لمبة الزيت ! و أسباب إنخفاض ضغط الزيت ! وأعراض إنخفاضه 

السبب وراء انخفاض ضغط زيت المحرك وأعراض انخفاضه
اسباب اضاءة لمبة الزيت
وميض لمبة الزيت
رعشة لمبة الزيت
ضغط الزيت في موتور عربيتك وظيفته ضمان وصول الزيت لكل اجزاء الموتور المتحركة اللي بتحتاج تتزيت
و من الطبيعي جدا لو الضغط قل عن الطبيعي يبقي في اماكن مش هيوصلها زيت اما بقي لو زاد عن الطبيعي هيضطر يشوف اضعف مكان علشان يسرب الضغط الزايد ده من خلاله و يعمل تسريب للزيت
أعراض لانخفاض ضغط الزيت
اول عرض هيكون لمبة ضغط الزيت اللي في لوحة العدادات .. لان من الطبيعي اول ما تفتح كونتاكت بس في عربيتك ان لمبة الزيت بتنور لانها مش لاقيه اي ضغط زيت في الموتور بس بمجرد تشغيل الموتور بتبدأ طرمبة الزيت في ضخ الزيت و بالتالي حساس ضغط الزيت او ساعه الزيت زي ما بيسموها بتحس بضغط الزيت جوه الموتور و تدي اشارة لكمبيوتر العربية اللي بدورة بيطفي اللمبة اللي قدامك في لوحة العدادات , و علشان كده لو حصل و ضغط الزيت قل و انت ماشي العربية هتحس بنقص الضغط و هتنور معاك لمبة الزيت و في الحالة دي لازم تبطل العربية فورا
و تاني عرض بقي هو سخونة المحرك ، لان من الطبيعي مع نقص ضغط الزيت هيكون في زيادة في الاحتكاك و بالتالي سخونة في المحرك
و تالت عرض هو رائحة الاحتراق ، و ده بيكون نتيجة ان في زيت اتسرب بره المحرك و بالتالي بدأ يتحرق و يتبخر مع سخونة المحرك
و رابع عرض هو ظهور لمبة فحص المحرك (Check Engine) مع مراعاة طبعا ان في حوالي 50 سبب تاني في عربيتك ممكن يشغلوا لمبة فحص المحرك
و خامس عرض ضعف أداء المحرك ، هتلاحظ أن لما بتضغط علي البنزين التسارع مش هوه اللي انت متعود عليه و ده نتيجة زيادة الاحتكاك .
دلوقتي تعالوا نتعرف علي اسباب انخفاض ضغط الزيت
و اول حاجه هي لزوجة الزيت الغير صحيحة بمعني ان الزيت غير مناسب ويفضل استخدام الزيت الموصي به من الشركة المصنعة للسيارة.
و تاني حاجه هو حدوث تأكل في عمود الكامات، او المساند بتاعته
و تالت سبب لو في اي خلخل في عمود الكرنك و السبيكه دا هيأدي لتقليل ضغط الزيت في النصف العلوي للموتور
و رابع سبب هو تآكل في تروس مضخة الزيت.
و خامس سبب انسداد مدخل مضخة الزيت او انسداد مصفاة الزيت او وجود سدد في ممرات الزيت.
و ده بيكون بسبب وجود شوائب زي السليكون اللي بنستخدمة في عمل الجوانات و بيكون ليه زوائد جوه المحرك
و السبب السادس هو ثقب في أنبوب (ضخ) الزيت.
أو تسريب في توصيلات أنبوب الزيت.
و السبب السابع عطل في مقياس الضغط. او ساعه الزيت او حساس ضغط الزيت
و رقم 8 تسرب الهواء من جانب مضخة سحب الزيت.
اما بقي بالنسبة لاسباب زيادة ضغط الزيت جوه الموتور بيكون في الغالب بسبب اننا حطينا زيت زيادة في الموتور ازيد بكتير من علامة الماكس علي مقاس الزيت و بالتالي الضغط ده هيدور علي اي مكان يخرج منه زي الاويسيلات او الجوانات او بلف التبخير و في الاخر هتلاقي تسييل زيت من مناطق كتير في الموتور