#يا_سهيل
كلمات : فارس سلطان
اداء : جزاع المري
بعد فت ياعيد الضحيه ولك يومين
على اللي من التكبير ماوقف لسانه
ان الله اكبر زادني بالشعر تمكين
وان الحمدلله حط لي عنده ميانه
جماهير شعري من كثر ماهم بشفقين
لو ابطيت عنهم ضاقوا تقول ديانه
وانا ماقنعت ببيت عادي ولابيتين
ابي بيت في وقت الرهن يكسب رهانه
والا ياسهيل بغيبتك كن لك سنتين
عيوني لجل شوفك لها وقت سهرانه
متى تطلع ويطلع معاك الغثا والبين
زهقنا من البيت المسوّر وجدرانه
ابي جو خالي فيه يمتد شوف العين
ولا ابغى سوى اللي عدني حسبة اخوانه
على كثْر ماخاويت عالم مامنه اثنين
عسى الله يسقي بالحيا دار جدانه
يزين القنص بديارهم والقصيد يزين
ليا اشرفت راس الجوزلي جتني الحانه
رقته الحرار الشقر وامسى به الشاهين
وانا مثلهم نفسي من العز مليانه
ماسقت القصيد بشرهة الالف والالفين
على واحدً مافك للضيف بيبانه
اسوقه رجاء اللي فزعته للعباد تعين
ولاغيره اللي يفرج الهم سبحانه
طلبته يجيب اللي ثمنها يسد الدين
تسر الصديق وحاسدي تكحل اعيانه
من اجرى الفروخ العابره ماهي بتهجين
ولاحط بيضتها العرادي بـ ضيـانـه
له السوق يشهد مادخل به بطيرً شين
لكن المهاجر خانته بالحشا خانه
عليها جناح اليا شلعت مستحيل تبين
تقول اصبع مصلي دخل باخر اركانه
خذت من سواد الليل الاظلم لها ثلثين
وخذت من ولي العهد بطشه بعدوانه
تمتع ب جرم عقاب وثنينهم جبرين
واذا جا الهدد يبطي ولو ضف جنحانه
وبها من وليفً خصني بالمحبه زين
لو الاسم ماهو صح سميت شيهانه
عساها نصيبي قبل ماندخل العشرين
عطيه من اللي كلنا نرجي احسانه
#فارس_سلطان
23 сен 2024
