یِم اچھہِ پوش مےٚ وچھہِ پٔھلِم ، داغ ژٔلِم ما 

#احد_زرگر
یِم اچھہِ پوش مےٚ وچھہِ پٔھلِم ، داغ ژٔلِم ما
کم گُلِ سُنبُل تنہِ ؤلِم ، داغ ژٔلِم ما
کَس ونہٕ ویسۍ دین و ایمان لوٗٹہٕ ہیتھ گوم یار
یس پاد جِگرٕکہِ خونہٕ مٔلِم ، داغ ژٔلِم ما
ماه پارٕ سٕندۍ أمۍ خال و خطن عالماہ کۆر رام
گہوارٕ سٕے منز نور ظلِم ، داغ ژٔلِم ما
مےٚ شان و شوکت کُل یومِِ ھوٗ چُھ وِہۍ ہاوان
فی شان کِنۍ نشانہٕ رٔلِم ، داغ ژٔلِم ما
پراونہٕ سٕندۍ پأٹھۍ سوزِ عشقس منز گُزأرِم ساعت
پراوہ نہٕ تس یِم پر مےٚ تٔلِم ، داغ ژٔلِم ما
اچھر حُسنُک عشقٕنُے معنے چُھ ویژھٕناوان
گچر ترأوتھ پر سوٗ علم ، داغ ژٔلِم ما
آبس تہٕ خاکس رل کٔرِتھ گوم کَل مےٚ گَنییَم
نارن تہٕ واون نیاے تُلِم ، داغ ژٔلِم ما
من سرٕ کے محیطٕ أندرَے ڈونگہِ کھاجیم دُر
عنصر اربعہ ہیتھ مےٚ ژٔلِم ، داغ ژٔلِم ما
نارس تہٕ نورس گوٗر کرۍ کرۍ پوٗر لبم کان
دارس چہ منصور موج تُلِم ، داغ ژٔلِم ما
بۆمبوٗر نتہٕ تُلٕر لأگِتھ گلشنس منز ژاس
عنبر باگن ویور تُلِم ، داغ ژٔلِم ما
عشقٕنۍ مُشکن ننگ تہٕ ناموس کۆر مےٚ فراموش
عاشقن چُھ ہیوُے رام کٔلِم ، داغ ژٔلِم ما
نحوات صرف منطق و فلسفہ مےٚ زالان آو
شہوات از اثبات گٔلِم ، داغ ژٔلِم ما
حیاتٕکۍ یِم جامِ لبریز دِتھ میہ ساقی دراو
مماتہٕ نِش دَس مےٚ چٔھلِم ، داغ ژٔلِم ما
ہشیار زانن رمز عاشق بوزِ کیاہ نادان
ایشارٕوٕے سٕتۍ قبلہٕ ۂلِم ، داغ ژٔلِم ما
دم ہیتھ دماہ جایہِ خلوت ہیوت مےٚ پانس سام
کم کُندٕ لولٕچہِ تورِ دٔلِم ، داغ ژٔلِم ما
ذرٕ ذرٕ کِنۍ اثباتِ احد جلوٕ ماران آو
زرگر سندۍ زیور مےٚ پھلِم ، داغ ژٔلِم ما
گلوکار فاروق احمد گنائی