تقسيم إيران 

حلقات مقترحة
العركة ابتدت
• حرب روسيا على اوكرانيا
الصين باعت روسيا
• تخلى الصين عن روسيا وت...
إيران تنقذ روسيا
• ايران تنقذ روسيا من ال...
تركيا خدعت الكل
• كيف استغلت تركيا حرب ر...
مصر تنقذ اوروبا
• مصر تنقذ أوروبا من قبض...
نهاية الحرب
• ألمانيا تتدخل لإنهاء ح...
هزيمة بوتن
• فضيحة بوتن بعد ضرب قاع...
العقوبات طلعت فشنك
• حرب روسيا وأوكرانيا
لو حضرتك لسه متعرفش فإيران بتعيش نفس اللى عاشته مصر وتونس وسوريا وليبيا فى ثورات الربيع العربى.. صحيح لسه الموضوع موصلش لدرجة رحيل النظام.. لكنه وصل لمرحلة الاشتباكات المسلحة بين الأهالى وبين الحرس الثورى الايرانى.. وده مش كلام صحف غربية.. دى تصريحات الدولة الإيرانية.. اللى اتهمت جماعة جيش العدل السنية.. بتنفيذ هجمات مسلحة ضد مراكز الشرطة.. بالبلدى كده ايران بتقول ان أهل السنة فى ايران بيهاجموا أقسام الشرطة.. واللى كان نتيجتها بالتزامن مع المظاهرات اللى انتشرت فى باقى المدن الايرانية.. مقتل ما لا يقل عن 80 مواطن ايرانى.. بينهم 2 ظباط من الحرس الثورى الايرانى.. واصابة اكتر من 500.. واعتقال أكتر من ألف متظاهر..
ولو اللى حضرتك سمعته ده صدمك.. فخلينى أقولك ان مش ده اللى وجع النظام الحاكم فى ايران.. أكتر حاجه بتهدد النظام دلوقتى.. هى تقسيم ايران.. ايران مهددة بالتقسيم.. فمثلا الأقلية السنية فى ايران عاوزة تستقل بمنطقة سيستان بلوشستان.. ودى منطقة موجودة فى جنوب شرق ايران.. وقريبة من باكستان وافغانستان.. وبتتركز فيها جماعة البلوش.. ودى جماعه من السنة بتتعرض للاضطهاد الايرانى من وقت للتانى.. ورغم ان منطقتهم غنيه بالبترول والدهب.. إلا انهم كسكان.. بيعتبروا الأفقر فى ايران كلها.. وده زى قولنا بسبب اضطهادهم من النظام الايرانى.. وبالتالى المظاهرات اللى شغاله دلوقتى.. جاتلهم ع الطبطاب.. فقالك احنا نستقل ونأسس لنفسنا دولة منفصلة..
طيب دول البلوش.. مين تانى في ايران عاوز يستقل؟.. قالك اقليم الأحواز.. أو الأهواز.. أو اللى ايران غيرت اسمه لاقليم خوزستان.. طيب دول عاوزين يستقلوا عن ايران ليه؟.. قالك لان هما كمان حاسين بالاضطهاد.. أيوه ليه يعنى؟.. هقولك.. قبل ما الخمينى ينقلب على شاه ايران.. كان على اتصال بـالشيخ الخاقاني.. القائد الروحي للأهواز واللى دعم الثورة الايرانية ضد شاه ايران سنة 1979.. لحد كده الأمور بين الأهواز وبين النظام الايرانى تمام.. حبايب لحد دلوقتى.. لكن يفاجئوا بمجرد تمكن الخمينى من الدولة الايرانيه.. انهم كإقليم غالبيته برده من السنه.. مضطهدين.. مفيش خدمات.. مفيش رعايه.. مفيش مستوى معيشه محترم.. حتى مايه الشرب الحكومة سرقتها منهم؟.. تقولى ازاى الحكومة تسرق المايه من شعبها؟.. أقولك سنة 2018 فوجئ سكان اقليم الأهواز.. اللى ايران تعمدت تغيير اسمه لخوزستان.. ان الحكومة بتغير مجرى نهر كارون ناحيه مدن تانيه زى أصفهان..
طيب هى ليه ايران تعمل كده؟.. ليه تميز بين شعبها؟.. أقولك الله ينور عليك.. ده سؤال مهم.. بيقول أهل الأحواز.. ان ايران عاوزه تجبرهم على الهجرة من الاقليم؟.. ليه برده؟.. علشان تعيد توزيع السكان.. فبدل ما كل اقليم يبقى مسيطر عليه جماعه واحده.. قالك لأ.. أنا أجى على اقليم الأحواز أقلل كثافته السكانية من أهله الأصليين.. وأبدلهم بسكان أصولهم فارسيه.. وأعمل نفس الموضوع مع سكان اقليم البلوش.. وبالتالى أضمن ان الأقاليم دى متطالبنيش فى المستقبل بالانفصال.. ما البلوش لما يتجمعوا فى مكان واحد.. قوتهم تزيد.. وكلمتهم تبقى واحده.. فلما تحصل أى مشكلة كلهم بصوت واحد هيقولوا احنا عاوزين ننفصل.. انما لما اغير التركيبة السكانية لاقليم البلوش او اقليم الأحواز.. وأقلل نسبة الأحواز فيه من 100% لـ 20%.. ساعتها حتى لو الأحواز طالبوا بالاستقلال.. فباقى السكان الجدد اللى أصولهم فارسية هيرفضوا الاستقلال.. وساعتها صوت الأحواز يبقى ضعيف.. ما خلاص.. بعد ما كانوا 100% من سكان الاقليم دلوقتى بقوا 20% بس.. يعنى ملهمش صوت تقريبا.. فيقوموا يسمعوا الكلام وينفذوا اللى يتقالهم عليه.. وصلتك الفكرة؟.. وزود بقى مع الأحواز والبلوش الاخوة الأكراد..
الأكراد فى ايران عددهم تقريبا 10 مليون كردى.. ودى نسبة كبيرة من سكان ايران اللى عددهم 84 مليون تقريبا.. لكن ورغم عددهم الكبير ده إلا إن ايران حرماهم من حقوقهم السياسية زى التمثيل البرلمانى.. رغم ان أكراد تركيا مثلا دخلوا البرلمان التركي من سنة 2015.. وزى أكراد سوريا والعراق اللى بيتمتعوا بحكم ذاتى.. إضافة لحرمانهم برده فى ايران من الحقوق الثقافية زى تدريس لغتهم.. وهنا كان قرار قادة المعارضة الكردية فى ايران.. انهم يهربوا على العراق يعارضوا من هناك.. واستقبلهم ورحب بيهم صدام حسين اللى كان هو نفسه بيحارب ايران..
من المصادر
bit.ly/3Vmpzfo
bit.ly/3Vjbmjo
bit.ly/3Ms1XCo
bit.ly/3g3LDv6
bit.ly/3Co11Kp
bit.ly/3CNarke
bit.ly/3yxKLFQ
bit.ly/3rOBEMW
bit.ly/3g3LKqw
bit.ly/3erGsF5
bit.ly/3EvafHz
bit.ly/3CS0Mcg
bbc.in/3yASdQu
bit.ly/3TcPHaN
bit.ly/3S249Sg
on.wsj.com/3SW...
on.wsj.com/3Vx...
#ايران #المواطن_سعيد