يا قلب ياللي بالهواجيس مليان
قسم همومك بينا بالتساوي
يا قلب من شكواك انا دوم حيران
الله يعين اللي على الصبر ناوي
يا ونتي ما ونها كل وجعان
ويش ينفع الوجعان كثر الشكاوي
وين الصبر وانا عن الصبر عجزان
والرجل عجزت عن جميع الخطاوي
ولجوح جوح الذيب لن شاف زيلان
فارق رفيق العمر وأصبح خلاوي
لصيح صيح اللي وقع بين عديان
وتناشلوه بقطعات الشهاوي
ويا طير يا قاطع سهالات ووديان
وصل سلامي من على جنح خاوي
ودي وهات الرد يا طير باوزان
وانا اعتبرني لك صديقن مخاوي
من دمع عيني يرتوي كل عطشان
شبه الخليج اللي به السيل داوي
قلبي غدا للهم ملعب وميدان
وظهري انجنى من بعد ما كنت ارشاوي
فراق الحبايب شط قلبي بنيران
وأتحمل النيران من يد كاوي
ومن لامني يا ناس في حب الاعيان
يموت وما يلقى لجرحه مداوي
25 фев 2019
