لو رحت تاخد كورس "سوفت سكيلز" او "مهارات شخصية"..أحد الحجات اللي هيقولوهالك هي انك لازم تفهم المجتمع اللي حواليك وسوق العمل شايفينك ازاي... وتتعامل على هذا الأساس... مثلاً متبقاش لسه متخرج وتقول عاوز اشتغل في منصب اداري او عاوز ابتدي بمرتب كبير.. حتي لو انت شايف انك تقدر وتستاهل...لأن محدش شايفك كده.. ومحدش هيديك الفرصة دي... إلا لو كنت شغال في شركة بابي او اونكل.
وطول ما انت مش فاهم وضعك من وجهة نظر الاخرين - مش من وجهة نظرك انت - هتفضل عايش في وهم كبير.. .. وكل ما الوقت يمر .. خروجك من الوهم ده بيبقي أصعب... وتمنه بيزيد.
جميل ان من فترة للتانية تسال نفسك... يا ترى العالم فعلاً شايف مصر أم الدنيا؟ هل فعلاً "جيشنا صعب"؟ على رأي محمد رمضان؟ او "عندنا قائد عظيم" على رأي "كريم عبد العزيز؟"
حلقة النهاردة من "اوضة الاخبار" هتجاوب عالسؤال ده...لأنها بتتكلم عن الثورة المصرية!
وخلي بالك .. وقت الثورة.. ووقت إذاعة الحلقة (اللي كان في نص ٢٠١٢ ) مكنش لسه الجيش عمل انقلاب ومكنش لسه قتل الناس في الشوارع ...صحيح كان قَتَلهم اثناء الثورة وده مذكور في المسلسل.. لكن مكنش لسه عمل مجزرة رابعه اللي العالم كله سمع عنها...
يعني لو قلنا ان فيه مؤامرة عالمية دلوقتي ضد الجيش المصري لأنهم مش فاهمين روعة الانقلاب وجمال الديكتاتورية وفوايد الحكم العسكري... فوقتها مكنش فيه انقلاب ولا حاجة... يعني الصورة اللي طالعه في المسلسل هي الصورة الذهنية المترسخة في العقل الجمعي الغربي في احسن حالاتها... وعامة دي صورة كل الجيوش في الشرق الأوسط مش الجيش المصري بس.
مش مهم الصورة دي صح ولا غلط علي فكرة... المهم انها الصورة اللي الغربيين مقتنعين بيها... وعلي فكرة... شبكة HBO اللي منتجه للمسلسل.. بالاضافه لصناع المسلسل نفسهم.. توجهاتهم يسارية... يعني من بتوع تقبل الاخر واحترام كل الثقافات وبتاع... يعني مش هنقدر نقول ان الصورة المهزأه الحقيرة اللي معروض بيها جيشنا على واحده من اكبر الشبكات التلفزيونية في العالم... راجعه لإنهم يمينيين متعصبين أو قاصدين يشوهو صورتنا او أي حاجة من دي.. بالعكس احنا شوفناهم الحلقة اللي فاتت بيدافعو عن المسلمين ضد اتهامهم بالإرهاب.
الحلقة بتبتدي قبل التنحي بيوم وبتخلص بعد التنحي بيومين ... بس في التلات تيام دول بيحصل حجات كتير.
للدعم على Patreon :
/ ahmedbehiry
شاهد حلقة المسلسل في القناة الرسمية على تليجرام:
t.me/ABehiry
الصفحة الرسمية لاحمد بحيري علي الفيسبوك
/ ahmed.behiry.the.page
الصفحة الرسمية علي تويتر
/ ahmedbehiry
اشترك في القناة لمتابعة الحلقات الجديدة
goo.gl/2KheJZ
22 июн 2021