اسعار السيارت رايحة في داهية ..اعرف الاسباب واحسن وقت للشري و البيع مع ملك السيارات 

رابط قناة حلقات القصص البوليسية :
برنامج القصة من الاول
/ @yassergomaa2
حلقة النهاردة مهمة جدًا لأي حد عايز يشتري عربية أو عنده عربية عايز يبيعها. هعرفك أسباب أزمة السيارات في السوق المصري، وتشتري إمتى لو عايز عربية، وتبيع إمتى لو عندك عربية عايز تبيعها.
السوق المصري بعد صفقة "رأس الحكمة" والانفراجة الدولارية اللي حصلت، الأسعار هبطت بشكل ملحوظ في السيارات وباقي السلع. لكن فيه أحداث حوالينا بتغير المعادلة وبتأثر على الأسعار في السوق، لازم تعرفها علشان تفهم الدنيا رايحة على فين.
أولاً: الصراع الدائر في الشرق الأوسط
الصراع الدائر في الشرق الأوسط له تداعيات خطيرة. أولها أن تكاليف الشحن زادت بشكل كبير جدًا بسبب أن السفن ما بقتش تمشي في مضيق باب المندب والبحر الأحمر للوصول إلى قناة السويس. الكلام ده خلى أسعار الحاويات تزيد بشكل كبير جدًا. يعني مثلاً، الحاوية الـ 40 قدم كان سعرها في 2022 حوالي 1400 دولار، النهاردة بيعدي الـ 5000 دولار. الأرقام دي هتحطها أوتوماتيك على سعر العربية.
ثانيًا: زيادة أسعار الشرائح الإلكترونية
الشرائح الإلكترونية بقت مكون أساسي في السيارة، فزيادة أسعارها بترفع ثمن السيارة وقلتها بتقلل إنتاج السيارات، وبالتالي بتؤدي لارتفاع الأسعار نظرًا لقلة الإنتاج وزيادة الطلب.
نتيجة لما سبق، بنلاقي ظاهرة "الأوفر برايس" بترجع تاني. والـ "أوفر برايس" بالمختصر كده للي ميعرفش، هي أن التاجر بيحط فلوس إضافية من تحت الترابيزة على سعر السيارة. يعني لو عايز تشتري قانوني استنى دورك، أو ممكن تشتري دلوقتي بس تدفع رقم إضافي فوق ثمن السيارة بيوصل لمئات الآلاف في بعض الموديلات. المشكلة إن الناس بتشتري، وده بيخلي التجار يطمعوا أكتر ويزودوا قيمة الأوفر برايس.
أخيرًا: وقوف 13 ألف سيارة في المواني المصرية
فيه 13 ألف سيارة في المواني المصرية مش عارفين يدخلوا البلد، وفيه ناس بتقول 18 ألف. ده رقم كبير جدًا في ظل احتياج السوق للسيارات. السبب في منع دخول السيارات دي، بيتقال إن فيه تحايل من المستوردين على النظام الجمركي. يعني مثلاً بيدخل العربية على إنها سلعة تانية، وبعدين بيعدل الورق ويخليها سيارة بدل السلعة اللي كان كاتبها قبل كده. ده غير التلاعب في إدخال سيارات ذوي الهمم اللي بقت تجارة غير مشروعة. النهاردة التجار بيشتروا أوراق الإعاقة من أصحاب الإعاقة مقابل مبلغ مالي ويدخلوا عربيات فارهة بدون جمارك بالأوراق دي. الدولة خدت بالها من الثغرة دي وبتتعامل معاها.
كل اللي فات ده بيخنق سوق السيارات في مصر وهيؤدي لارتفاع الأسعار مرة تانية.
السؤال هنا: أشتري أو أبيع إمتى؟
نتكلم الأول عن الشراء. لو عايز تشتري، يبقى النهاردة أحسن من بكره لأن زيادة الأسعار هتتم بشكل تصاعدي. كل فترة هتلاقي فيه قفزات في الأسعار. يعني اللي كان بمليون هيبقى بمليون ومية، ولو استنيت أكتر هيبقى بمليون ومتين وهكذا. طول ما أسباب زيادة الأسعار اللي شرحتها موجودة، يبقى الأسعار هتتجه للزيادة.
طيب حلو، أنا هاسمع كلامك وأشتري. طيب أشتري إيه؟ بص يا سيدي، أولًا دور على العربية الموفرة في البنزين وخلي ده أهم أهدافك. لأن أسعار البنزين في اتجاهها للتحرر الكامل والدعم هيتشال بالكامل عن البنزين. معلومة كده، سعر لتر البنزين العالمي الآن هو 0.99 دولار أمريكي يعني حوالي 47 جنيه مصري. يعني لو هتحط 50 لتر في العربية وده متوسط سعة الخزان، هتدفع 2350 جنيه.
فاستهلاك البنزين مهم جدًا، وبالتالي هتلاقي السيارات ذات المحركات الكبيرة والسعة اللترية الضخمة حالها هيقف وسعرها هينهار. زي مثلاً السيارة الجراند شيروكي 8 سليندر 5700 سي سي. وأيضًا السيارات القديمة مش هتكون مرغوبة لأن تكنولوجيا المحرك بتاعها مش اقتصادي في استهلاك البنزين.
العربية اللي سعرها هيزيد هي السيارة زي السوزوكي ألتو، لأنها ملكة توفير البنزين ومكيفها قوي جدًا. وده اللي فئة كبيرة من الشعب هتكون محتاجاه. طبعًا موضوع السوزوكي ألتو ده على سبيل المثال وليس على سبيل الحصر.
نيجي بقى لو أنت عندك عربية وعايز تبيع. في الحالة دي أنصحك بالشراء الفوري بعد البيع لسيارة أخرى علشان لو بعت وما جبتش عربية تانية على طول، يبقى مش هتعرف تركب عربيات تاني طالما الأسعار بتزيد. يبقى جهز في جيبك الفرق بين السيارة اللي معاك واللي عايز تشتريها وبعدين بيع.