မြစ်ကြီးနားရေကြီးမှု ၂၀၀၄ စံချိန်ထက် ကျော်သွားနိုင် ( ရုပ် / သံ )
၁ ဇူလိုင်၊ ၂၀၂၄
မြစ်ကြီးနားမြို့ဟာ ဇူလိုင်လ ၁ ရက်နေ့ နေ့လည် ၂နာရီဝန်းကျင်က တိုင်းတာချက်အရ စိုးရိမ်ရေမှတ်ထက် ၁၃၀၇ စင်တီမီတာ မြင့်တက်နေပြီး ဆက်လက်မြင့်တက်နေတဲ့အတွက် ၂၀၀၄ ခုနှစ်တုန်းက စံချိန်တင်မြစ်ရေကြီးခြင်းတိုင်းတာချက် ၁၄၀၇ ကို ကျော်တက်သွားနိုင်တယ်လို့ သိရပါတယ်။
လက်ရှိအချိန်မှာတော့ ရေကြီးနေတဲ့ မြစ်ကြီးနားမြို့က တစ်ချို့ရပ်ကွက်တွေမှာ လူတွေ ပိတ်မိနေကြပါတယ်။ ကယ်ဆယ်ရေးအဖွဲ့တွေရဲ့ဖုန်းတွေကို ဆက်ပေမယ့် ဖုန်းလိုင်းအခက်အခဲကြောင့် ဆက်လို့ မရကြဘူးလို့ သိရပါတယ်။
စီတာပူရပ်ကွက်၊ ရမ်ပူရပ်ကွက် တို့ဘက်မှာလည်း တချို့ အိမ်တွေမှာ သက်ကြီးရွယ်အိုများနဲ့ ကလေးများ ပိတ်မိနေတဲ့အတွက် လူမှုကွန်ယက်တွေကတဆင့် အကူအညီတောင်းခံနေကြတာကို တွေ့ရပါတယ်။
"ဖုန်းလိုင်း အင်တာနက်လိုင်း ရနေသေးလို့တော်သေးတယ်။ မနေ့ည ၁၀ နာရီလောက်ထဲက ဘာမှ မစားရဘဲ မိတ်ဆွေဆိုင်တွေ ပြောင်းတာကို ကူပေးနေရတာ ။ စားဖို့သောက်ဖို့လည်း ခက်ခဲနေပါတယ် ။ တမြို့လုံးကို ရေလွှမ်းတာဆိုတော့ ဘာဆိုင်မှ မဖွင့်ဘဲ နီးရာအိမ်က နီးရာလူကို ကူညီပေးရတာမျိုးပဲ ရှိတယ်" လို့ မြစ်ကြီးနားမြို့ခံတစ်ဦးက New Day Myanmar ကို ပြောပြပါတယ်။
လက်ရှိမှာ စက်သုံးဆီဈေး တစ်လီတာ ၂၀၀၀၀ ထိ ပေါက်နေပြီး မြစ်ကြီးနားက လူတွေဟာ ကယ်ဆယ်ရေးစက်လှေတွေကို လာတာကို စောင့်နေရတယ်လို့ သိရပါတယ်။ "တချို့နေရာတွေက ကား ဆိုင်ကယ် သွားလို့မရတော့ဘူး ။ လှေပဲ သွားလို့ရတာ ။ ကယ်ဖို့ အကူအညီတောင်းနေတဲ့တချို့လူတွေဆို တချို့ အိမ်ခေါင်တွေပေါ် တက်နေနေရတယ်။ ကယ်တဲ့သူတွေကလည်း သွားနေ ကယ်နေတာပဲ ၊ ကယ်နေရင်း ရေက အရှိန်နဲ့တက်လာတာ" လို့ ကူညီပေးနေသူတစ်ဦးက ဆိုပါတယ်။
" အခုကတော့ ၂၀၀၄ ထက်တောင် ဆိုးမလားမသိဘူး ။ ကျွန်တော့်ဆိုင်ဆို မြုပ်သွားပြီ။ ကြိုတော့ ရွှေ့ထားပါတယ်။ အဆုံးအရှုံးကတော့ များတာပေါ့ ။ ၂၀၀၄ တုန်းကဆို မနောကွင်းတိုင်ထိပ်ထိ မြုပ်တယ်။ ဒီနှစ်လည်း ဒီလောက်တော့ ကြီးမှာပဲ။ အခုက အင်တာနက်ရ ဖုန်းရနေတာတော့ ၂၀၀၄ ခုနှစ်ထက် သာတယ် ။ ကယ်ဆယ်ရေးတွေလည်း အလွယ်တကူ ဘယ်နားတက်နေလဲ ဘယ်နားသွားပေးရမလဲ သိတာပေါ့ ။ အခုကယ်နေတာကတော့ မနေ့ညထဲက ခုချိန်ထိ ဘယ်စစ်သား ဘယ်စစ်တပ်မှ မလာကူပါဘူး ။ မြို့ပေါ်ကလူတွေပဲ နီးရာစုပြီး လှေနဲ့ပတ်ခေါ်တာပေါ့" လို့ မြစ်ကြီးနားမြို့ပေါ်က ဆိုင်ဖွင့်ထားသူတစ်ဦးက New Day Myanmar ကို ပြောပါတယ်။ "ကယ်ဆယ်ရေးစက်လှေတွေကလည်း နားရတယ်မရှိဘူး ဆီဈေးလဲကြီးနေတယ် ။ ရေကြီးတာကို နောက် ၄ရက် ၅ ရက်ထိ ကြိုတွက်ပြီး အကုန်ပြင်ဆင်ထားစေချင်တယ်"လို့ သူက ဆက်ပြောပါတယ်။
မြစ်ကြီးနားကရေဘေးသင့်ပြည်သူတွေ ထမင်းနဲ့ ဟင်းဘူးတွေကို ဘာသာရေးအသင်းအဖွဲ့တွေကလည်း လိုက်ပြီး လှူဒါန်းပေးနေတယ်လို့သိရပါတယ်။ ဘုရားကျောင်း ၊ အသင်းတော်နဲ့ လူမှုကယ်ဆယ်ရေးအဖွဲ့တွေကို ဆက်သွယ်အကူအညီတောင်းလို့ ရတယ်လို့ မြို့ခံတွေက ပြောပါတယ်။ ဒါ့အပြင် ရိသျှ်အနုဿတိအသင်းကလည်း ထမင်းဘူးတွေကို မြစ်ကြီးနားမြို့ပေါ်က ဘယ်နေရာမဆိုလာပြီး လှူဒါန်းပေးမယ်လို့ ကချင်သတင်းဌာနတွေမှာ ကြေညာထားပါတယ်။
30 сен 2024