حياكم
سناب
@al.2omy
انستقرام
@al.2omy
تيلجرام
t.me/al_2omy
..
ابيات القصيده👇
..
ياهيه ياللي للرسائل تودي
دونك رسالة عمر وانحر بها زيد
قصيدةٍ كأنك لها مستعدي
مامثلها باشعار بعض القواصيد
تلقى عليها بصمتي من مشدي
مهي علوم مجمعين الهرابيد
ياقلت ردي يفحم الخصم ردي
اختار وأقطف دانيات العناقيد
الشعر في سوقه وسعره يحدي
مثل الذهب تلقى به اصلي وتقليد
ياهيه كانك بالرساله تسدي
اسرع بها مني وانا أعطيك تعميد
وصلت من صبري على الغبن حدي
بانت على وجه الزمان التجاعيد
ود الكتاب لعقب جدي وبدي
وقله ترى ليل المشاكل سراميد
قل ردها يانسل أبويه وجدي
تراي مابين الفشق والبواريد
ياخوي كانك شفتني لاتصدي
ماعاد فيها ياعضيدي تصاديد
ياخوي ياخليتني من تبدي
يشره عليك الديد ياراضع الديد
تسكت وانا كف الزمن دار خدي
ماأظن تسكت ياسليل الصناديد
صبرت لكن بيح الصبر سدي
الساق حزه وازعجه قاسي القيد
كديت لكن ضيًع الوقت كدي
الدخل به نقصان والصرف تصعيد
تجمعت كل العراقيل ضدي
في كل يوم يصادف الوضع تعقيد
أخذ واعدي وارجع أخذ واعدي
يارب سترك من كلام المقاريد
أجمع وأودي وأرجع أجمع وأودي
أخشى شماتة كل هامل وعربيد
راحت حياتي بين جزري ومدي
ولمواجه المذموم لا أرغب ولا أريد
هذاك لا ندك ولاهو بندي
بعض الحروف أحيان تحتاج تشديد
والريح لو زمجر هواها تعدي
مافيه ريح بصوتها هزت الحيد
والنزل لو يبطي مصيره يشدي
العمر يجري والمنايا مواريد
واللي تعشى عند غيرك يغدي
عندك ولا يحتاج ياخذ مواعيد
كل الدروب لدرب واحد تودي
رؤس السنابل تنتظرها الحواصيد
ولا والله البس ثوب ماهو بقدي
ولا أقول شيئ الا دعمته بتأكيد
ما دام طرفك يم وجهي يلدي
خذها عهد ماهمني زيد وعبيد
خابرك للروس الصعيبه تهدي
ياقامت الرمضا تضامن مع البيد
اليا اختفت ضحكات هزلي بجدي
فعلك مثل فعل القرانيس بالصيد
يمناك للهزله حشا مأتمدي
تجلى عن الصدر الحزين التناهيد
ياخوي مدري وين أوجه وأشدي
مدري بعكس السيد والا امسك السيد
ضاقت على من وين ما أمشي وألدي
من منفذ البطحاء لحزم الجلاميد
الصبه اللي شفتها ما تندي
يومين تعطينا وشهرين تسديد
وأبن رمال لكل تايه يقدي
وعما ماذكر عجلان لا أنقص ولا أزيد
الله على دورٍ مضى لو يردي
يوم الليالي عندنا كلها عيد
يعل خرجا ما لاهلها المقدي
من يوم صرنا ناخذ الشاي تقصيد
3 май 2021