"مواجهة الوحش" ضريبة التعافي من العلاقة النرجسية 

ضريبة التشافي
كنت اعطيه دخلي بالكامل ولما تعافيت منعته منه وبقيت اصرف على نفسي واولادي فقط (لبس واكل )، عايزني اسدد ديونه باني ابيع دهبي وانا رفضت رفض بات ،دخل في صمت عقابي وانا رديت بصمت عقابي .. السؤال وماذا بعد؟ كيف اتصرف معاه ؟ ، عايزة اعرف هو ناوي لي على ايه ،هو عقلاني ومثقف جدا وعديم المسئولية ،بيحب أولاده وولا مرة استخدمهم ضدي ،بيكون شخص سوي جدا لمدة لا تزيد عن ٢٠ يوم وبعدين يقلب لاتفه الأسباب ، وصمت عقابي لمجرد اني لم اتفق معه على فكرة او أي شيء تافه ، هي عايزة تعرف هو بيفكر فيه ايه وناوي لها على ايه خصوصا انها بدأت تقول لا وتنفذ اللأ
خلينا نحلل الحالة كدة واحدة واحدة
أولا هو نرجسي عقلاني ،يعني ايه يعني مفيش علاقة حميمة غير بالذل اذا قدرت تاخدها أصلا ، وكمان بتصرف كل دخلها يعني تقريبا هي شايلة كل المصاريف ، فاضل ايه تاني ممكن نقول عليه رجل او زوج عشانه؟ لا علاقة حميمة ولا بيصرف ، يعني سواء نرجسي ولا مش نرجسي فين الزوج هنا؟
دلوقتي هي فاقت ومنعت مرتبها عنه وبقت تصرف على نفسها وأولادها بس ، فهو كدة بفكرة مكسب مكسب بتاعة النرجسي هو خسر فلوسها فيعمل ايه ؟ عايز ياخد الدهب بتاعها ، ماهو انتي لازم تتجردي من أي فلوس تكون معاكي ، كمان هو حس انها بدأت تكون قوية وتقول لا يعني مش بعيد تمشي وتسيبه وانتوا عارفين ان النرجسي بيخاف من الهجر فإزاي يمنعها تهجره وتسيبه يجردها من الدهب اللي ممكن تركن عليه ، او انه شايف انه من حقه ياخده قبل ما هي تاخده وتمشي ، المهم انه لازم مايطلعش خسران بأي شكل ،
خدي بالك حكاية انه بيحب أولاده دي مش حقيقية هو مش بيعرف يحب أصلا ، لكن بيحب نفسه الصغيرة يعني نفسه وهو طفل فيهم ، خليهم يكبروا ويبقوا مراهقين او شباب وانتي حتشوفي العجب ، اما انه عمره ما استخدمهم ضدك فماتعتمديش على كدة ليه؟ لانك كنتي طوعه وكنتي بتصرفي عليه وسامعة كلامه وهو متطمن ومش محتاج يستخدمهم ضدك وكمان هم لسة صغيرين لسة ماينفعش يستخدمهم ضدك وكمان هو مش محتاجهم دلوقتي ولا يفكر يضغط بيهم دلوقتي لانهم عبء لسة مش حيستفيد منهم ولسة محتاجين رعاية وعناية هو مايقدرش يقوم بيها فاستخدامهم ضدك مش حيكون في مصلحته دلوقتي ، شوفي بقى لما انتي بدأتي تقولي لا وبتمنعي الفلوس عنه ،ممكن يبدأ يزرع جواهم انك الساحرة الشريرة وانه المظلوم المسكين ، راقبيه وحاولي تشوفي بيقول لهم ايه من وراكي الفترة الجاية ،
ازاي تتصرفي معاه ؟ ولا أي تصرف انتي تثبتي على اللي انتي فيه وابعدي دهبك عن البيت فورا اوعي تقولي لا مايسرقوش ولا مايقدرش ياخده غصب عني ، اكم من ازواج سرقوا دهب زوجاتهم ، اوعي تخلي الدهب في متناول ايديه ، دي اول حاجة تاني حاجة مالكيش دعوة هو بيفكر في ايه ولا بيخطط لايه هو غبي أصلا مهما كان متطلع وقاريء ، واحنا بقينا فاهمين خطواته وحفظناها ،لما بيغلب بيعمل غضب نرجسي وصمت عقابي واخره يعمل تشويه سمعة ، يعني حيعمل ايه غير كدة ، الفكرة بس انك تكوني مستعدة نفسيا لاي حاجة يعملها ،
المشكلة انه ممكن يحاول يكسرك بالزواج مثلا من واحدة تانية او انه يطلقك فجأة دة اخرهم ،فلو انتي تعافيتي فعلا مش حيفرق معاكي بس المهم تكوني تعافيتي .
خططي انتي بقي وتوقعي فعلا انه يسيبك لانك كدة بدأتي تعطلي كمكنة فلوس فيا أما حيحاول يصلحك بالهوفرينج او بالغضب النرجسي ولو ماتصلحتيش حيرميكي ويدور على واحدة تانية تصرف عليه وتخضع له ، كوني مستعدة جدا ، لكن طبعا دة مش شرط انه يحصل لكن خدي حذرك