خيرت الشاطر - محمد أبو شقره 

سنة 2013 مصر كان فيها ظابط فى قوة مكافحة الإرهاب اسمه الظابط الشبح.. واكتسب اسمه ده من العمليات والمهمات اللى اتكلف بتنفذيها.. زى عمليات جبل الحلال وغيرها من العمليات اللى لسه مجاش الوقت علشان يتم إعلان تفاصيلها..
الظابط ده لما كان ضيف مهم يزور مصر.. كان هو اللى بيتم تكليفه بحمايته.. زى مثلا هيلارى كلينتون وزيرة الخارجية الأمريكية واللى اترشحت لرئاسة أمريكا.. وجون كيرى وزير الخارجية الأمريكية واللى قال للظابط المصرى ده بالنص.. كنت أتمنى تكون ظابط فى الجيش الأمريكى..
الظابط ده كان مصنف ضمن أخطر 10 ظباط فى الداخلية المصرية.. وعلشان كده كان من ضمن الظباط اللى تم تكليفهم بالتحقيق فى قضة خطف 7 جنود مصريين داخل سيناء على ايد جماعات ارهابية..
نرجع نكرر هنا التاريخ.. الكلام ده كان سنة 2013 وقت تولى الرئيس الدكتور محمد مرسى وجماعة الإخوان حكم مصر.. المهم نرجع للظابط.. مش عارف لسوء حظه علشان اتحرم من أهله ولا لحسن حظه علشان استشهد والتاريخ خلده.. ان القدر جمعه مع المهندس خيرت الشاطر مرتين.. الأولى لما كان مكلف بتأمين وزير الخارجية الأمريكى جون كيرى اللى كان بيزور مكتب الإرشاد فى القاهرة.. ووقتها افتكر خيرت الشاطر انه نفس الظابط اللى كان مكلبشه سنة 2009 فى عزاء والدته علشان ميهربش.. واللى حصل ان فى 2009 خيرت الشاطر كان مسجون.. لكن والدته توفت فاستئذن وزارة الداخلية علشان يحضر الجنازة.. فوافق وزير الداخلية حبيب العادلى لكن بشرط ان اللى يحرسه لحد ما يرجع السجن.. الظابط الشبح اللى هو النقيب محمد أبو شقرة..
لما افتكره خيرت الشاطر حاول يمنعه من دخول المكتب مع جون كيرى.. لكن محمد أبو شقره رفض وحصل بينهم صدام كان هيتطور لاشتباك بالايد.. وبرده خيرت الشاطر منسيش ده..
وفى 2013 وخلال شغل محمد أبو شقره على قضية اختطاف الجنود المصريين فى سيناء.. طلع عليه عربيتين دفع رباعى فى العريش.. نزل منها 7 مسلحين وضربوا عليه نار.. محمد أبو شقره مكنش لوحده زى ما التحريات أكدت.. لأن كان معاه ربنا وثواب الطفل اليتيم اللى تكفل بيه فى حياته.. محمد طلع طبنجته الميرى واشتبك مع 7 ارهابيين مسلحين ببنادق آلى مطوقينه من الأربع جوانب.. ورغم كده قدر محمد يوقع منهم واحد قبل ما ترتاح فى صدره 4 طلقات وفى دراعه اليمين 3 تانيين.. وفى اللحظة دى الإرهابيين مش قتلوه.. لكن ساعدوه انه يقابل وجه كريم ويكون من بين اللى قال ربنا فيهم أحياء عند ربهم يرزقون.. نحسبه عند ربه من الشهداء..
نرجع للسبع جنود المخطوفين اللى محمد أبو شقره أو الظابط الشبح كان مكلف بالتحقيق فى خطفهم.. ايه اللى حصل وايه علاقة ده بموضوعنا.. أنا أحمد سعيد وده اللى هنعرفه النهاردة فى حلقة جديدة من المواطن سعيد..
علشان تضمن ان نتيجة المعادلة تكون صح.. لازم أرقام المعادلة نفسها تترتب صح.. طيب تعالوا كده نرتب الأحداث دى..
الخميس 16 مايو 2013 تم الإعلان عن خطف 7 مجندين فى رفح.. وكان ملخص مطالب المختطفين هو الإفراج عن متهمين فى أحداث قسم تانى العريش..
فى نفس اليوم استدعى الرئيس محمد مرسى وزير الدفاع عبد الفتاح السيسي ووزير الداخلية محمد ابراهيم لاجتماع فى رئاسة الجمهورية علشان يناقشوا اللى حصل..
وهنا المفروض الـ 3 أطراف بيشتغلوا على القضية سوا.. لكن ده عكس اللى هنشوفه كمان شوية.. خصوصا بعد ما الرئيس محمد مرسى قال جملته الشهيرة "الحفاظ على سلامة الخاطفين والمخطوفين"..
تانى يوم.. اللى هو الجمعة 17 مايو.. عماد عبد الغفور مساعد الرئيس محمد مرسى زار شمال سيناء علشان يقابل رموز التيارات الإسلامية اللى المفروض هيكونوا حلقة الوصل مع الإرهابيين..
وفى نفس اليوم قال مصدر أمنى إن قوات مشتركة من الجيش والشرطة هينفذوا حملة أمنية خلال 48 ساعة لو الجنود متمش الإفراج عنهم..
السبت 18 مايو.. الجيش التالت بعت تشكيلات من مختلف الأسلحة علشان تشارك الجيش التانى فى عملية تحرير الجنود المختطفين..
فى نفس اليوم اجتمع الرئيس محمد مرسى تانى مع وزير الدفاع عبد الفتاح السيسي ووزير الداخلية محمد إبراهيم.. ومدير المخابرات محمد رأفت شحاته علشان يناقشوا تطور الأوضاع فى القضية..
الحد 19 مايو.. الجنود وأفراد الشرطة التابعين لمصلحة أمن الموانى قفلوا منفذ العوجة التجارى مع إسرائيل.. وده نفس الإجراء اللى نفذه أفراد أمن معبر رفح البرى اللى برده أضربوا عن العمل قبلها بيومين..
فى نفس اليوم الرئيس محمد مرسى قابل رؤساء الأحزاب ورموز القوى السياسية وشخصيات عامة علشان يناقشوا قضة اختطاف الجنود..
المصادر
bit.ly/3vOWIEE
bit.ly/3Kojad4
bit.ly/3EOa3Ba
bit.ly/3ke5wif
bit.ly/3w5nLvR
bit.ly/3vOWPA4
bit.ly/3xWbs7B
bit.ly/3EOagnW
bit.ly/3khpvwd
bit.ly/3vkZgeW
bit.ly/3xXkotg
bit.ly/3khfjEc
#المواطن_سعيد #خيرت_الشاطر #محمد_أبوشقره