පුරාතනයේ දී නිල බලයෙන්, ධන බලයෙන් සහ කුල බලයෙන් තමන් උසස් සහ උතුම් යැයි සම්මත කරගත් මිනිසුන් ගමන් බිමන් ගියේ දෝලාවෙන්. දෝලාව තම කර මත තබා ගෙන ගිය මිනිසුන් හෙවත් දෝලාකරුවන්ට මේ සම්මතය තදින් කාවැදී තිබුණා.
දෝලාකරුවන්ට හැඟුනේ ඔවුන් ඉපදී ඇත්තේ සහ ජීවත්වන්නේ ඒ උත්තමයින්ට වුවමනා සැප පහසුකම් සපුරාලීමට පමණක් ම බවයි. ඊට අමතරව, බොහෝ දෝලාකරුවන් කළේ ඔවුන්ට ජීවිකාව සඳහා යැපීම් සලසන උසස් යැයි සම්මත මිනිසුන් සමාජයට යහපත කළ ද අයහපත කළ ද ඔවුන් ගේ ගුණ ගැයීමයි.
උසස් යැයි සම්මත උන්ට වුවමනා වුණේ දෝලාකරුවන් ගේ ජීවන තත්වය සහ ජීවන රටාව පහත් මට්ටමකින් ම පවත්වා ගෙන යමින් ඔවුන්ගෙන් තමන්ට අවැසි දේ සූක්ෂම සහ කපටි ලෙස ලබා ගැනීමටයි. දෝලාකරුවන් ගේ අනවබෝධය, ආත්මාර්ථකාමිත්වය, නිවටකම, වැරදි ආකල්ප සහ ඇත්ත දැකීමට නොහැකියාව යන කරුණු උසස් යැයි සම්මත මිනිසුන් ගේ මන දොළ ඉදිරියටත් සපුරා ගන්නට ඉතා ම පහසු කළා.
දෝලාකරුවන්ව අසරණ කළ ඔවුන්ගේ එම මානසිකත්වය සහ ආකල්ප මේ දිවයිනේ වැසියන් වන ඔබ තුලත් පවතී දැයි මේ "දෝලාව" ගීතය අවබෝධයෙන් යුතුව ඇසීමෙන් පසුව විමසා බලන්නට මා ඔබට ම පවරනවා. ඔබේ මානසිකත්වය සහ ආකල්ප විසින් අපේ රටේ අනාගත ඉරණම තීරණය කර තීන්දු කරනවා. අපි තව දුරටත් දෝලාව කර තබා ගෙන ඉදිරියට යමු ද?
Artiste - Siyumini Opayangi
Lyrics - Prof.Jagath Premachandra
Melody and music - Kapila Aparakka
Track arrangements - Sugath Hettiarachci
Mix & mastering - Sandaru Gamage
Video - Lashan Sanjeewa
2 окт 2024
