#شوف #قصتي تقترح عليكم قصص #واقعية و قصص #حقيقية لأشخاص راسلونا بش نحولو تجربتهم لقصة #مصورة.
قصة أيوب رجاوي و يسير ودادي قصة شباب كيموتو على كرة القدم و فراقيهم, ونهار ديربي بين الرجاء البيضاوي و الوداد البيضاوي وقع بيناتهم مشكل ... شوفو و حكمو !
_ _ _ _ _ _ _ _ _ _ _ _ _ _ _ _ _ _ _ _ _ _ _ _
واحد السلام عليكم, انا ياسر وجيت نعاود لكم اشنو طرا ليا انا وعشيري ايوب بسباب الديربي, ماتمشي فين تباع معايا تاللخر, ونتا دايز دايز تابونا مع راسك و ورك على الجرس باش تبع الجديد ديال لاشين!.
انا تزاديت فحي شعبي والواليد كان ودادي ماشي غير بالسمية, كان ودادي ديال بصح تيموت مع الفرقة, تخيل معايا ملي كنت باقي صغير , على ماكالت ليا الوليدة, تيكلسني حداه فالماتشات وتيلبسني توني ويبدا يوريني اللعابة.
من الجهة الاخرا ديال الدرب كان واحد السيد جارنا وصاحب الوالد من الصغر كانو عشران فكلشي الا حاجا وحدا... الكورة!!! فيلما تيتلاقاو تتكول شويا وغادي يكلبوها مطايفة. حيت كان رجاوي حتى الموت ,حتا هو تزاد عندو ولد صغر مني بعام, لي هو ايوب, وملي حل عينيه لقا كلشي خضر حتى من الصباغة ديال دارهم خضرا. فاش كبر ولا رجاوي متعصب ديال بصح.
ندوزو للطفولة السعيدة ديالنا ونشوفو كفاش دوزناها. فاش بدينا تنكبرو فالوقيتة ديال التحضيري, الثاني بحال هكاك, ولينا تنزعمو شويا وتانخرجو حدا باب الدار وتنبقاو النهار كامل تلعبو ونجريو فالزنقة, انا ملبسيني توني ديال الوداد وايوب توني ديال الراجا ولي داز كان تيطلعها علينا, كانو مسمينا الاخوان شوقي. وحنا باقي صغار ماعلا بالناش.
فاش تيكون شي ماتش... ديربي ولا ماشي ديربي... تتلقانا ديما تنتفرجو مجموعين ايما فالقهوة ولا فدارنا ولا دارهوم, وا!!! تنتفكر ديك الوقت تاتشدني البكية, تخيل معايا جيران وصحاب فدار وحدا, لعيلات تيوجدو القص وحنا تنتفرجو فالماتش, وانا وايوب مافاهمين والو غير دايرين لومبيونس كنا خالقيينها من والو.
الصحبة لي جمعات والدينا هي لي خلاتنا قراب وعشران, ملي كان تيجي الصيف تنتحركو للبحر مجموعين ولا تنمشيو الغابة ندوزو الويكاند...
فاش بدينا تنكبرو شويا ولينا تنزعمو كثر, عرفتي فاش يالله تاتبدا تكتاشف دروبا جداد ؟ وتاتبقا عاقل على داركم فين جات؟ تاتحس براسك حررتي الصحرا, من برا تاتحس براسك بطال ولكن من الداخل تاتنهج وقلبك تيدردك وحابس لبكية على بونت كنتي غادي توضر غير تخراج العينين والجبهة وبالكشايف باش تتلقا الدار. خصوصا ملي تتكون وقيتة ديال المغرب.
فهاد المرحلة وليت انا وايوب تانعرفو دراري ولاد دروبا بعاد وكل مرة تنعرفو شي ماركا جديدة, ايلا كان شي واحد قبيح تانكلبو الدورة ويلا كان درويش تنديرو له الطقوس وندخلوه معانا. شويا بشويا بدات تتكون العصابة. وهاد العصابة اش تديركاع؟ تاتبقا تجري فالزناقي وتصوني على عباد الله وكتعلق .عالام كنا خالقين السعادةمن والو.
كنا مقصمين العصابة لجوج فراقي ديال 3-3 انا الكابتان ديال فرقتي مسميها الوداد وهو لكابتن ديال الراجا حتى هو بتوني ديال الراجا, لمهم هو عايشيين الدور. وكانت مازال تتبان علينا شويا ديال البرائة. من بعد ملي كبرنا ولينا تنعرفو بزاف ديال بنادم وتلعبو على درهم ولا جوج دراهم, مع ديك الساعة كنا يالله بدينا تنكتاشفو تخصار الهضرة وتخراج العينين دزنا نيفو اخر فالمعاطيا.
حتى لهنا مازال تنتفرجو مع والدينا فالقهوة ولا فالدار, ولينا حتى حنا تنعطيو تحليل ديالنا فالماتش وتنحسو براسنا راه تنكولو شي حاجا زعما, بلا ماردو البال, مع اللعب على الفلوس و داك التعصب على الفرقة ولينا فيلما نتلاقاو نبقاو شادين فبعضياتنا حتى تنبداو نتشانقو, هاد الفترة كانت البداية ديال مرحلة جديدة فالصحبة لي بيني وايوب.
بدات القضية من وقيتة ديال الاعدادي, ولا ايوب تايزعم بزاف وباه مامسوقش حيت كاليك باغيه يولي حربي, ولا تيديبلاسا مع الراجا فيلما مشات, مرا تيبات فالبحر مرا فالمحطة مهم ديما مجلوق, تايمشي للتيران سالت وديما واكل الدق. ولكن واخا هكاك كنت تنحسدو مسخوط كان الحلم ديالي نمشي نتفرج فالتيران ولكن الوليد كان تايخاف بزاف ومزيرني وياويل مي شي نهار نقصح وجهي ونتحرك مع الدراري للتيران.
ولكن حد هنا مازال عشران تنقصرو ماتشات مرا مرا وتنتفرجو مجموعين ملي ماتايمشيش يديبلاسا, ولكن خونا ولا تيتبدل ولا تيخرج شييي هضرة من فمو... ولا عاصابي كتر من القياس, ولا تايعايرني انا نيشان مابقاتش غير الفرقة, بالنسبة ليه انت ويدادي مايعقلش عليك مايحملكش, ولكن كنت عارف هادشي منين جا حيت باينا العما, ولا تيخرج مع واحد الكليكا غير وجوه الحبس وباه ما كانش راد البال, حتى لقرايا مابقاش تيمشي لها بزاف والواليد ما كانش موالفا له, ولكن ملي شاف لبلان بحال هاكا كاليا ماتبقاش تعمر معاه بزاف, واخا تيبقا فيه ولكن الغالب الله باهمامسوقش اش غنديرو له؟
ولات خونا حياتو هي الراجا ملي تكلس معاه وهوا طاطاطاطاط تيفرع لك راسك بالكورة, ونفس الحوايج لي تيكول اليوم تايعاودها لك غدا وبعدو.ناري خصوصا فواحد الوقيتة لي كانت الرجا مزال تتقصر مزيان وديما جايبا شي لقب, حقدني على الكورة والوداد وليت تنكوله انا خويا وليت زموري غا قلب على -طيط- انا.
هاد المزحلة ماعرفتش كيفاش ولكن وليت تانرد البال فبلما مشيت القهوة, الطاكسي فالزنقة كولشي تيهضر غير على كورا كلشي تيحلل-كليشي كون جابو فلان كون دخل فلان - تانبقا نكول مع راسيشوف دابا المغرب كامل سبحان الله تيفهم فالكورة وعندنا مشكل ديال اللعابة والمدربين؟
....
_ _ _ _ _ _ _ _ _ _ _ _ _ _ _ _ _ _ _ _ _ _ _ _
مازال ماشتركتي فالقناة يوتوب ؟ هاهو رابط الاشتراك : bit.ly/chtirak
بغيتي تابعنا على فيسبوك ؟ هاهو رابط الحساب : bit.ly/choof9issti
23 ноя 2019