النهاردة بقى حقول لكم ليه النرجسي بيتمسك بفريسته و ليه في حالات تانية بيرميها ؟
اولا تعالو نشوف الاول فريسته وصل لها ازاي
احنا عارفين ان النرجسي بينقي نوع معين من الناس ( المقصود هنا نرجسي او نرجسية ) ، اما يختار واحدة لامعة وذات منزلة مرموقة
ونشيطة واجتماعية ولها حياة مليانة نشاط وحيوية ، ودي بتكون بالنسبة له لها فايدتين او حاجتين بيخلوه يروح لها . اولا : انها بتمثل له تحدي وكلكم عارفين المعلومة دي ،
رالثانية انها حتفيده في المجتمع بتاعه ، اما يتفاخر بيها وعشان كدة بنشوف كتير منهم بيمشي مع زوجته وهي شبه عارية عادي جدا من باب الفشخرة ، وطبعا بيتفاخر بمركزها
وممكن تكون غنية وهكذا ، او انه حيستفيد من علاقاتها او فلوسها ، دة غير انه بيشبع نرجسيته بإنه حصل علي اللي محدش عرف يحصل عليه واخد اللي الناس كلها معرفتش تاخده
وطبعا الفريسة في الحالة دي بتكون مصدر فائق للتموين النرجسي له لانه مش بياخدها ويسيبها لامعة ومتألقة زي ما هي ، لا طبعا دة بيبدأ يكسر فيها جزء جزء بدم بارد بدون ماهي تحس
شوية بالقصف العاطفي وشوية بالصمت العقابي وشوية باسلوب الشعللة ، واول مايحس انها حتفلت منه يرجع يعيد من الاول ، وطبعا بيمثل انه العاشق الولهان عشان يقدر يسيطر على مشاعرها
النوع التاني من الناس هي المرأة المتعاطفة الطيبة المثالية المحبة لكل شيء في الحياة ، اللي بتمشي تأكل القطط في الشارع ولو لقت ولد بيعيط تقف جنبه لحد ماتلاقي مامته ، اللي هي
قمة الايجابية والرحمة ، ودي بقى بتبقي مصدر تموين نرجسي عظيم ، ليه بيشكلها بشكل اسهل واسرع من اللامعة المتألقة ، بيستمد من ضعفها الاحساس بالقوة ودي بيروح لها اكتر النرجسي الغني
اللي مركزه مرموق ومش محتاج للعلاقات او الفلوس لان هو محققه ، هو بس محتاج لحد ضعيف يبهدله وكل مازادت معاناة الفريسة كل مازادت متعة النرجسي ، وطبعا دي متشكلة جاهزة
واول مايبص لها ويضحك خلاص سامحته ويكون مثلا خاينها مع صاحبتها ، عادي هي ماحتصدق ترجع له برضه وحتكذب نفسها وتكذب صاحبتها ، لانها عندها مشكلة هي برضه مش سليمة
وغالبا بتكون ابنة لاب نرجسي او ام نرجسية ،
شوفوا بقى المجهود اللي بيعمله النرجسي عشان يشكل زوجته ويعلمها طاعته العمياء ويعلمها تخاف منه وتبقى عايشة في حالة رعب دائم وحالة ترقب لانفجاراته ، وهو اصلا مبيحبش يعمل مجهود وكسول وبيوفر طاقته
ومع ذلك خطط ورتب وفرمت الست وحطها في القالب اللي هو عايزه ، هل بعد كل المجهود دة ممكن يفرط فيها ؟ وهي اكبر مصدر للتموين النرجسي في حياته ، فهل يسيبها ويدور على واحدة تانية يبذل معاها نفس المجهود تاني ولا يخلي دي في البيت حلوة كدة استبن ويروح يلعب بأي فريسة برة من غير مايتعب فيها ويرميها برضه ، ويرجع يلاقي زوجته قاعدة مستنياه وهو متأكد انه حيعرف يرجعها تحبه تاني وحيسترد قلبها تاني
دة كمان ممكن يقنعها انها تقبل خيانته ، او يقنعها انه يتزوج عليها راقصة او فتاة ليل ودة بيحصل فعلا وهي بتقبل وتعيش وتستمر ، لانها تحت تأثيره ولانها فقدت نفسها تماما واصبحت مسخ مشوه هي نفسها متعرفوش
معلش سامحوني على الكلام الصعب دة بس لازم نشوف صح عشان نعرف نفوق ونتصرف صح
كمان هو بيخاف من الرفض بقدر خوفه من الموت عشان كدة بيعند ومش بيطلق او يسيب اللي عايزة تسيبه وممكن يسيبها هو في الاخر
ليه بقى وامتى النرجسي يطلق او ينفصل ؟؟ ودة السؤال الاهم
لما الفريسة بتاعته تخلص. اكلها كلها او تِعطل ، يعني مبقاش منها فايدة مش بتديله اي حاجة ، مفيش تموين نرجسي. ، مفيش فوايد جنسية ولا مادية ، حيدور على زوجة تانية ويتعب نفسه معاها من اول وجديد
ازاي بيحصل دة ، لو الفريسة فهمته وبينت له انها فهمته و قدرت انها تمنع عنه التموين النرجسي بكل انواعه ( انهيارها بسببه ، ضعفها وبكائها ، عصبيتها ، حبها ، خدمته ، ….. اي حاجة كانت بتديها له )
في الحالة دي بس حيرميها ويشوف غيرها، عشان كدة النرجسي قبل مايتزوج تلاقيه عنده ميت علاقة بس مش بيشكلهم مش فاضي هو مش حيشكل غير اللي ناوي يكمل معاها وبيجهزها للمهمة العظيمة اللي حتقوم بيها في حياته ، فمش حيهدر مجهوده بدون مقابل طبعا
تابعونا على الفيس
اكونت الفيس بوك
www.facebook.c...
جروب ادرس عدوك النرجسي
/ kawthersanad11
قناة التلجرام
t.me/learnabou...
26 авг 2024