གཞི་བདག་མི་དང་འགྲོགས་པའི་བུ།།
རི་ལ་བོར་ཡང་བ་ཞིག་གིས།།
གསོས་པས་བ་ལས་ནུ་ཞེས་པ།།
སྐྱེས་བུ་སྟོབས་རྩལ་ཅན་ཞིག་བྱུང་།།
དེ་ཡིས་རྒན་མོས་བློ་ལྟོན་ལྟར།།
རྟ་ལུད་ཀྱིས་ནི་སྒྱུ་ཕབ་སྟེ།།
རྒྱ་ཡི་ཡུལ་ཁམས་དབང་བསྒྱུར་ཏེ།།
མིང་ལ་གྲའི་ཛུང་རྒྱལ་པོ་བཏགས།།
རྒྱལ་ཐོག་དྲུག་པ་རྒྱལ་རྒོད་ནས།།
གདུང་རྒྱུད་ཆད་པས་ཐོ་ཛི་ཞེས།།
རྒྱལ་པོ་གཞན་ཞིག་བྱུང་གྱུར་ཏེ།།
དེས་ཀྱང་རྒྱལ་ཁམས་དར་རྒྱས་མཛད།།
འོན་ཀྱང་མི་ཉག་རྒྱལ་པོ་ཡི།།
བླ་སྲོག་མེ་ཡིན་ཇིང་རྒྱལ་ཆུ།།
དེ་ཕྱིར་རྟེན་འབྲེལ་མཐུ་བཙན་པས།།
མཐའ་མ་མི་ཉག་ཧོར་གྱིས་བཅོམ།།
5 окт 2024