ايه هو الهوفرينج وازاي تستفيدي منه وتطولي فترته او تقاوميه ومتتأثريش بيه؟.... كوثر سند 

الهوفرينج
امتى النرجسي بيعمل الهوفرينج وليه ؟ وازاي بيكون الهوفرينج دة وايه تأثيره عليكي؟
١- اذا انتي سيبتيه او بينتي له انك حتسيبيه او لو حتى هو سابك ، خصوصا لو حترتبطي بحد جديد
٢- هو لو سابك تسيبيه وانتي اللي سايباه يبقى كدة هو خسر وهو مينفعش يخسر لازم يكون كسبان فلازم يرجعك عشان ينتقم او عشان يسيبك هو ويبقى هو كدة كسب
٣- مجرد احساسه انه عرف يرجعك فدة بيشبع رغبته في السيطرة عليكي
٤- لو معرفش يوفر مصدر وقود نرجسي بديل حيرجعك ، فلازم هوفرينج
النرجسي بيعمل نوعين من الهوفرينج :
اما الحب والسحر والكاريزما والمال والهدايا ، او اللجوء لدور الضحية ، وانتي قضيتي عليه وعقدة الذنب اللي زرعها فيكي ، او انه يعمل الاتنين مع بعض .
الأولى :
طبعا هو بيعمل الهوفرينج وانتي بتكوني أصلا عندك لخبطة في التفكير وفي الهرمونات وفي النفسية ، وطبعا وسط كل دة انتي نفسك تصدقي انه بني آدم وأخيرا حس بغلطه ورجع لك وبقى بيحبك زي زمان ،لا دة هو أصلا بيحبك طول الوقت بس هو معذور عشان أي حاجة بتقوليها لنفسك او ان انتي اللي كنتي وحشة معاه وهو كان مجرد رد فعل لتصرفاتك ( زي ماهو كان بيقول لك في كل خناقاته معاكي) اللي بيحصل انك بعد ما بتشوفي المر منه وبتتأكدي مليون في المية ان مفيش امل انه يتغير ولا انه يكون بني آدم بتقرري تسيبيه وبتاخدي قرار الانفصال وهو عارف انتي ليه اخدتي القرار دة وعارف ايه اللي لو قاله لكي حترجعي وايه اللي انتي نفسك تسمعيه منه فبيقوله لكي وانتي عشان عايزة تصدقي وعشان بيلعب على مشاعرك وعشان عقلك حاطك ع الطيار الالي بتصدقي وبتعيشي الهوفرينج .اللي هو انتي كنتي صح انا وكان عندك حق ، انا معاملتكيش بما يرضي الله ، انا ندمان ، اللي هو كل زوجة نرجسي حتموت وتسمعه و مع انك بتكوني شاكة في صدقه الا انك عايزة تصدقيه ،
النرجسي بيعمل في الهوفرينج زي ما عمل في اللافبمومبينج في اول العلاقة لكن المرة دي في الهوفرينج هو عرفك اكتر وفهمك اكتر وبرمجك وعارف مفاتيحك فبيقول وبيعمل اللي متأكد مية في المية انه حيجيب معاكي نتيجة ( فسح ، سفر ، هدايا ، كلام حلو ، مساعدة في البيت ، معاملة متحسنة باحترام ، تملق ، بعضهم بيقرب من ربنا (تمثيل طبعا)عشان عارف انك بتحبي في الله ، المهم انه بيعيشك اللي نفسك فيه بحيث تكذبي نفسك وتصدقيه او تتخيلي انه اتغير وبقى انسان تاني ، وخدي بالك بعض النرجسيين ممكن يعيشك الهوفرينج شهور توصل ولسنة ، ودة بيحصل لما يكون راح اتجوز عليكي وطردته ورجع ملوش ملجأ غيرك ، او خانك وانتي رميتيه ومش طايقاه وبرضه ملوش ملجأ غيرك ، او حس انك فقدتي الثقة فيه ومبقتيش بتحبيه ، بس كل دة ماتكونيش لا فضحتيه ولا جرحتي عظمته يعني تكوني صامتة وكلامك قليل وتصرفاتك بتقول انت انتهيت من حياتي وتكوني حاسة دة فعلا ، في الحالة دي الهوفرينج بيكون مركز وفترته طويلة
المهم انك في النهاية بترجعي (دة بالنسبة للي كانت مقررة طلاق ) وممكن ساعتها تفتكري كلامي وكلام غيري وتقولي لنفسك معلش حديه فرصة تانية ، لا دة غير اللي بيقولوا عليه ، دة خفيف مش خبيث ، دة ...... ،المشكلة بقى انك اول مابترجعي وتسلمي قلبك بالكامل لازم تاخدي الم يتولك لازم لا محالة ، عشان كدة بنقول ابدا ابدا متحسسيهوش انك رضيتي ووثقتي فيه .
الطريقة التانية : بالرغم من معاملته السيئة وظلمه وجبروته الا ان ناس كتير بتستمر في العلاقة مع نرجسي بسبب احساسها بالذنب ، بيكون تفكيرها او حوارها الدخلي عبارة عن ايه؟ هو عمل لي كتير ، هو عاش طفولة بائسة ، حبقى انا والدنيا عليه ، هو بيحب بيته وأولاده ، هو ببيحاول يتحسن ، هو كريم على بيته وبيصرف كويس ، هو مكنش يقصد ، هو اصله مشافش ناس محترمة فمش قادر يستوعب اني كويسة معلش بكرة الأيام تثبت له ، اصله مر بتجارب صعبة ، ....) النرجسي الضعيف والخفي والضحية بيلعبوا على نقطة الإحساس بالذنب ببراعة وبيعرفوا يلعبوا دور الضحية ببراعة برضه ولما بتمشي وتسيبيه بيعرف يوصل لك انتي اد ايه حطمتيه واد ايه جنيتي عليه وهو مش قادر يعيش من غيرك وحينتحر وممكن يهددك انه حينتحر ادامك ، وانه عارف انه ميستحقكيش وانه مش عارف يتغير بس بيحاول ، وفي النهاية انتي لازم تنقذي حياته وانتي طبعا عندك احتياج ملح للمساعدة والإنقاذ ولعب دور المنقذ بصفتك متعاطفة او اعتمادية فمش بتقدري تقاومي الدور بتاعك اللي انتي مدمناه وبتحبيه وانا لها وانا حستحمل ومش حسيبه للدنيا تخبط فيه وا وا وا ......
طيب ليه النرجسي بينجح في انه يرجعك بالهوفرينج وازاي تصمدي ومتخليش الهوفرينج يأثر فيكي لو انتي ناوية طلاق وازاي تستفيدي من الهوفرينج وتطولي مدته لو انتي مستمرة مع النرجسي ؟ كل دة حنعرفه الحلقة الجاية ان شاء الله
جروب ادرس عدوك النرجسي
/ kawthersanad11
صفحتي الخاصة للتواصل معي
/ kawthersanad1.wordpress