ازاي توصلي النرجسي للجنون ؟هل الضحية تقدر تعمل دة؟
الفيديو معمول للي بقت قوية تقدر تسيطر وتلملم بعد ماتجننه او الضعيفة اللي عايزة تطفشه ومش عارفة
حقول لك عشر حاجات لو عملتيهم حتجنني النرجسي فعلا
١- متخافيش ،اول حاجة ممكن ترعب النرجسي انك تكوني مش خايفة منه ، خوفك من النرجسي من اهم الركائز اللي بتديه وقود نرجسي وتحسسه انه راجل وانه قوي وانه احسن منك فلو حس انك مش خايفة منه يعني هو مش بيتميز عليكي ومش اقوى منك يعني هو فاشل في انه يخوفك ويسيطر عليكي ،حتى لو كنتي خايفة مثلي انك مش خايفة انا عارفة انه صعب بس بالتدريب والتدريج حتقدري
٢- هو بيحصل على تقديره لنفسه من تقليله وتحقيره لكي ،طيب لو انتي حسستيه ان التقليل والتحقير دة مش شغال معاكي يعني ردودك عليه دايما ان دة رأيك ويخصك لوحدك وانا واثقة من نفسي طبعا بدون أي انفعال ، او انك تبصي له بابتسامة صفرا كدة ومترديش ، انتي كدة بتضربيه ضربتين من تحت الحزام زي مابيقولوا والضربتين دول بيجننوه جدا الأولى انك بتحسسيه انه فشل انه يحقرك ويحطك في القالب اللي هو عايزه والتانية انك مش بتحسسيه انك فعلا قليلة فيحس ان هو كتير وانه عظيم على حسابك وبالتالي الإحساس انه له قيمة انتي بتحرميه منه
٣- كالعادة حفضل أقول لك قولي لا ، قوليها بالتدريج ،الأول في الهزار وبعدين حيتعود يسمعها منك بس كلمة لا منك بتنزل عليه كالصاعقة وبتضعفه جدا
٤- ابدا ماتسمحيلوش يجرجرك للعبة مكسب خسارة غير للضرورة القصوى (شوفي فيديو ازاي تتلاعبي بالنرجسي مشروح فيه لعبة مكسب خسارة) ولازم اذا دخلتي اللعبج تكوني متـزكدة انك حتقدري تخلي النتيجة مكسب مكسب . خليكي دايما محسساه انك رافضة اللعبة من أساسه وانك مش ناوية تنخرطي معاه في منافسة ابدا لان دة اكبر هدف من أهدافه في الحياة انه يثبت لنفسه ويثبت لك انه احسن منك وانه دايما كسبان المنافسة معاكي ودة بتلاحظيه لما تتكلمي معاه في أي حاجة تخصك تلاقيه يقطع عليكي الكلام في نصه ويقول لك "لا انا كذا ..." فهو طول الوقت بينافسك حتى في المرض بينافسك انه بيتوجع اكتر منك وانه بيحزن اكتر منك وبيحب اكتر منك هو أي حاجة اكتر منك وخلاص ، ولما تحسي انه حاسس انه كسب جولة لازم تحسسيه انك كمان حاسة انك كسبتي الجولة بانك تحسسيه انه هرب مثلا من الرد او انك مش مقتنعة برده او انك ما اتأثرتيش أصلا بكلامه وشايفة برضه انك على حق وانه مش فاهم حاجة
٥- اخرجي من تحت سيطرته (ازاي تخرجي من تحت سيطرة النرجسي) الحكاية دي بتفقده أصلا السيطرة على اعصابه
٦- مش محتاجة أقول لك طبعا انك ترفضي المجادلة والتفاعل في حالة الغضب النرجسي والجاسلايتينج
٧- رجعي علاقاتك اللي عزلك عنها خصوصا اهلك واخواتك وصديقاتك المقربات الموثوق فيهم واللي تكوني متأكدة انه مش حيعرف يستخدمهم كقرود طائرة ، خدي بالك لو لكي صديقة نرجسية او اختك او امك حتلاقي علاقته بيها قوية جدا وحتلاقيه يحاول يوفق بينكم وعايزك معاها علطول وحيدافع عنها طول الوقت لانه طبعا بتثبت لك انه صح وانتي اللي غلط وان هم اللي طبيعيين وانتي اللي فيكي حاجة غلط
٨- بطلي تكوني قرد طائر للنرجسي ،ماتوافقيهوش على الغلط ولو بينك وبين نفسك وماتجمليش صورته ادام حد ابدا لان حييجي يوم يتقال لك مش دة اللي كان حلو ومثالي وكنتي بتدافعي عنه
٩- متصدقيش مبرراته واعذاره الهشة اللي ملهاش أي علاقة بالحقيقة ولازم تحسسيه انك مش مصدقاها ومش مقتنعة بيها
١٠- اكتر حاجة تقتل النرجسي غيظا وكمدا انك تكوني عايشة في سلام وسعادة مع اولادك ويدخل يلاقيكم ملمومين في حضن بعض وقاعدين قاعدة صفا وضحك وانبساط ،بيدعي عليكم في ساعتها من كتر الغيظ ،
24 фев 2022
