رجلي عزت الجزء الاول 

✅ رجلي عــزّت 💚
نامت ونا سهــــران رجلي عزت
والأوهام بـ غياب العزيزة لزت
مــاهيش كيف العـــادة
اللي قبل يالاهم تزيد زياده
فاقدة عزيزة غالية ودادة
داريتها شور النواحي كزت
داريتها شور الأوهام
تقول غير ماهيش ليا
ننزل عليها لـ قــدام
لي لاوراء تشد فيــا
لو كانها غير الأقدام
بكره يخفن شـــويه
وياريتهن غيرالأقسام
لطـــن وفشلت الغيه
لو كان خطأ سمح الأبسام
نختـــــار ونجيب مية
هذا صدر للسر كتام
سواية اللي دار سيه
هذا حن نشهاه مادام
مــُـــودع وداع المنية
هذي فراقها كي الدمدام
ليه و مـــــاهيش ليه
هذي على طول الأيام
والعمـــر تبقى رضية
هذي تجلويل وحــزام
وصخـاب ما ريت زيه
هذا تعوريج ووشــام
وخــــدود كيف الثريه
أرداواتها كيف الإحرام
أنظـاف ونظيفة النيه
هذا بيت فلجان وأكمام
بـــارمه عليه بـــدوية
مدقـــــوق طق ملزام
يبان بيتها في الثنيه
وإليا جيتها ضيف تكرام
حتى وعشـــــاها قلية
هذي حمول وعريج ورقام
وغـــــراره ومخلة وحوية
هذي ستار وسناح منقام
وميعــــاد خديجة وهنية
هذا قِدر ومغـــرف ورزام
مرأة طايبة ما هيش نية
هذا عيش مش ني وإدام
هذا فم ما يقـــــول كية
هذي فراقها كي الدمدام
ليه و مــــــاهيش ليه
هذي على إيدين عـــزام
رعي قزنها وهي صبية
بيت عز للجـــرح ضمام
حضـــــاها فقيرة غنية
يحلف يهندب الوســـام
توسملهــــــــــا برشنية
رمي دويمعه فوق الخطام
وديدة ومنيحه وهــدية
ما نيش نســاي ذمام
وهذا حق جـــدي عليا
لاي شادة كتب لا أقلام
لاي قـــــارية غير ذكية
هذي صيتها كيف الإعلام
أم بي والحـــــق بية
علي بات سيف الإسلام
تزغرت وتفـــرح بـ جيه
تبكي علي موت صدام
نهار أنعدم كي الضحية
هذي ناقصه غير الأوسام
وطـــــابور شرف وتحية
جـــــاراتها كيف الأيتام
غـــــــابت عليهن وحيه
ندعولها بـ حسن الأختام
عــــدت هدية رضيه
أنا اليوم حسيت الفطام
كبـــدي فــــــزت
دارت عزاء فـ الغالية وتعزت
••