مرجّعش ليك البنك الفلوس لي مشاو لك فالگيشي؟ ها علاش.. 

اليوما بغيت نهضر ليكم على واحد القضية كانلاحظوها بزاف فالشكايات ديال الناس على الفلوس لي كايمشيو ليهم فالگيشي..
وهي أنه كاينين واحد النسبة من الناس من بعد مكاياخدو البطاقة البنكية كايزيدو مع الطريق مباشرة وكاينساو الفلوس..
هنا كاينين 3 الإحتمالات:
- يا إما كتخليهم وكتزيد وكايكون تابعك شي ولد الناس كايخاف الله وكيفكرك فيهم..
- يا إما كيرجعو للگيشي حيت ماكان تابعك حتى حد لي ممكن يعطيهم لك ولا ياخدهم..
- يا إما كان تابعك شي واحد مكايخافش الله وخداهم وهرب..
1- الإحتمال الأول مزيان حيت كتشد فلوسك فالبلاصة..
2- الإحتمال الثاني إلى كان نفس البنك كيدخلو لك الفلوس ف 48 ساعة على الأكثر..
3- الإحتمال الثالث للأسف البنك معندو باش ينفعك.. حيت الگيشي كيحسبها عملية عادية جدا كأنك نتا لي خرجتيهم.. وهادشي شفناه مرارا لناس مالقيناش فلوسهم فالگيشي، يعني مازايدينش وماطايحينش فالكاسيطة ديال les rejets..
حتى إلى درتي شكاية وشافو ديك الرولو لي كيتسجلو فيه العمليات la bande mouchard غادي يبان فيها بحالا نتا خرجتيهم وشديتيهم بيدك..
كاين لي غايقول راه كاينة الكاميرا ديال الگيشي.. راه ميمكنش يقبل البنك يخرج صور فيديو الكاميرا إلا إلى كان إذن من المحكمة..
ونزيدك راه أغلبية البنوك مدايرينش الكاميرا..
عارفين الراس ديال المواطن المغربي عامر ومشطون ولكن ضروري من الحيطة والحذر..
تحياتي..