Dekabbe hero stone at K. Belthur Village ಕೆ ಬೆಳತೂರು Heggadadevankote Taluk Mysuru history ದೇಕಬ್ಬೆ ಶಾಸನವನ್ನು ಮೊದಲಿಗೆ ಬಿಎಲ್ ರೈಸ್ ರವರು ಶಾಸನವನ್ನು ಓದಿ ಪರಿಚಯಿಸಿದರು, ಮುಂದೆ ರೆ. ಎಫ್ ಕಿಟ್ಟಲ್ ಅವರು ರೈಸ್ ಓದಿನಲ್ಲಿದ್ದ ಸಣ್ಣ ಪುಟ್ಟ ತಪ್ಪುಗಳನ್ನು ಪರಿಷ್ಕರಿಸಿ ಪ್ರಕಟಿಸಿದರು. ಮುಂದೆ ಈ ಶಾಸನದ ಪಾಠದ ಪಠ್ಯವನ್ನು ಇಟ್ಟುಕೊಂಡು ಡಾ. ಚಿದಾನಂದಮೂರ್ತಿಯವರು ಕನ್ನಡ ಶಾಸನಗಳ ಸಾಂಸ್ಕೃತಿಕ ಅಧ್ಯಯನದಲ್ಲಿ ಮಹಾಸತಿ ವಿಷಯ ಪ್ರಸ್ತಾಪಿಸುವಾಗ ಚರ್ಚಿಸಿದ್ದಾರೆ. ಅದೇ ರೀತಿ ಡಾ. ಕೈದಾಳ ಗಣೇಶ್ ರವರು ಶಾಸನ ಸರಸ್ವತಿ ಕೃತಿಯಲ್ಲಿ ದೇಕಬ್ಬೆ ಶಾಸನದ ಮೇಲೆ ಅದ್ಬುತ ಲೇಖನ ಬರೆದಿದ್ದಾರೆ. ಈ ಮೇಲಿನ ವಿದ್ವಾಂಸರು ದೇಕಬ್ಬೆಯ ಶಾಸನ ಪಾಠದ ಕುರಿತು ಹೇಳಿದ್ದಾರೆ ವಿನಃ ಆ ಶಾಸನ ಒಳಗೊಂಡಿದ್ದ ಶಿಲ್ಪ ಯಾರ ಗಮನಕ್ಕೂ ಬಂದಿರಲಿಲ್ಲ. 18 ವರ್ಷಗಳ ಹಿಂದೆ ಕೆ. ಬೆಳತೂರಿಗೆ ಡಾ. ಡಿ.ವಿ. ಪರಮಶಿವಮೂರ್ತಿಯವರು ಹೋಗಿ ಕ್ಷೇತ್ರಕಾರ್ಯ ಮಾಡುವಾಗ ಡಬ್ಬು ಬಿದ್ದಿದ್ದ ಶಾಸನವನ್ನು ಊರವರ ಸಹಕಾರದಿಂದ ಎತ್ತಿ ನಿಲ್ಲಿಸಿದಾಗ ಶಿಲ್ಪ ಗೋಚರಿಸಿದೆ, ಜೊತೆಗೆ ಪಟ್ಟಿಕೆಗಳ ಮೇಲೆ ಅಪ್ರಕಟಿತ ಶಾಸನದ ಸಾಲುಗಳನ್ನು ಪತ್ತೆ ಹಚ್ಚಿದರು. ದೇಕಬ್ಬೆ ಶಿಲ್ಪ ಶೋಧನೆ ಮಾಡಿದ ಶ್ರೇಯಸ್ಸು ಡಿವಿಪಿ ಯವರಿಗೆ ಸಲ್ಲುತ್ತದೆ. ಶಾಸನದಲ್ಲಿ ಏನೇನು ಉಲ್ಲೇಖಿಸಿದಿಯೋ ಶಿಲ್ಪದಲ್ಲಿ ಅದೇ ವಿಚಾರಗಳು ಹೇಳುತ್ತದೆ ಅಷ್ಟರ ಮಟ್ಟಿಗೆ ಶಾಸನ & ಶಿಲ್ಪ ರಚನೆಯಾಗಿದೆ. ಈ ಬೆಳತೂರಿನ ಮಹಾಸತಿ ದೇಕಬ್ಬೆಯ ಶಾಸನವೂ ಇಂದು ಯಾರೇ ಮಹಾಸತಿ ಪರಂಪರೆ ಕುರಿತು ಅಧ್ಯಾಯನ ಮಾಡುವವರಿಗೆ ಅತ್ಯುತ್ತಮ ಆಕರವಾಗಿದೆ
2 окт 2024