١- لما تتكلمي معاه تلاقيه يتاوب او يمسك موبايله ولو اعترضتي حيقولك معلش مش مركز او انه مشغول او تعبان ، متصدقيهوش ، اذا مسمعكيش في بداية علاقتكم تأكدي انه عمره ماحيسمعك ، دي من الطرق المهمة لتقييم تعاطفه من بدري اللي مبيسمعلكيش مش بيتعاطف معاكي ابدا .
٢- العظمة في الحب ، العظمة جزء من خيال النرجسي فلما يدخل العلاقة عن طريق قصة حب عظيمة وخيالية وورود وترابيزة في مطعم وعازف الكمان والكلام دة كله قصة الحب العظيمة دي لازم تقفي وتفكري كتير لانه بيصور لك انه حبه مثالي وعظيم يصل لحد الكمال ودة مش منطفي لان مفيش حاجة كاملة اصلا ، مفيش مانع انك تحسي انك محبوبة جدا لكن المهم اذا قالك انه حيعيشك طول العمر في الوضع دة يبقى لازم تعرفي انه بيكذب لان الحب العظيم والخيال الرومانسي مش حيتفق مع تغير بامبرز ولا مذاكرة الاولاد ،…. المبالغة في الحب والاهتمام في اول العلاقة يعتبر علامة حمراء
٣- لاحظي معاملته مع موظفي الخدمة في اي مكان عام (زي الكافيهات ،السنيما ، صف السيارات البواب ) اما يغازل اذا كانت بنت على اساس تفخمه في الخدمة واذا مفخمتوش ححيقلب عليها ويهزءها او لو ولد او رجل يعامله اسوأ معاملة وبازدراء او يتلكك ويزعق للي ادامه كأنه خدام عنده وبدون سبب ولو كان خفي يقعد يقولك انا مش عارف عملت كدة ليه ويبين انه زعلان وبعضهم بيرجع يصالح اللي بهدله عشان يسترجع صورته ادام باقي الناس وبالعكس حيقولوا دا طيب وحنين … دي علامة حمرا مهمة
٤-انتبهي لو حسيتي انه بيتلعب بيكي عادة مش بتنتبهي للتلاعب دة بس حقولك عبارات لما تسمعيها من خطيبك لازم تفكري وتراقبي وتشوفي هو نرجسي ولا لا زي : انا مريت بطفولة صعبة عشان كدة احيانا اقول حاجات مش بكون قاصدها . او انا محطوط تحت ضغط عشان كدة انفجرت . او انتي اقرب واحدة لي عشان كدة باجي عليكي . او حقيقي انا مقصدتش اللي قلته ابدا دي لحظة غضب .ودة اسمه تلاعب بالمشاعر والامثلة كتيييير .. اما التلاعب المادي ودة اسوأ واوضح والمفروض يوقفك ومفيش حاجة اسمها نظام انجليزي وكل واحد يشيل نفسه لان احنا مجتمعنا لسة موصلش لكدة وفي نفس الوقت هو نفسه مش منفتح للدرجة دي واكيد انتي بتشوفي دة في تحكماته فيكي ، المهم اذا حسيتي انك بتتحملي مسئوليات مادية اكتر منه وانتوا مثلا بتجهزوا بيتكم وفرحكم ، او لقيتي نفسك بتصرفي فلوسك عشان تستمر العلاقة او عشان البيه يرضى يبقى لازم تنهي العلاقة دي فورا ، او لو كل مايجيب لك هدية يفضل يقولك اي خدمة وكل شوية يفكرك بيها انه جاب وعمل
٥- الغضب النرجسي ، اكيد مش حيتوجه لك وانتي مخطوبة او على الاقل مش في او الخطوبة ، لكن اذا مشفتيهوش متوجه لكي حتشوفيه متوجه لغيرك ، لنفس الناس اللي قلنا عليهم في رقم ٣ موظفي الخدمة ، وممكن افراد اسرته ، وومن تلاحظيه وهو سايق تصرفاته شكلها ايه بيقطع الطريق على حد عمل حركة ضايقته بالغلط او يشتم ويلعن ، او انه يسوق بطريقة فيها خطورة لو حصل بينكم اي تاتش .
٦- الشك والارتياب البارانويي النرجسيين عندهم جنون العظمة اللي بيوصلهم ان العالم بيتآمر عليهم ، ومبيثقوش في حد الا القليل منهم ، فدي كعلامة حمرا حتعرفيها عن طريق الباسوردات اللي على موبايله وتابه ولابتوبه وكمبيوتره ولا كـزنهم اسرار حربية ، في حين انك ممنوع تعملي اي باسورد لاي جهاز من اجهزتك ، وفي نفس الوقت حتلاقيه احيانايتهمك بالخيانة او يشكك فيكي ويحقق معاكي رحتي فين وشفتي مين وعملتي ايه واللي يسألهولك يسأله للاولاد وكأنه بيحقق معاكم واحد واحد
٧- البيه حساس ، حتلاحظي انه حساس لو هزرتي معاه في اي حاجة او اي حد هزر معاه تلاقيه يغضب ، وحتعديها وتحاولي تكوني لطيفة اكتر وحتفكري ان انتي اللي زودتيها وحتبدأي تكوني حريصة جدا في التعامل معاه ، يمكن ميبانش الكلام دة في الاسابيع او الشهور القليلة في اول العلاقة لانك بتكوني بتحاولي تفهمي الشخصية في وقت الحب العظيم لكن لو فتحتي كويس وراقبتي حتفهمي ، المشكلة ان بعضهم بيلاحظ وبيستمر في العلاقة لاسباب ……
٨- انتبهي للاتهامات اللي بتحصل بدري في بداية العلاقة الاتهام بالخيانة ، وطرح اسئلة كتير عنك وعن زمايلك وقرايبك القريبين منك في العمر و ممكن هو يتوقع حصول استلطاف بينكم وممكن اصلا يمنع اي تواصل بينك وبينهم وطبعا دة انتي بتفسريه حب واهتمام ، لكن احيانا بيكون زايد لدرجة انه يخليكي متدخليش بيوت خالاتك او عماتك بسبب كدة ودة بيكون متلاحظ معاه كمان وجود شغف رهيب بامتيازات الاخرين يعني ميحبش يكون حد عنده مثلا سيارة احسن من سيارته ، ساكن في مكان افضل من مكانه ودايما بيموت نفسه عشان يكون احسن من كل اللي حواليه سواء من اهله او اهلك اواصحابكم . دي غيرة مرضية وحتبان لك في اول العلاقة وحتكون فجة ولازم حتعرفيها
٩- شوفي هو لا بيحس بالندم ولا بيفهم اصلا انه تسبب في اذى اللي ادامه ودي طبعا مش حتبان ابدا في بداية العلاقة لانه بيكون حريص انه يمتلكك فبيعتذر على اتفه غلطة ، اما بعد مايتطمن انك اتعلقتي بيه وانتم لسة برضه مخطوبين ممكن تحسي انه فيه مواقف بتحصل منه مؤلمة وموجعة ويبقى مش فاهم انتي زعلانة ليه اصلا ، او يدعي انه مش فاهم زي مثلا انه يحكي لك بطولاته العاطفية اللي قبلك ويتغزل في البنات اللي كانوا فيها وعادي انتي مفروض تتقبلي دة بدون زعل
١٠- الحاجة الملحة للاعجاب والتقدير سواء سوشيال ميديا او في العالم الخارجي ودي اتكلمنا فيها كتير ومفهومة( موده بيتغير على حسب اللايكات ، وبيروح الاماكن عشان يتصور مش عشان يشرب حاجة او ياكل حاجة حلوة )
١١- الكدب لو انتي مصحصحة حتكتشفيه
١٢- ال شو كل حياته منظرة وفشخرة هدايا ومطاعم ولبس وسيارات وكل واحد على حسب امكانياته واللي معوش بيعمل شو بالالفاظ الرنانة الرومانسية
١٣- الاسقاط ، هو عنده خوف ورعب من حقيقته واول مايزيد خوفه لازم يرميه على اقرب حد له فميلاقيش غيرك ويبدأ يرمي عليكي الصفات الوحشة او التصرفات السيئة اللي بيعملها ، خدي بالك لو انتي بتحبيه وبتعامليه بحب وقالك انتي مش بتحبيني ، اقفي وفكري في باقي كلامه وباقي تصرفاته
22 авг 2024