అజగవ సాహితీ ఛానల్కు స్వాగతం. దసరా సంబరాలు మొదలుకాబోతున్నాయి. కొంతకాలం క్రితం మా అమ్మ ఏదో మాటల సందర్భంలో ఒక విషయం చెప్పింది. వాళ్ళ చిన్నప్పుడు అంటే సుమారుగా 50 - 55 సంవత్సరాల క్రితం దసరా సెలవులలో ఓ చిత్రమైన సంప్రదాయాన్ని అనుసరించేవారట. అదేంటంటే.. పాఠశాల విద్యార్థులంతా తమ ఉపాధ్యాయులతో కలిసి, ఊర్లో ఉన్న అన్ని ఇళ్ళకూ వెళ్లేవారట. మామూలుగా వెళ్లడం కాదు.. అందరూ గుంపులు గుపులుగా దసరా పద్యాలను సరదాగా పాడుకుంటూ వీధులన్నీ తిరుగుతూ వెళ్లేవారట. ఏ ఇంటికి వెళితే ఆ ఇంటివారిని దీవెన పద్యాలను ఆశీర్వదించేవారట. బాలల దీవెనలు బ్రహ్మదేవుడి దీవెనలంటూ చమత్కారపు మాటలు కూడా చెప్పేవారట. దీవెనలతో పాటూ కాస్తంత దబాయింపు కూడా ఉంటుందా పద్యాలలో. దానితో ఆ యా గృహస్థులు కూడా ఎంతో మురిసిపోతూ, పిల్లలకు పప్పుబెల్లలూ, అయ్యవార్లకు అంటే ఉపాధ్యాయులకు అయిదు రూపాయిలో, పదిరూపాయిలో నగదు ఇచ్చి పంపించేవారట. కలవారి కుటుంబాలయితే పిల్లలకు పప్పు బెల్లాలతో పాటూ జేబురుమాళ్ళు, పెన్సిళ్ళు వంటి చిన్న చిన్న కానుకలు కూడా ఇచ్చేవారట. పిల్లాలా కానుకలు తీసుకుని, సంతోషంతో గంతులు వేసుకుంటూ మరో ఇంటికి వెళ్లేవారట. ఇదీ అప్పటి సరదా సంప్రదాయం.దసరా సంబరం ఇదేదో కేవలం ఒకటో రెండో ఊర్లకు సంబంధించింది కాదు. ఇంచుమించు మన ఆంధ్రదేశమంతా అప్పట్లో ఈ సంప్రదాయం ఉండేదట. పేరుకు పద్యమే కానీ రాగయుక్తమైన వచనంలో హాయిగా సాగిపోయే పాటల్లా ఉంటాయీ పద్యాలు. ఆనాటి పిల్లలు పాడుకొనే ఆ దసరా పద్యాలను ఈరోజు మీకు పరిచయం చేయబోతున్నాను.
11 окт 2024