አመ ፳ወ፩ ሐምሌ ማርያም
እስ፣ ፆላዕኒ ሐሠረ ይመስሎ ወኵናትኒ ኢይክል አሕምሞቶ ጻድቅ ብእሲ ዘይትዌከል በፈጣሪሁ መራደ አሕዛብ ኢይክሉ ፀቢዖቶ ወረዋድያን ኢይኄይልዎ ጻድቅ ብእሲ እማዕገት ያመስጥ።
ለቡ: በ፩ ሰአሊ ለነ ማርያም ቅድስት እኅቱ ለሙሴ እሞሙ ለሰማዕት ማርያም ታዕካ በምድር ወታዕካ በሰማይ።
ዓራ: ማርያምሰ ረከብኪ ሞገሰ በኀበ እግዚአብሔር ወአነሂ እትፌሣሕ በእንቲአኪ እስመ ረከብኩ እምውስተ ደቂቅኪ እለ የሐውር በትእዛዝየ አምኂ አምኂ አምኂ ደቂቀ እኅትኪ ኅሪት።
ቅን: በትረ አሮን እንተ ሠረፀት ወባቲ ይገብሩ ተአምረ በውስተ አሕዛብ እስመ አርአያ መስቀል ይእቲ።
ሰላም: ማኅደረ ሰላምነ ቅድስት ደብተራ እሞሙ ለሰማዕት ወእኅቶሙ ለመላእክት ንዑ ንስግድ ኲልነ ኀበ ማርያም እምነ።
14 авг 2023
