يا ليل يا ليل السهر ومجاذب طروق القصيد
انا خويك والمهمة حددو توقيتها
متوكلٍ بالمستعان الخالق البر المجيد
ولاّ القصيدة لو عصت سويتها سويتها
الحمد لله لي مكان ولي حضور ولي رصيد
مافيه عيطا تتعب الشعّار ما ذبيتها
أحيان اغني من غضب واضرب بكفٍ من حديد
واحيان ياما الورق بكتني وانا بكيتها
امدح به القرم الكفو وارثي به الحر الفقيد
وافخر وافاخر في بني عمي ليا طريتها
الابتعاد من المنابر من بعيد الى بعيد
جربتها والظاهر ان التجربه حبيتها
لكن على داعي الرفاقه ولا ابن عمٍ عضيد
عقبني الفنجال كان ابطيت مالبيتها
يامرحبا سلم الجدود الي تورثها الحفيد
يامرحبا يامرحبا لضيوفنا ثنيتها
بسم ابو فارس راعي الوقفات والرأي السديد
وبسمى عيال كناد لضيوف الحفل عديتها
يبو حسن جاك الجديد الي مهو عندي جديد
مبطي والامداح الجزيله بيتها في بيتها
انت ابن عم نفتخر بك فاللزوم ونستزيد
من صفوة عيال الرجال الي يذعذع صيتها
يكفي ان ابوك الي عسى عمره على الدنيا مديد
تفخر به ابيات المدايح كل ماغنيتها
يخو علي هذي القليل من الشعور الي يزيد
ان كمّلت ياطيبها وان قصرت وفيتها
الله يبارك لك بطيب الفال والحظ السعيد
ولاّ القصيدة لا استوت سويتها سويتها
22 сен 2024
