ازاي تواجهي حملة تشويه السمعة؟ ..... كوثر سند 

(٥)ازاي تواجهي حملة تشويه السمعة؟
ازاي تعرفي انه بيخطط لحملة التشويه ؟ شوفي حلقة ( ٨ علامات هتأكدلك ان النرجسي قرر يطلق فعلا أو ناوي يستبدلك) مع العلامات دي :
١- حتلاقيه فجـأة بيصلح علاقته مع كل اللي حواليه وبيتودد لهم بشكل ملحوظ
٢- حيبدأ يذكر طرف ثالث ودة غالبا بيكون البديل اللي بيجهزه عشان يحل محلك
( تثليث - وقود) ويبدأ يقول لك حتجوز بس بجدية مش مجرد كلام وخلاص ، وطبعا بيكون شوهك ادام المصدر الجديد
٣- الغياب المتكرر غير المبرر - صمت عقابي طويل - تلاكيك وخناقات متكررة
٤- الناس اللي تبعه حتلاحظي انهم بيبعدوا عنك وبيتجنبوكي لانه بدأ طبعا يشتكي لهم منك ويلعب دور الضحية
طيب لو عرفتي انه بيخطط حتعملي الخطوتين اللي حقولهم لك
١- من اول ماتعرفي انه نرجسي لازم ترجعي صداقاتك وعلاقاتك بعيلتك وقرايبك مش اخواتك لان الناس دي هم اللي بيتلقوا الحملة فلازم تكوني علاقتك بيهم طبيعية وكويسة عشان يفهموكي وميصدقوش كلامه ويساندوكي ، والمفروض ان القريبين جدا منك من الناس دي بتعرفيهم كل اللي بيحصل معاكي لان هم دول اكتر ناس حتكون فاهماكي وحتقف جنبك ، ودول بنسميهم مجموعة المساندة
٢- اذا حسيتي انه بيخطط يسيبك او ظهرت علامات انه عايز يتجوز لازم انتي تكوني مخططة وجاهزة للانفصال في أي وقت ( مش كل الناس ، الكلام دة للناس اللي وصلت لاسوأ مرحلة مع النرجسي ) في الحالة دي لازم تعرفي مجموعة المساندة انك قررتي الانفصال من غير ماتعيدي الحكاية انتي بس قولي انك قررتي تنفصلي لان كدة خلاص مش قادرة تكملي بس، متعرفيش نيتك ابدا لأي حد من طرفه عشان ميهاجمكيش
طيب لو معرفتيش انه بيخطط واتفاجئتي ان حملة التشويه بدأت حتواجهيهيا ازاي ؟؟
١- لازم تخفي مشاعرك ، الطبيعي انك بيحصل لك غضب وثورة وحزن وصدمات وتحاولي تثبتي عكس اللي بيقوله وبكاء وانهياروخوف ورعب على سمعتك ، واكيد انتي عارفة انه عايز دة جدا عشان كدة لازم تخفيه عنه وعن قروده الطائرة و ابكي وانهاري وخافي في بيتك ،مع المجموعة المساندة لكن بعيدا عنه وعن أي حد من طرفه لان من فوايد الحملة الوقود السلبي وعمره ماحيوقف الحملة دي اذا بياخد منها أي فايدة
٢- متحاوليش تتواصلي معاه ولا مع أي حد عشان يوصل له أي حاجة ولا تحاولي تحمليه مسئولية كلامه غير بالمواجهة القانونية ، يعني لو شهر بيكي او بعت لك شتيمة ع الواتس (اثبات ) او لاي حد من طرفك تقدري تهدديه انك حتستخدميه كدليل ضده وتحبسيه بيه (سب وقذف ) ، انتبهي مهما اتكلمتي معاه عمره ماحيتحمل أي مسئولية كالعادة وحياخد منك وقود وبس
٣- متحاوليش تحاربيه بسلاحه ولا تحاولي تعملي له حملة تشويه او تقولي هو اللي بيعمل دة وهو بيقول علي اللي فيه ، لانه أولا حياخد وقود برضه وكمان حيقول للناس مش قلت لكم مجنونة ، وكمان كلامك حيحفز أنصاره وقروده الطائرة اللي مقتنعين انه ضحية على مهاجمتك بزيادة وحتبقى ساحة معركة كلها اهدار للطاقة والوقت والنفسية
٤- متحاوليش تخلي حد يقنعه انه يوقف الحملة او ياخد منه كلمة لانه أصلا مش بيلتزم ولان محدش أصلا حيقدر يقنعه واصلا اللي مقتنعين انه ضحية حيرفضوا يقنعوه وحيوصلوا له وضعك وكلامك وكدة برضه وقود
٥- اوعي تواجهيه طبعا لان دي اكتر حاجة هو بيتمانها وهو زي ما انتي عارفة بيحب المعارك بيعشقها لانه بيحب يفوز وبيحب الاكشن ، وانتي أصلا مش في وضع يسمح لك تدخلي معركة وانتي محطمة كدة فحيكسب حيكسب وانتي اللي خليتيه يكسب
٦- استخدمي التهديد بالقانون اذا الحملة فيها تجاوز يحاسب عليه القانون ودة غالبا حيكون سهل لانه اكيد باعت لك رسايل فيها كل الشتايم اللي بيقولها عليكي ،وخدي بالك انه ممكن يدخل لك من اكونتات فيك على أساس الشرطة مش حتعرف توصل له ، المفاجأة بقى انهم بيوصلوا له مننكرش انك في الحالة دي محتاجة واسطة عشان يجيبوه لكن في النهاية بيحصل وبيتجاب صاحب الاكونت اللي بيدخل يشتم يعني مبقاش حد يعرف يعمل كدة وميتمسكش
٧- خدي بالك انك بتحاولي تقللي الخساير مش تقضي ع الحملة بالكامل لان فيها اطراف مش تحت ايدك ، فلازم تتقبلي دة عشان متهدريش طاقتك ولا تفضلي متوترة وعلى اعصابك واصبري شوية هي مسألة وقت وحيتلهي عنك وحينسى والناس كمان حتنسى
٨- اذا أي حد جالك يلمح ع الكلام اللي بيتقال او سألك بشكل مباشر الكلام دة حقيقي ولا ايه ، كوني هادية واضحكي على الموضوع بسخرية واكدي على انه مش حقيقي ومتبينيش انك منزعجة جدا منه يعني بيني استغراب واانزعاج بسيط جدا لان دة حيكون ثبات انفعالي حيديكي مصداقية اكتر عند اللي بيسأل ، دة غير ان الكلام دة كله ممكن جدا يوصل للنرجسي
٩- متنشريش حزنك ومشاعرك وغضبك ع السوشيال ميديا ولا تدخلي تدعي ع اللي ظلمك ولا تعيطي ع اللي هجرك ولا تهددي لان كل وقود نرجسي وطول مابياخده مش حيوقف الحملة ابدا
١٠- متنشريش حكايتك معاه ع السوشيال ميديا لان دة بمثابة كتابة كتاب عنه وطبعا دة كدة هو مهم ومشهور ودة اكبر وقود ياخده منك
١١- بطلي تتابعيه برضه ع السوشيال ميديا وفري طاقتك ووقتك واعصابك
١٢- اذا لسة معملتيش نوكونتاكت او قطع اتصال ابدأيه فورا بمجرد بدء حملة التشويه
كل الخطوات ال ١٢ دول كفيلين انه يفقد الامل ويوقف الحملة او ع الأقل يهدي شوية
اكونت الفيس بوك
www.facebook.c...
جروب ادرس عدوك النرجسي
/ kawthersanad11