عزي لحالي كان هذي فعايلك =عزي لحالي كان هذي سواتك
قلت مصافيطك وشانت عمايلك =تتبع ورى الدنيا صباحك بياتك
قطعت حتى يا عضيدي رسايلك =وقطعت بي عقب المواصل صلاتك
ياخوي وش بدًل طبوعك وبدلًك =وخلاك تركض لين تيبس لهاتك
اركض ولكن لا تبدًل خصايلك =اركض وكفًر سيًتك بحسناتك
ان كان عني جمع الأموال مشغلك =تكنز ملايين ولهن مكفياتك
ارتح وكأنه بالشريعة تعاملك =عيشة مدينه كامله من زكاتك
ياخوي انا غصبً عليك انت أمثًلك =جزءً مهم بحافظة ذكرياتك
تذكر معي يوم اني أفرك بسيكلك =يوم انت تلحقني حصاتك حصاتك
دايم معك شاهد بحقك وباطلك =من لعبة الطًنب لسبع حجراتك
وتذكر معي فن القواطي مع السلك =مافيه قوطي ماصدح بغنياتك
حاولت اشوفك واتصل بك واقابلك =ولا لقيت اسمي على مذكراتك
مكتبك عيا ما عطاني موبايلك =يقول حول العشر موبايلاتك
سته لجمع المال واثنين للكلك =واثنين للشًعار ومجاملاتك
عطني دقايق بس ماني معطلك =الله يحقق لك جميع امنياتك
ياخوي ما شاء الله هذولا عيًيلك =صاروا شباب شحلوهم من حلاتك
فيهم مثايل وجه أبوي ومثايلك =بذرك حب ومات يرجي نباتك
كنت الكبير وكان دايم مدللًك =تذكر معي وش قال لك في وصاتك
عليك باخوانك تراهم قبايلك =وأمك ولا تنسى ضعيفة خواتك
أخوك أخوك ان كان قلتً وسايلك =يصير دونك كان يبست شفاتك
أخوك أخوك ليا اختفى من يجاملك =درعك ليامرك خدينك وفاتك
أخوك أخوك ومن جرت بأمره الفلك =أغلى عياله ما يعادل غلاتك
ياخوي انا مغليك يوم اني ازعلكً =ابيك تجمعني وانا اجمع شتاتك
ياخوي جادلني وبالحق اجادلك =صمتي تفجر وانت فجًر سكانك
ليتك تبدًل يا عضيدي وابدلًك =أقلها ابعد شرهتي عن شماتك
آخرك ليتك ماخلطته على اولك =ولاذاب حلتيتك بسكر نباتك
ارجع واذا قصدك غلا لايعطلًك =تعتاش عالم بالغلا من فتاتك
الملك ياخويه تبع صاحب الملك =بكره تموت ولاتفيدك غناتك
اللي صعد بك فوق يقدر ينزلك =ماروحن بك للسماء راجعاتك
ياخوي اناأعارفك ماني بجاهلك =في ذمتي ماهي بهذي صفاتك
ركزً معي ببيات جزله وتذهلك =كان الضماء حدك تراني فراتك
تبي الدليل اللي يعقًل رحايلك =عسى مماتي قبل حزة مماتك
لو مت جعل الله من العمر يمهلك =يبكن بناتي قبل يبكن بناتك
ياخوي انا ماني ورى الموت شايلك =ابيك شًيال الثقيل بحياتك
ياجيت حاديني ضماء القيض والهلك =أحط راسي حدر فجت عباتك
#فرحان_قيران #فرحان_العنزي #تصميم #نظم #شعر
10 сен 2024