දියවැඩියාවත් එක්කම එන බරපතලම සංකූලතාවයක් තමයි පාද වල තුවාල ඇති වීම සහ පාද කපා ඉවත් කිරීමට සිදු වීම. මුලින්ම බලමු කොහොමද පාද වල තුවාල ඇති වන්නේ කියලා. දියවැඩියාව තිබෙන ඔබට ඔබගේ පාද වල ස්පර්ශය සහ උෂ්ණත්වය වැනි සංවේදන ඇති වීම අඩු වෙනවා. ඒත් එක්කම ඔබගේ පාද වලට සැපයෙන රුධිර ප්‍රමාණයත් අඩු වීමෙන් පාද වල තුවාල ඇති වෙනවා. මේ තුවාල, පාද වල සංවේදීතාව අඩු නිසා ඔබට දැනෙන්නේ නෑ. ඒ නිසා මෙම තුවාල නරක් වීමෙන් ඔබගේ පාද කපා ඉවත් කිරීමට සිදු වෙනවා.
නමුත් මෙම සංකූලතාවය ඇති වීම වළක්වා ගත හැකියි. ඒ සදහා පහත ආකාරයට ඔබගේ පාද ආරක්ෂා කර ගත යුතුයි.
* සෑම දිනකම රාත්‍රී නින්දට පෙර පාද වල තුවාල, කැපීම්, සීරීම්, රතු පැහැ ගැන්වීම සහ වැඩි උෂ්ණත්වයක් තිබේදැයි බැලීම.
* සෑම රාත්‍රියකම නින්දට පෙර, පාද මද රස්නය ඇති උණු වතුරෙන් සෝදා වාතයේ වියළීමට ඉඩ හැරීම. මෙහිදී පාද පිස නොදැමිය යුතුයි.
* පාද වල ආරක්ෂාවට පාවහන් පැලදීම. මෙම පාවහන් ඔබට ගැළපෙන ප්‍රමාණයේ ඒවා විය යුතුයි. ඒ වගේම පාවහන් පැලදීමේදී ඒවා ඇතුළත ගල් කැබලි ආදිය නැති බවට තහවුරු කර ගත යුතුයි.
* පාද වල සංවේදීතාවය හොදයි නම් වසරකට වතාවක්ද, අඩුයි නම් මස කිහිපයකට වතාවක්ද වෛද්‍යවරයෙකුට පෙන්වා ප්‍රතිකාර ගැනීම.
* පාද වලට අවම හානියක් වන ඇවිදීම, බයිසිකල් පැදීම, පිහිනීම වැනි ක්‍රියා සිදු කිරීම හෝ වෛද්‍යවරයා නිර්දේශිත ක්‍රියා වල යෙදීම.
* පාද වල රුධිර සැපයුම වැඩි කිරීමට හිදගෙන සිටින විට පාද ඔසවා තබා ගත හැකි නම් එයත් වැදගත්.
* පාද වල ඇති බර නිසා ඇති වන හම ඝන වී ඇති ප්‍රදේශ ඔබ විසින් ඉවත් කිරීම සිදු නොකරන්න.
මෙම උපදෙස් නිවැරදිව අනුගමනය කිරීමෙන් ඔබටත් ඔබගේ පාද වල දියවැඩියාව නිසා ඇති වන සංකූලතා අවම කර ගත හැකියි.
මීළගට අපි බලමු මොන වගේ අවස්ථා වලදීද ඔබට අනිවාර්‍යයෙන්ම වෛද්‍යවරයෙක් හමු විය යුතු වන්නේ කියලා,
* ක්‍රියාකාරකම් සිදු කිරීමේදී කෙණ්ඩා වල, කලවාහි හෝ පිටුපස කැක්කුමක් ඇති වීම.
* පාද වල හිරි වැරුණු ගතිය, පිච්චෙන ස්වභාවය හෝ වේදනාව
* පාද වල සංවේදීතාවය අඩු වීම එනම් උෂ්ණත්වයට සහ ස්පර්ශයට ඇති දැනීම නැති වීම.
* පාද වල හැඩය වෙනස් වීම, තුවාල, කැපීම් ආදිය ඇති වීම, උෂ්ණත්වය වැඩි වීම හා පාද වල රෝම හැලීම.
* වියළුණු, ගැලවී යන හමක් සහිත පාද
* පාද වල ඇගිලි කරු අතර දිලීර ආසාධන ඇති වීම.
* ඇගිලි වල නියපොතු කහ පැහැ වී ඝන වීම, නියපොතු හම තුලට වර්ධනය වීම.
* බර නිසා ඇති වන තුවාල යටිපතුලේ ඇති වීම.
දියවැඩියාවට බෙහෙත් ගන්න ගමන්ම මේ පිළිබදවත් සැලකිලිමත් වුණොත් ඔබගේ පාද ඔබට කරදරයක් නොකර ගනිමින් ආරක්ෂා කර ගන්න එක ඉතාමත් පහසු කාර්‍යයක්.
ඉෂාර ජයරත්න
#Diabetes #Foot_Care #Sinhala
29 авг 2024
