ياراكب اللي كاملن بالتواصيف
جيبن يقرب نازحات الفيافي
بترول فل ابشن على غاية الكيف
توايره وتروس قيره نظافي
من وارده يلمع ولا به تلاصيف
مثل العروس اللي بثوب الزفافي
يدوي مثل حس الرعد بالعواصيف
ويلحق مراويح الحمام المجافي
ويهوي هواي مضومرات الشواحيف
خطرن من اللفات بلا انحرافي
راعيه ماحسب كثير التكاليف
يسوق مطلوب الثمن مايخافي
وان كان به ماصورتن تبي تنظيف
بدل مواصيره وغير مصافي
ماحط به برغي تجاري وتزييف
كبريتره بخاخ والبلب صافي
ابو مبارك مايبيله تعاريف
قرمن من عيال الضباعه سنافي
من رووس ربعن يكسبون المعاريف
من يوم عسرات السنين العجافي
شوق الهنوف اللي زهت بالنفانيف
اللي ربت على الشرف والعفافي
ابيك تاخذ حاجتي لـ اطرف السيف
ومثلك يكلف بالامانه ويافي
اسلم وسلم لي على خالي مريف
وعطه الشريط اللي عليه الاغلافي
عودن اعزومه باللوازم مزاهييف
على الكرم نفسه عسفها عسافي
بالجود يرقى نايفات المشاريف
وافي وله كفن من الطيب وافي
يشرهه المحتاج ويعشي الضيف
ويمد جزلات العطايا خوافي
لو يعطي الموجود ماقال ياحيف
على اللوازم لو يخسر الالافي
عدن ليا ورد الرجى بالمغاريف
يروي معاطيش الجهام الهيافي
وليا حضر في كايدات المواقيف
صارت هزيلات الشدايد اخفافي
افعل وخذ من مد يمناك تعريف
وكلن على قده يمد اللحافي
هذا وانا اللي بالتماثيل حريف
اللي شكى الفرقى وطول التجافي
من واحدن جت من اعلومه طواريف
عندي يساوي لابسات الغدافي
عنق العنود اللي تروم الجفاديف
مارتكع الا فوق رووس الشعافي
سملوق وسمن شايخن باول الريف
غفرن سحابه باول الوسم ضافي
اليا مشى عودن مذرى عن الهيف
وليا وقف زولن من البطن هافي
يتل مجدول اشقرن له فضاضيف
يضفي على هاك القوام النحافي
ويغضي بسودن قاسياتن معاطيف
مضرابهن باقصى المعاليق خافي
كن الحجاج الي التفت خط بمريف
والرمش ضباطن وصف اصطفافي
حلاياه ماتوجد بلندن وبجنيف
ولاحتى بزين الشعب الاسكندنافي
هذاك سيد ضامرات السراجيف
عليه من زين البشر مايضافي
ياخال حبل الوصل بين المواليف
تقاطعوه اهل العقول الخفافي
واصبح علي ابعد من الحزم وطريف
زود على الوقت الردي المجافي
وطرد العذارى والبني الغطاريف
منهن شكى بصري وصقر النصافي
اللي عليهن ياخذون الملاقيف
يوم النصايح بالمضى والملافي
كم واحدن راحت حياته تحاسيف
منهن ولا ذاق الثمان الرهافي
يقوله اللي شرف الشعر تشريف
اليا تمثل يصخر القاف صافي
على الورق كلفت الاقلام تكليف
وصدرت في بيض القراطيس قافي
اغوص بالقبه بليا مجاديف
وابحر بها بعزوم ماهي ضعافي
مثل الجواهر من جميع الاصانيف
والذ من در المباكير دافي
ومدحت مقدامن تعلى على النيف
خالي وخل العفن يقعد خلافي
قصايدي في مدح غيره خذاريف
لوهي مثل نقش الجواهر تعافي
ولا الردي طيبه مثل بارد الصيف
يروح عمره ميت النار طافي
تحسب انه ياخذ الحق ويخيف
وهو ليا ضاعن الارياء عوافي
ليا حكى لك زيف الحكي تزييف
يولف الاخبار مثل الصحافي
تمارق الايام مثل الخواطيف
والادمي عن حكم الاقدار غافي
ان جاه يومه والمنايا ملاهيف
الدايم اللي كل ناله ضعافي
ويالله يامنشى المزون المراديف
غرن لهمم ما تشيل الرجافي
ياواحدن يعبد له وهو مابعد شيف
ذكره على كل المخاليق ضافي
انك تحرسه من جميع الصواديف
ويصبح بـ امانك طيبن ومتعافي
حتى ليا جانا خبر خالي مريف
كلن يقول بخير مابه خلافي
كلمات الشاعر الكبير ؛ عيد غنيم الصعصاع .
23 сен 2024
