الشاعر كاظم خبط الجبوري قصيدة اهل القصر (كاملة) 

ولد الشاعر كاظم خبط بلبل الجبوري في الديوانية/السنيه عام 1953 وتوفي سنة 1989 بحادث سير
كتب جميع انواع الشعر وبكل اوزانه وبكل اغراضه
وتجد في كتاباته الحس الثوري الرافض لكل اشكال الظلم والتسلط كما انه يحاكي في شعره الصراعات التي يمر بها العاشقين والفقراء
من قصائدة:
الدنيا خرسه وصفنة المالوم صوت
وعله جروحك رابيه اهروش الصبر
وريل عمرك من تصير محاطه موت
اتوادع باول محطه آمن العمر
الدنيا گيض ومات بشتانه النهر
وليل يتنشد عله اخبار الشمع
اي وحگ جدك لون مره عثر
يحسب احساب المضره امن النفع
ردت اشوفك حبسوا بجفني النظر
ردت اسمعك موتوا بذني السمع
ردت ابچي وگالوا دموعك خطر
حبسوا الدمعه وبجيت بلا دمع
ردت اغنيلك وگطعوا كل وتر
غافلتهم واعزفتلك عالضلع
انه لك منذور من اول شهر
عاشك اطباعك يبو حلو الطبع.
🔺 قصيدة (اهل القصر) الغنية عن التعريف
يمه ذوله اهل القصر ما لاعبوني
يمه من شافوني اجيت اتنادسوا واستغربوني
يمه ماسموني باسمي
وگالوا هذا ابن الفقير وشتموني
وگالوا هذا ابن الصريفه وعيروني
يمه چا هو الفقير شسوه من نچله بعمرهم؟
يمه چا هي الصريفه شماخذه وخايف قصرهم ؟
يمه گالوا لاتمر منا بعد بالك تشم ريحة وردنه
وگالوا بجدمك الحافي انخاف يترب عگدنه
يمه عدهم ..كلشي عدهم .. واحنه بس الماكو عدنه
يمه لعابات عدهم مدري شنهي ؟ واني لعاباتي طين
يمه حتى اثيابهم مستغربتني يعاتبن ثوبي الحزين
يمه چا ليش احنه فقره وليش اهلهم زناگين ؟
يمه دين الفقره متعب .خل نبدله بغير دين.
وليش ماعدنه قصر عالي مثلهم
موش ابونه اليبني هاي قصورهم كل هل سنين ؟
وليش ماعدنه ورد يمه مثلهم ؟
موش ابونه اليزرعلهم بساتين
يمه مو گلتيلي مره ابنادم اطباعه تهم مايهم لونه ؟
يمه ثاري بس الگمر بالدنيا يحبنه
اعلينه يسهر دوم ماغمض عيونه
يمه خاف الگمر هم ينباع والهم يشترونه .
🔺 ها يحمود
ها يحمود
بشرني بوضع وادمكم شلونه ؟.
بعدهم يشترون الليل .
لو گاموا يبيعونه .
بعدهم راغبين الگيد
لو صاروا يرفضونه .
أنه خوفي كبر يحمود
مامش دنيه مامونه
أخافن وگع حمل الضيم عنه وخفن متونه .
أخافن عرف دربه وصار
يرفض من يدلونه .
أخافن عرف زرعه وصار يعرف من يحصدونه .
دفك عينك تره يحمود درب الشمس رازونه .
دفك عينك تره الجوعان حيله يصير بسنونه .
🔺 قصيدة: شط الديوانية
شط الديوانية ايفرفح
من مرت من يمه صبيحه
من زلفچ يحبيبة انطيني
وخليلي من عطرچ ريحه
ومدري البيت اشلون ايلمهه
ومدري اشلون امها اتغطيهه
وحتى الوردات ايعرفنها
وحتى العصفور امتانيهه
چا ليش ايلوب البطران
مو حگك تتسودن بيهه
ضحكت وتبلط حي رفعت
وطگ حي العصري ابساتين
بيوت الطين اقصور ارتفعت
لا رد الله ابيوت الطين
ابردي اشباط ايطيح المشمش
وبكانون ايروج التين
وحتى الرگي اتغيّر طبعه
ويطلعلك شرط السچين
وحتى امحيسن راعي الگهوه
رد شاب وعاف التسعين
والاورزدي إيفتح غبشه
ويگلها اختاري اشتردين
وسوگ التجّار ايگوملها
شتفصلين وشتلبسين
وحتى الشط يحلف من تزعل
يزعل عل ماي وعل طين
وكلكم زلم ونسوان اتعرفوهه
وعاشت بيكم ساعه بساعه
ولو ما هيّ الزرع ايموت
ويتيتم منجل الزراعه
ولاتنّور ايضوگ الحنطه
ولانشتم ريحة فرگاعه
يابويه اشگد طماعين ابحبها
وهيّ اشگد طماعه
🔺 قصة قصيدة:
يگولون فد يوم من الايام الشاعر كاظم خبط الجبوري رايح لمكان بالسيارة فگاعده گباله بنيه كلش جميله بالطريق مطلعه برتقاله من جنطتها ومگشرتها وتاكل فهو باوع عليها هي ما معبرته گالهه ممكن حچايتين بس
گلتله : تفضل فگال
ان چانك ناوي اتدلل
عمي مو هيچ الدلال
الناس ملهوفه على خدك.
وانته تاكل برتقال
مشوه انه وروحي خضره
ومو ذنب لوبيك اعيل
بهيده رمشك لا تشيله
صواب مابيه ونحيل
واشتهيك وخوفي منك
تاخذ الروح وتميل
خذني ماشه بطرف زلفك
لو كتاب بجنطتك
احس الدنيا اتحرك
من تحرك شفتك
احس كل ايامي تضحك
من اشوفن ضحكتك
يابو شامه اوجه صافي
اصفه من ماي الزلال
الناس ملهوفه اعله خدك
وانته تاكل برتقال.
🔺 كتب الكثير لكن المقام لا يسع للذكر