رقم حجز الاستشارات والكورسات : ٠٠٢٠١١٥٠٥٨٦٠٥٢
هل انتي تقدري تخرجي عن توقعات النرجسي؟ اذا قدرتي تبقي قدرتي تحققي نصر عظيم عليه ليه؟ لان دة من ضمن الطرق اللي تعملي بيها الجرح النرجسي يعني ايه جرح نرجسي؟ شوفي فيديو "من اهم الطرق لاضعاف النرجسي" طيب
يعني ايه تخرجي عن توقعات النرجسي ؟ شوفي: انتي عارفة ان النرجسي بيكون راسم سيناريو لحياتك ومخطط لك كل حاجة حتتصرفي فيها ازاي فيما يخدم مصالحه ، ياريت الموضوع واقف عند كدة لا كمان النرجسي زي مابيكون مكون لنفسه صورة وهمية ومصدقها بيكون مكون لك انتي كمان صورة وهمية في خياله وطبعا الصورة دي مش بتكون حقيقية ولا تمت للحقيقة بصلة ،هي صورة هو عايزها تكون موجودة ولأنه شخص ذهاني فبيتخيل انها موجودة فعلا لدرجة انه أحيانا يقول لك انتي بتحبي تعملي كذا او انتي مش بتحبي كذا بس خدي بالك أحيانا دة بيكون جاي من الصورة الوهمية اللي في خياله واحيانا بيكون من باب انه يزرع جواكي شعور عايزك تحسيه وبيكون برضه حيخدم مصلحته ،الاتنين بيحصلوا من النرجسي ، المهم ان النرجسي لما مش بيلاقيكي شبه الصورة اللي رسمها له خياله المريض بيبدأ معاكي في التحقير شوية والهوفرينج شوية والسخن بارد عشان زي مابنقول يحطك في القالب اللي هو علميا الصورة الذهانية بتاعته اللي راسمها لك ، فلو اتحطيتي في القالب تماما خلاص واتطمن بيبدأ بقى لانه ملول يدور على تحدي جديد شوية ويرجع لك شوية وهكذا بتستمر اللعبة ، المهم بقى اذا انتي حبيتي تخرجي برة القالب وهو دة اللي بنقول عليه تخرجي عن توقعاته ، أيه اللي بيحصل ؟ اللي بيحصل ان النرجسي اول حاجة بيحس بيها ان فيه حاجة غلط انه بدأ يفقد السيطرة وبعدين يحس ان القالب اتكسر فيحس بالفشل وهنا بتيجي الإصابة النرجسية اللي اتكلمنا عنها قبل كدة وكل ماكان الخروج عن المتوقع دة بطيء وتدريجي كل ماكان افيد لكي واكتر خداعا للنرجسي عشان مايحسش فيبدأ الهجوم من أولها ، عشان كدة دايما أقول لك بالتدريج
طيب تعالي بقى نشوف ازاي نخرج عن اللي النرجسي متوقعه
١- ماترديش عليه الردود اللي متوقعها منك يعني لما يتهمك بحاجة وانتي ماعملتيهاش العادي بتاعك انك تبدأي تدافعي عن نفسك وتقولي ماحصلس انا ماعملتش دة ازاي تقول لي كدة وهو يصعد وانتي تبكي وتنهاري يعني بالعربي كدة ياخد الوقود اللي هو عايزه فانتي كدة غلط الصح انك تقولي ماحصلش وتمشي وتسيبيه ولو اصر يكمل اسكتي وسيبيه يخلص كلام وماترديش حيقول لك مش بتردي ليه قولي انا رديت وانت مش مصدق وانا مقدرش ارغمك تصدق وماعنديش حاجة أقولها واذا زود قولي له انت عايزني أقول لك اه انا عملت حاجة ماعملتهاش ،طيب اه عملتها نعمل ايه بقى دلوقتي؟ بس خدي بالك ابدا ماتقوليش الجملة دي الا لو بتسجلي الحوار كله عشان لو جه ادام حد يقول هي اعترفت تسمعي الناس الحوار الحقيقي . المهم انك تغيري ردودك اللي كل مرة بترديها عليه
٢- هو متعود انه لو اتأخر شوية برة انتي بتبدأي تطارديه بالمكالمات وتطمني عليه وبعض الزوجات بتتصل بالنرجسي اكتر من مرة باليوم وقت الشغل أحيانا بتكون لسة في مرحلة الإدمان واحيانا بتكون شاكة فيه فبتتابعه االمهم انه ممكن يكون متعود انه يستقبل منك من ثلاث لخمس مكالمات باليوم وهو مبسوط كدة لكن مع ذلك دايما يقول لك مشغول مش عارف أتكلم دلوقتي بطلي تطارديني ماتطلبينيش في الشغل وهكذا كل فترة يبين لك انه مخنوق من اتصالاتك وبعدين لما تتصالحوا يقول لك قلت دة وانا متعصب ،انتي بقى ابدأي تخفي الاتصالات دي بالتدريج ممكن يوم تكوني مشغولة جدا ماتتصليش خالص وتاني يوم تتصلي ست مرات اللي هو ماتحسسيهوش انك كنتي قاصدة ماتتكلميش خالص ودايما يكون عندك حجج لعدم الاتصال ، غيري العادات بتاعتك معاه بشكل ملخبط والعادة اللي منتظمة جدا فيها لخبطيها بس برضه بالتدريج وباسلوب يحيره تمنعي يوم وتكثفي اليوم اللي بعده اللي هو تخليه محتار هي قاصدة ولا لا بالظبط زي ماهو بيعمل معاكي
26 авг 2024