- لما النرجسي يديكي اللي انتي عايزاه كله بعد فوات الأوان
الكلام النهاردة عن حالات نادرة شوية لكن حصلت مع حالات معايا وحتفضل تحصل طبعا لكن مع الخفي المرموق فقط لانه بيحافظ على صورته لاخر لحظة في عمره
لما تاخدي قرار تسيبي النرجسي او تنفصلي عنه عاطفيا ونفسيا وهو يعرف كدة وهو أصلا مش عايز يسيبك لاي سبب من الأسباب وغالبا دة بيحصل مع النرجسي الخفي الكبير في العمر اللي هو لسة محافظ على صورته وانتي مافضحتيهوش عند اهلك ولسة بياخد منك وقود وخدمة طبعا وممكن كمان علاقة يعني من الاخر كدة لسة بيستفيد منك وفي نفس الوقت مش حيقدر يبدلك عشان سنه كبر وعشان شكله ادام الناس وعشان نسايبه وعشان محدش حيرضى بيه ولا حيخدمه غيرك ،المهم انه متمسك بمصلحته عندك مش متمسك بيكي انتي شخصيا ،لما النوع دة يحس انه حيفقدك بيبدأ يقدم لك عروض خيالية ويبدأ يوهمك انه اتعدل او حيتعدل وحينفذ مبدأيا كل اللي كنتي بتتحايلي عليه على مر السنين وحيديكي حريتك ويخف التحكم ويرفع ايده عن رقبتك وحيلبي طلباتك وحيديكي فلوس شوفي حيعمل كل حاجة فعلا كنتي بتتمني طول حياتك معاه انه يعملها ، وطول ما انتي مش راضية وهو قلقان طول ماهو حيحاول يزود في العطاء وحتشوفيه بقى ملاك بخمسين جناح وكل الناس حتقول لك هو متغير ،هو بقى هادي وكيوت ،
طيب تعالي كدة ندخل جواكي ونشوف انتي حاسة بإيه؟ الزوجات في الحالة دي نوعين ،نوع تممت التعافي ونوع لسة لم تتعافى ،وخلينا نتكلم الأول عن اللي تعافت تماما ونجحت وحققت حاجة في حياتها بالرغم من وجودها معاه الا انها قدرت تسيطر على حياتها ودي حتكون فاهمة كويس جدا هو بيعمل كدة ليه وعارفة ومدركة انها مجرد ماتبين له انها راضية عنه حيقلب عليها ويرجع زي ماكان واسوأ وهو في الحالة دي مش بيرجع مرة واحدة لانه لئيم هو كل شوية حتلاقيه بيجس النبض بغلطة من اغلاطه القديمة ويشوفها حتعديها ولا لا عشان لو عديتها يصعد ولو معدتهاش يعرف حدوده ويحاول محاولة تانية بعدها بفترة ، لكن تعالي بقى نشوف انتي ايه اللي في قلبك ايه اللي انتي حاسة بيه ؟ انتي حتحسي من جواكي بالقرف والاشمئزاز بالرغم من احساسك بالنصر وبإن ربنا جاب لك حقك ولسة حيجيبه اكتر لان انتي مدركة دلوقتي ان النرجسي محتاج لك ومش حيقدر يعيش من غيرك (عشان مصلحته وعشان ضعف) وانتي فعلا مش فارق معاكي وحياتك بعيد عنه حتكون افضل والوضع اتقلب عكس واصبح هو في مكانك زمان لما كنتي بتموتي من مجرد انه يهددك انه يسيبك ، وعلى الباغي تدور الدوائر لكن ليه القرف والاشمئزاز اللي بتحسيه ؟ لانك عارفة ان كل دة كدب وعارفة انه اد ايه هش وضعيف وفي نفس الوقت بتقولي لنفسك لسة فاكر كان زمان ، بتقولي لنفسك ياما اتمنيت دة لكن النهاردة ملوش أي معنى وحالات كتير تقول لو بقى عابد زاهد وتاب واستسمحني ولو حتى قدرت اسامحه الا اني خلاص مش عايزة حبه خلاص خرج من قلبها وحقها لان اللي شافته عشرات السنين معاه مكانش قليل .والنوع دة من الزوجات بكون متطمنة عليها انها مستحيل تقع في الفخ تاني وطبعا بتقدر تتعامل معاه وتسيطر على حياتها معاه وتاخد اللي هي عايزاه بحكمة وذكاء لكن مستحيل حتديه تاني اللي هو عايزه من سيطرة وتحكم واذلال وظلم ،لكن التخلص من مرارة الظلم والمعاناه بياخد وقت طويل والقرب من ربنا بيشفي الصدور
طيب النوع التاني بقى من الزوجات اللي لسة ماتعافتش ولسة بتتمنى انه يرجع لها وانه يتعدل وانها تاخد حقها وانه يقول لها سامحيني انا ظلمتك كتير ،دي بقى اول ماحيبدأ معاها حتجري وتاخده بالحضن وتتخدع للمرة الالف والمرة دي بيكون صعب جدا انها ماتتخدعش لان النرجسي المرة دي نازل بتقله ومستموت وبكل امكانياته المسرحية والتمثيلية لانه المرة دي خسارته حتكون عظيمة لانه مش حيعرف يعوضها والبديل هنا حيكون الوحدة والنبذ وخدي بالك النرجسي لما بيكبر وهو ضعيف ماديا وابوه وامه ماتوا واخواته كبروا في السن وازدادت نرجسيتهم او ماتوا هم كمان بيكون فعلا معندوش مصدر وقود ولا خدمة غيرك عشان كدة بيقدم كل القرابين عشان ماتسيبيهوش لكن اول ماحتاخدي القرابين حيقلب لانه عارفك لسة متعلقة وعارفك مش متعافية لان ضعفك باين له ، خدي بالك اوعي تبلعي الطعم المرة دي اوعي تحسسيه انك راضية واوعي تاخدي الفتات وتقبلي بيها لانك لو رفضتيها حيعرض الكتير هو خلاص معندوش حلول غيرك فاستغلي الفرصة وماتقبليش بالقليل ولو انه مش حيستمر لكن خدي أي حق من حقوقك واشترطي زي ماانتي عايزة لانه في الحالة دي حيقبل شروطك واوعي تنخدعي في طيبته المفاجئة وضعفه وكلامه اللي كله كدب وانه مكانش فاهم انتي عايزة ايه وكان مشغول طول عمره بالشغل وانه يحقق لكم حباة كريمة ،كداب هو كان شايف عذابك وكان سامعك وانتيب تبكي بالليل جنبه وهو سعيد ومبسوط وعامل نايم ، هو كان عارف انك حزينة وبتتمني منه كلمة حلوة وهو كان مش بيقولها عشان يجوعك عاطفيا فلما يقولها تنفذي أي حاجة عايزها في مقابل كلمة مزيفة ،اوعي تنخدعي اوعي تصدقي فكري نفسك باللي كان اوعي تقعي في الفخ
27 май 2022
