حلقات مقترحة
الانترنت الفضائي فى مصر
• الانترنت الفضائي يغزو ...
بوتن وانفجار تشرنوبل
• انفجار تشرنوبل.. لماذا...
إيران تنقذ روسيا
• ايران تنقذ روسيا من ال...
تركيا خدعت الكل
• كيف استغلت تركيا حرب ر...
نهاية الحرب
• ألمانيا تتدخل لإنهاء ح...
يوم 27 اغسطس اللى فات.. قدمت لحضراتكم حلقة بعنوان نهاية الحرب.. وقولت لحضراتكم فيها ان ألمانيا طلبت من الصين تتدخل عند روسيا علشان تنهى الحرب بالتفاوض.. وقتها بعض الناس شككت فى المعلومة وقالت مستحيل ده يحصل.. خصوصا وان الصين من مصلحتها هزيمة أمريكا فى الحرب.. علشان الصين تتسيد العالم من بعدها.. فرجعت شرحت لحضراتكم فى حلقة إيران تنقذ روسيا.. ان وبرغم مكاسب الصين من حرب روسيا واوكرانيا، واللى من بينها مثلا انخفاض أسعار النفط اللى بتبيعهولها روسيا وايران.. إلا إن الحرب برده أذت الصين فى ملفات تانيه مهمة زى التضخم وتعطيل حركة الصناعة والتجارة العالمية اللى بتعتبر شريان الاقتصاد الصينى..
أيوه يعنى يا أبوحميد مع احترامى لحضرتك ولحلقاتك ولشغلك وكل الكلام اللطيف ده.. عاوز تقول ايه؟.. عاوز أقول لحضرتك ان من يومين.. مش بس الصين اللى طلبت من روسيا انهاء الحرب بالتفاوض.. دى الهند هى كمان طالبت روسيا بإنهاء الحرب.. وسيدى المواطن لو اللى قولته لحضرتك ده صدمك.. فخلينى أقولك ع التقيله.. وزير الخارجية الروسي سيرجى لافروف.. قال فى تصريح رسمي خلال اليومين اللى فاتو.. ان روسيا منفتحه على الحوار.. ومش بس كده.. ده الغرب هو اللى مش عاوز يتكلم معانا.. حضرتك تقولى لأ ثانية واحده بقى.. واحكى اللى حصل بالتفصيل.. أقولك عنيا.. ومش بس اللى حصل.. ده أنا كمان هحكيلك قصة الأسلحة الفيزيائية اللى روسيا هددت باستخدامها اليومين اللى فاتو.. تعالا نحكى..
من كام يوم حصلت كام تفصيله كده فى الجمعية العامة للأمم المتحدة.. قلبت ميزان التحالفات فى حرب روسيا واوكرانيا.. أولها مثلا ان الصين والهند طالبوا بإنهاء الحرب عن طريق التفاوض.. طيب طالبوا مين؟.. حضرتك بتوجه كلامك ده لروسيا ولا لأمريكا؟.. محدش وضح.. هما أعلنوا طلبهم كده وخلاص.. لكن موقفهم اتضح بعد ما وزير خارجية روسيا طلع اتكلم على منصة الجمعية العامة للأمم المتحدة.. وهاجم أمريكا واوروبا وقال بالنص.. ان أمريكا بعد نهاية الحرب الباردة.. مفكرة نفسها خليفة ربنا فى الأرض.. شايفه انها بتمتلك الحق المقدس فى تصريف شؤون دول العالم.. واخدين من روسيا هدف وعاوزين يدمروه بأى شكل..
وهنا حد من حضراتكم ممكن تقولى طيب وايه المشكلة.. ما هى دى لستة الاتهامات اللى دايما روسيا توجهها لأمريكا واوروبا.. أقولك تمام انت عندك حق.. لكن احنا بنتكلم عن جلسة فى الجمعية العامة للأمم المتحدة.. بيحضرها مندوبين دول العالم اللى المفروض مدورين الضرب فى بعض دلوقتى.. ولما كل واحد منهم يطلع يقول الكلمتين اللى عنده.. بتأيده ناس وبتهاجمه ناس.. فالمفروض لما وزير خارجية روسيا يطلع يقول الكلمتين دول.. يبدأ مندوبين باقى دول العالم اللى حاضرين.. يدعموه أو يهاجموه.. وبما إن الصين والهند من أهم حلفاء روسيا فى الحرب دى.. فكان المفروض هما أول ناس يدعموه ويساندوه.. زى ما الرئيس الصينى كده طلع فى بداية الحرب وأعلن دعمه لروسيا وقال ان علاقتهم محدش يقدر يكسرها..
إلا إن فى جلسة الجمعية العامة للأمم المتحدة وبمجرد ما وزير الخارجية الروسي خلص كلامه.. محدش قاله انت ابن مين حتى.. محدش دعمه.. محدش قاله انت صح.. مفيش غير رئيس وزراء مالى.. هو اللى اتكلم عن التعاون بين بلاده وبين روسيا.. لكن طبعا دعم مالى لروسيا غير مؤثر وسط العتاولة اللى قاعدين.. على رأى الفنان توفيق الدقن.. هى الناس كلها بقت فتوات؟.. أمال مين اللى هينضرب؟..
المهم.. مكنتش دى المفاجأة الوحيدة لوزير الخارجية الروسي.. اللى كان مستنى دعم الصين والهند.. أو الصين ع الأقل.. استنادا لتصريح الرئيس الصينى اللى قال فيه ان علاقتهم غير قابله للكسر.. المفاجأة الأكبر بالنسبة له.. لما وزير خارجية الصين.. طلع وقال ان موقف بلاده واضح من الحرب.. وهو منع انتشارها.. بالبلدى كده احنا مش عاوزين الحرب دى تستمر.. تنتهى المفاجآت هنا؟.. الإجابة طبعا لأ.. ده قال الكلمتين دول.. ونزل قعد مع وزير الخارجية الأوكراني.. ودى أول محادثات تجمع الصين وأوكرانيا من يوم ما الحرب بدأت.. وهنا سيدى المواطن اللى حصل ده مش محتاج شرح.. الصين بتقول للعالم كله إن موقفها من الحرب اتغير.. وانى بشكل علنى ورسمي ولو عاوزنى أمضى وأبصم.. مش عاوزه الحرب دى تستمر..
هل تنتهى المفاجآت هنا؟.. الإجابة طبعا لأ؟.. طلع من بعده وزير خارجية الهند.. وقال ان دول كتير بتسأل عن موقف الهند من حرب روسيا وأوكرانيا.. طيب.. خلينى أجاوب حضراتكم وأقولكم ان الهند بتدعم السلام وليس الحرب..
سيدى المواطن عاوزك تاخد بالك هنا من تفصيله مهمه فى العلاقة بين الهند وروسيا.. روسيا بالنسبة للهند أهم مورد للسلاح.. ومش أى سلاح.. الهند بتعتمد على روسيا فى استيراد السلاح المتطور اللى تقدر من خلاله تواجه النفوذ الصينى.. حضرتك تقولى لأ ثانية واحده.. انت مش لسه قايل ان الهند والصين واقفين مع بعض دلوقتى ضد روسيا فى صف أوكرانيا؟.. ازاى بقى الهند بتستورد سلاح من روسيا علشان تواجه بيه الصين؟.. وازاى أصلا روسيا تدى الهند سلاح علشان تهدد بيه الصين اللى هى كانت لسه من يومين حليفة روسيا؟.. هو مين مع مين يا أبوحميد؟.. أنا تهت..
من المصادر
bit.ly/3LQx7CP
on.wsj.com/3ftUIxn
politi.co/3ffItEg
bit.ly/3xYU2WU
bit.ly/3xUamZ9
bit.ly/3fsIxAQ
bit.ly/3BR00dF
bit.ly/3SrIZhq
bit.ly/3CibkRi
bit.ly/3DZZyMM
bit.ly/3rbIhsz
bit.ly/3DYwNjC
bit.ly/3DV9ebw
bit.ly/3Rm7VFo
#المواطن_سعيد #روسيا_أوكرانيا
bit.ly/3Rp2HsC
27 сен 2022