كيف ماتت مارلين مونرو 

يوم 5 أغسطس سنة 1962.. وتحديدا الساعة 3 الفجر.. تلاحظ الداده اللى كانت مرافقة للفنانة مارلين مونرو فى بيتها.. ان نور أوضة مارلين لسه منور.. لسه منور رغم انها دخلت تنام الساعة 8.. ولأن الدادة كانت عارفه كويس ان مارلين بتمر بظروف نفسيه صعبه.. قررت انها تقوم تطمن عليها.. خبطت على الباب لكن مارلين مردتش.. ندهت عليها أكتر من مره.. لكن برده مارلين مبتردش.. جريت على التليفون تتصل بالدكتور النفسى بتاعها واللى كان ساكن قريب منهم.. وصل الدكتور بسرعه.. ولف لشباك أوضة نوم مارلين مونرو اللى بيبص على الجنينه.. شافها نايمه على السرير وسماعة التليفون واقعه من ايدها.. والأوضة مكركبه كما لو كان حد اتخانق معاها.. ده غير ان فى أدوية كتير واقعه على الأرض.. بسرعة كسر ازاز الشباك.. ودخل الأوضة فتح للداده من جوه.. حاولوا يفوقوا مارلين لكن مارلين مبتفوقش.. اتصلوا بسرعه بالإسعاف اللى جت خدت مارلين وطلعت بيها على المستشفى.. لكن قبل ما يوصلوا المستشفى تموت مارلين مونرو فى عربية الاسعاف.. فيرجعوا بيها تانى على بيتها ينيموها فى سريرها.. ويتصلوا بالشرطة يبلغوهم إن مارلين مونرو انتحرت..
وهنا أكيد حضرتك بتسأل نفس السؤال اللى أنا نفسي بسأله لنفسي.. هو المريض لما بيموت فى عربية الاسعاف.. بيكملوا بيه على المستشفى.. ولا بيرجعوا بيه على البيت ينيموه فى سريره ويبلغوا الشرطة انه انتحر؟.. تصرف غريب صح؟.. طيب هتقول ايه لما تعرف ان روبرت كينيدى المدعى العام الأمريكى وأخو جون كينيدى الرئيس الأمريكي.. هو اللى كان بيتخانق معاها فى أوضتها قبل ما يلاقوها ميته؟.. هتقول ايه لما تعرف ان التحقيقات كشفت ان الطب الشرعى أكد ان سبب الوفاة هو ان حد ادالها نوعين أدوية ضد بعض قبل ما تموت.. هتقول ايه لما تعرف ان مارلين مونرو كانت على علاقة محرمه مع الرئيس الأمريكي جون كينيدى.. وأخوه روبرت كينيدي المدعى العام الأمريكي.. وخد المفاجأة الأتقل.. مارلين كانت على علاقه بيهم الاتنين فى نفس الوقت.. تخرج من عند ده تدخل عند ده.. وتخرج من عند ده تدخل عند ده.. طيب هتقول ايه لما تعرف انها كانت فى وقت من الأوقات حامل.. وفجأة الطفل اختفى.. هتقول ايه لما تعرف انها كانت على علاقة بالشيوعيين فى نفس الوقت اللى كانت بتحضر فيه تجارب أسلحة نووية أمريكية مع الرئيس جون كينيدى؟..
سيدى المواطن.. النهاردة بإذن الله هحكيلك قصة أجمل نساء هوليود.. البنت اللى كانت أول جوازه ليها قبل ما تكمل 16 سنة.. واتجوزت بدل الراجل 3.. ده غير العلاقات المحرمة طبعا.. النهاردة هحكيلك بنت كانوا بياخدوا منها مقاييس الجمال.. أيقونة الدلع والإثارة فى تاريخ السينما العالمية.. مارلين مونرو.. البنت اللى تربعت على عرش الإغراء فى السينما الأمريكية.. وماتت قبل ما تكمل 36 سنة..
طبعا أى حد من حضراتكم يعرف مارلين مونرو.. أكيد بيقول ايه الجمال والطعامة والفلوس والعيشة المرتاحة دى ؟.. لكن سيدى المواطن خلينى أفاجئك وأقولك.. ان مارلين مونرو كانت أتعس بنت على وجه الأرض.. وخلينى أحكيلك..
اسمها الحقيقى.. نورما جين مورتنسن.. اتولدت يوم 1 يونيو سنة 1926 فى مدينة لوس انجلوس الأمريكية.. أمها كان اسمها غلاديس بيرل مونرو.. اتجوزت أكتر من مرة.. ولحد ما مارلين مونرو ماتت.. مكنتش تعرف مين هو أبوها الحقيقى.. أمها واللى كان اسمها غلاديس كانت علاقتها الغرامية كتير.. وفى أواخر أيامها تتعب بمرض الشيزوفرينيا.. وتدخل أكتر من دار رعايه.. وبما إن مارلين مونرو مكنتش تعرف أبوها الحقيقى.. فبدأت تعيش كل شويه فى بيت شكل.. شويه عند قرايبها.. شوية فى دار رعايه..
لدرجة انها دخلت 11 دار رعاية وهى صغيرة.. وسنتين فى دار أيتام.. و4 سنين تحت وصاية راجل متعرفوش.. لدرجة ان هى نفسها فى تسجيل صوتى ليها كانت بتقول.. انا مكنتش مجرد بنت يتيمة.. انا كنت مشرده.. وعمرى ما عرفت طعم الفرحة.. عمرها ما فرحت.. لكن ورغم كده لما تشوف صورها.. تلاقي دايما الابتسامه على وشها.. زى ما طول الوقت برده كانت مبتسمة وهى فنانة مشهورة.. الناس كلها فاهمه انها أسعد انسانه خلقها ربنا.. وهى عايشه على المهدئات ومضادات الاكتئاب.. زى ما هنشوف كمان شوية..
المهم فضلت مارلين فى الدوامة دى لحد ما بقى عندها 16 سنه.. اتعرفت على شاب أكبر منها بـ 5 سنين.. حبوا بعض.. وحست ان أخيرا فى حد هينقذها من العذاب اللى بتعيشه.. تقولى عذاب ايه بالظبط يا أبوحميد اللى تقصده.. انا ملاحظ ان الموضوع كبير.. أقولك ان أكتر حاجه كانت بتعذبها.. هو احساسها بإن ملهاش حد.. أبوها متعرفوش.. وأمها غايبه عن الدنيا ومش دريانه باللى حواليها.. واخواتها من أمها غير الشققا.. من أب تانى يعنى.. كان لها أخ وأخت.. الأخ مات وهو عمره 16 سنه.. والأخت هربت وعاشت بعيد عن أهلها.. فتقريبا كده تقدر تقول ان طفولة مارلين مونرو كانت مفككه لأقصى درجة.. مكنش فى طفوله أصلا.. لا أب ولا أم ولا اخوات.. مفيش حاجه خالص..
المهم اتجوزت وهى عندها 16 سنة زى ما حكيتلك.. وكانت طايره من الفرحة بالجوازه دى.. كانت بتحب جوزها جدا.. أخيرا لقت حد يعوضها عن الحياة الأسرية اللى اتحرمت منها فى طفولتها.. لكن مفيش سنه.. وجوزها يجيله شغل فى أسطول بحرى.. ويسيب مارلين ويطلع يشتغل.. تمر السنين وميرجعش.. لسه عايش.. لكن مرجعش لمارلين.. والبنت قاعده بتشتغل أى حاجه تاكل منها عيش على ما جوزها يرجع.. لكن مبيرجعش.. فقامت رافعه عليه قضية طلاق واتطلقت.. ورجعت مارلين من تانى لحياة الوحدة اللى اتجوزت أصلا علشان تهرب منها..
طول حياتها كان بيراودها حلم واحد.. وهو انها تبقى عارضة أزياء.. وفعلا.. في ديسمبر سنة 1945، تشارك فى اختبار اعلان لملابس سباحة.. وفي فبراير سنة 1946، صبغت شعرها علشان تقدم إعلان شامبو.. المهم.. بالصدفة تقابل وكيل مواهب اسمه جونى هايد.. الراجل ده كان بيكتشف المواهب علشان يقدمها للسينما.. كان غنى جدا.. وشبكة علاقاته مرعبه..
المصادر
Goddess: The Secret Lives of Marilyn Monroe
Book by Anthony Summers
#المواطن_سعيد #مارلين_مونرو