- انا حاليا في صمت عقابي لمدة سنة وهو بره مصر ومفيش اي تواصل غير رسائل واتس لطلب مصاريف فقط وحاليا كل شوية يبعت رسالة من خلال الولاد انه نازل قريب بس رافض يقول امته نازل وسئل الولاد مره مين بيجي البيت ? سؤالي هل نازل فعلا ولا بيتلاعب بيه عشان عارف ان الولاد هيوصله ليه الكلام ? ولو في طريقه اعرف بيها ميعاد حجزة من المطار ?
وازاي اتعامل معاه بعد رجوعه من السفر بعد كل مدة الصمت دي ?
خاصة انه استاذ ف تصيد الاخطاء والاسقاط وهو نرجسي مرح وبيعمل صمت عقابي كتير جدا وع اتفه الأسباب
شوفوا انا عملت الحلقة دي مش عشان النرجسي جاي ولا لا ولا عشان النرجسي بيسأل الأولاد مين بييجي البيت ، هو اه الموضوع مستفز واه النرجسي بيعمل دة لكذا سبب ،منهم انه يقلقك او يحسسك انك محطوطة تحت المراقبة ولو دخلتي حد اولادك حيفتنوا عليكي وحيعرفوه و في نفس الوقت يحسسك انه ممكن تلاقيه ادامك في أي وقت فتعيشي كدة ستاند باي طول الوقت ، ودة بيديه إحساس انه مسيطر عليكي وموقفك على رجلك وموترك طول الوقت حتى وهو برة البلد شوفي بقى هو حيحس انه اد قوي وعظيم والامراض دي كلها .المهم يعني مش دة اللي عايزة أقوله لكي انا عايزة أقول لك انتي فارق معاكي ايه هو جاي ولا مش جاي ، شوفي انتي لو تعافيتي تماما مش حيفرق معاكي انه ييجي فجأة او مايجيش أصلا لانه زي مابتقولي هو كدة كدة حينتقد وكدة كدة مش حيعجبه أي شيء ولازم حيتصيد لك الأخطاء والله لو جبتي له حتة من الجنة في بيتك عشان يرضى ماحيرضى ،يبقى انتي ولا كأنك سمعتي حاجة ولا كأنه قال جاي ولا مش جاي ، انتي زي مانتي عيشي حياتك زي ماهي ولما ييجي نفس الكلام ،الأهم بقى من استعداداتك لمجيه هو انتي من جواكي جاهزة للمواجهة ولا لا ، وصلتي للثبات الانفعالي اللي يخليكي تثبتي ادام استفزازاته ولا لا ، نفسك من جوة اتغيرت وبقت قوية ولا لا ، بدأتي تعرفي نفسك وتفهميها وتحبيها وبدأتي يبان عليكي انك اتغيرتي وعينك بدأت تلمع ويبان عليكي انك رجعتي تاني زي ماكنتي قبل ماتعرفيه ولا لا ، بقالك سنة بعيد عنه ياترى عرفتي تستغلي السنة دي في تنمية ذاتك واسترداد نفسك ولا قعدتي تجتري الحلو والوحش ، هو دة اللي مفروض يشغلك ، عارفة لو رجع لقاكي زي اول يوم شافك فيه لما كنتي مشرقة وقوية وشخصيتك مميزة ولكي حضور ولكي طابع خاص بيكي وناجحة ومتحدثة ومهتمة بنفسك وفي نفس الوقت بتتعاملي معاه عادي وبدون عدائية عشان بس ميفهمش سبب تغيرك ، حيحتار ويبدأ ينجذب لك تاني عشان يبدأ معركة جديدة وتحدي جديد عشان يفك لغز تغيرك وفي نفس الوقت حيلاقي حاجة جديدة وكأنك مصدر وقود جديد وحيعمل لك هوفرينج طبعا او حيعمل لك غضب نرجسي عشان يشوف التغير دة حقيقي ولا منظر ،المهم انه حينشغل بيكي وحيحاول يعرف فيه ايه ولو اتأكد انك بقيتي قوية حينشغل بيكي برضه عشان يرجعك مكسورة تاني وحيبدأ يوقف الصمت العقابي ويعمل هوفرينج عشان يجيبك ويطمنك وبعدين يكسرك بنفس الطريقة القديمة ، لكن لو رجع لقاكي مكسورة بحطة ايده زي مانتي خلاص حيستمر زي ماهو ومش حتشغليه ولا حيهتم بوجودك أصلا وحيكرهك اكتر لانكب تعكسي صورته الداخلية اللي هو مش عايز يشوفها وحيستفزك ويقرفك طول الاجازة ، خدي بالك انا مش بقول لك تتعافي عشان يرجع لك لا انا بفهمك اللي حيحصل لو تعافيتي ،وخدي بالك كمان انا مش بقول لك تتعافي من الخارج وتغيري ستايل لبسك وتسريحة شعرك وخلاص كدة لا خالص انا بقول لك تتعافي من ادمانه والتعلق بيه يعني تشتغلي على نفسك بضمير
واهم حاجة اذا انتي مجبرة تستمري فلازم تتعاملي بنظام المراية ،حيتعامل كويس اهلا وسهلا بس من غير ماتحسسيه انك راضية عنه ابدا لانه اول مابيحس بالرضا دة بيقلب عليكي ولازم ويعمل لك غضب نرجسي او أي حاجة، ميقدرش يشوفك راضية ويعديها ابدا ،فانتي مهما كان كيوت وجميل عامليه بالحسنى لكن مش بالرضا وماتنسيش انه سايبك سنة صمت عقابي ، ولو اهملك وتجاهلك تتجاهليه وتهمليه وتعيشي كأنه مجاش أصلا لكن انتبهي لا تقطعي الثلاثة سيرفيس مرة واحدة. الخدمة والعلاقة والوقود لازم تحافظي على واحدة منهم او اتنين انتي وظروفك وامكانياتك ،طالما انتي مجبرة تستمري .
المهم في كل دة ان كل واحدة جوزها بيعمل لها صمت عقابي طويل كدة لازم تفهم انها لازم تتعافى تماما عشان تقدر تتعامل صح بعد مايرجع من صمته دا لو رجع لان الصمت الطويل جدا دة بيكون تخلي زي ماقلنا بس تخلي مؤقت يعني بيرجع منه تاني شوفي حلقات( الفرق بين الصمت العقابي والتخلي و خمس أسباب بتخلي النرجسي يعمل لك القاء وتخلي "ديسكارد")
المهم انك سواء دة ولا دة لازم تعرفي تتعاملي ازاي لما يرجع وقدرتك على تنفيذ كلامي ومعاملته بأسلوب المراية حيبين لك انتي تعافيتي اد ايه
28 фев 2022
