مع الحسم
بالنسبة للمراهقين فدول بقى حيحتاجوا منك صبر أيوب ولازم تكوني ذكية معاهم لازم تتحايلي وتنقي كلامك وتقنعي وتقرأي كتير في اهتماماتهم ، لازم تكوني عندك معلومات تفوق معلوماتهم ولازم تعرفي اهتماماتهم ايه وتتكلمي معاهم فيها وتحاولي تتعرفي على مصطلحاتهم وتتكلمي معاهم بيها لما تكونوا لوحدكم مش ادام الناس وهم يكونوا فاهمين دة وميتعدوش حدودهم معاكي لازم يشوفوكي قوية ولكي شخصية وتقدري تدافعي عن نفسك عشان تقدري تدافعي عنهم ، لازم تديهم إحساس بالأمان وانك معاهم وفي صفهم مهما حصل منهم ولازم تفهميهم انك في صفهم حتى لو زعلتي منهم ،واتعاملي معاهم بالعواقب مش بالعقاب علميهم ان اللي بيغلط بيؤذي نفسه مش انا اللي بأؤذيه ، حطي قوانين في البيت زي مثلا مفيش بلايستيشن قبل مانخلص المذاكرة ، الموبايل يتقفل اثناء المذاكرة ، ولازم تسيبيه يجرب انه لو مذاكرش حيسقط او درجاته حتقل ولازم يشوف اللي بيحصل نتيجة عمله وهي دي اللي بنقول عليها العواقب مش العقاب . لو انتي فضيتي دماغك وقلبك من النرجسي حتقدري تعملي كدة مع اولادك ، عشان تفضي دماغك لازم تتعافي من ادمانه يا اما تستعيني بطبيب نفسي يا اما تسمعي سلسلة التشافي كلها وسلسلة الثقة بالنفس وتشتغلي على نفسك ، اما اللي أولادها في المراهقة المتأخرة وداخلين ع ال١٨ والعشرين فتسمع فيديوهات العلاج اللي نزلت الأسبوع اللي فات وتكملها للاخر واللي عايزة تشارك في الوركشوب تقول في التعليقات ونشوف حنرتبها ازاي
جروب ادرس عدوك النرجسي
/ kawthersanad11
صفحتي الخاصة للتواصل معي
/ kawthersanad1.wordpress
رابط حلقة السيرة
• السيرة النبوية الشريفة...
26 ноя 2021